Sam 50 - Bislama Bible Revised 2012

Prapa fasin blong mekem wosip(Sing ya, Asaf i wokem.)(Tok i go long ol man.)

1Hae God, hem i God,

mo hem i gat olgeta paoa.

Hem i sanemaot tok blong hem

i go long olgeta ples long wol,

i stat long is, i go kasem long wes,

blong singaot olgeta man

oli kam wanples.

2Saeon,*

i gudfala ples we i gud tumas,

mo bigfala delaet ya

we i soemaot we God i stap,

i stap saenaot long ples ya,

i kasem evri ples.

3God blong yumi i stap kam,

be i no kam long kwaet fasin,

Faea we i stap kakae ol samting

i stap kam fastaem long hem,

mo win we i strong tumas

i stap raonabaot long hem.

4Hem i singaot heven mo wol

blong tufala i witnes blong hem,

bambae tufala i luk

we hem i jajem olgeta man blong hem.

5Hem i talem se,

“Yufala i tekem ol man blong mi

we tingting blong olgeta i stap strong long mi,

oli kam wanples.

Olgeta we oli mekem sakrefaes long mi

blong soemaot we oli holem promes blong mi,

oli mas kam stanap long fes blong mi.”

6Olgeta samting long skae oli stap talemaot

we fasin blong God i stret,

mo hem nomo i save jajem ol man.

7Nao God i talem se,

“Ol laen* blong Isrel,*

yufala i man blong mi.

Yufala i lesin,

nao bambae mi mi toktok.

Bambae mi talemaot ol poen

agens long yufala.

Mi mi God,

mi God blong yufala.

8Mi mi no save tok long yufala

from ol sakrefaes blong yufala.

Ol presen ya we yufala i stap bonem long olta

oli stap oltaem long fes blong mi.

9Be mi mi no stap wantem ol bul

long ol fam blong yufala

mo ol man nani

long ol fenis blong yufala.

10Olgeta anamol long bus oli blong mi,

wetem olgeta buluk long hamas taosen hil.

11Olgeta wael pijin

wetem ol narafala laef samting

we oli stap olbaot long wol,

oli blong mi.

12“Mo sipos mi hanggri,

bambae mi no save askem

ol samting ya long yufala,

from we wol ya

wetem evri samting we i stap long hem

oli blong mi.

13?Weswe?

?Yufala i ting

se mi mi stap kakae mit blong bul,

no mi stap dring blad blong nani?

14Mi mi God, mo mi hae we mi hae,

mo i gud yufala i stap talem tangkiu long mi oltaem.

Hemia nao i prapa sakrefaes blong yufala.

Mo i gud yufala i stap mekem olgeta samting

we yufala i promes finis long mi,

se bambae yufala i mekem.

15Nao sipos yufala i singaot long mi long taem blong trabol,

bambae mi mi sevem yufala,

mo bambae yufala i leftemap nem blong mi.”

16Be God i tok long ol man nogud,

i talem se,

“?From wanem yufala i stap lanem ol loa blong mi,

nao yufala i stap ridim baehat?

?From wanem yufala i stap tokbaot promes ya

we mi bin mekem wetem ol bubu blong yufala bifo?

!Yufala i man blong giaman nomo!

17Yufala i stap sakem ol tok blong mi,

mo yufala i no wantem nating

blong mi mi stretem yufala.

18Oltaem yufala i stap mekem fren

long ol man blong stil,

mo yufala i stap go miksap

wetem ol man blong stilim woman.

19“Oltaem yufala i rere nomo

blong talem ol tok we i nogud,

mo yufala i stap gohed blong giaman

we yufala i no kea.

20Yufala i stap tok agens

long ol brata blong yufala.

Ol stret brata blong yufala nomo,

be yufala i stap spolem nem blong olgeta.

21Yufala i stap mekem ol samting ya,

mo yufala i ting

se mi mi no save tok long yufala from.

!Yufala i ting

se mi mi olsem yufala nomo!

Be naoia,

bambae mi mi tok strong long yufala,

blong mekem ol poen blong yufala

i klia gud long yufala.

22“Yufala we i no tingting long mi,

yufala i lesin long ol samting ya.

Sipos no,

bambae mi mi spolem yufala,

nao bambae i no gat man blong sevem yufala.

23Man we i stap talem tangkiu long mi,

hem i stap ona long mi,

i olsem we hem i stap mekem prapa sakrefaes long mi.

Mo man we i stap obei long mi,

mi bambae mi sevem hem.”