FAKAASIGA 20 - Tuvalu Revised Bible

Ko Tausaga e Afe

1Fakamuli ifo, ne matea ne au te agelu e fanaifo mai te lagi, e puke i tona lima a te ki o mone mo te seni 'mafa.

2Kene 3.1Ne puke ne ia te talako, tela ko te gata mua eiloa, ko te Tiapolo tena io me ko Satani, kae ne saisai ne ia i te afe o tausaga.

3Ne pei ne te agelu a ia ki mone, loka fakamau ko te mea ke se toe takitaki 'se ne ia a fenua ke oko ki te palelega o te afe o tausaga. Ka oti, ko fakasaoloto ei a ia mo se taimi toetoe.

4 Tani 7.9,22 Ne matea ne au a nofogaaliki, mo latou kola e saga'saga i ei; ne tuku atu foki te mana ki a latou o fakamasino a tino. Ne matea foki ne au a agaga o tino kola ne tamate, i te mea ne fakaasi ne latou a te mea tonu tela ne fakaasi ne Iesu, e pela foki mo te muna a te Atua. E seki tapuaki eiloa latou ki te manu fekai io me ki tona fakatusa, e seki maua foki ne latou a te fakailoga o te manu fekai i olotou lae mo lima. A latou ne toe ola kae pule e pela mo ne tupu fakatasi mo Keliso i te afe o tausaga.

5A te 'toega o tino 'mate e seki toe ola mai latou seiloga ko palele atu te afe o tausaga. Tenei te faka'tumaiga muamua o tino 'mate.

6Amutia kae manuia a tino e kau fakatasi i te fakatumaiga muamua o tino 'mate. E seai se malosi o te mate fakalua i luga i a latou; ka fai latou mo faitaulaga a te Atua mo Keliso, kae ka pule fakatasi latou mo ia i te afe o tausaga.

Ko Takavale a Satani

7Kafai ko katoa tausaga e afe, ka fakasaoloto a Satani mai te fale puipui,

8Eseki 7.2; Eseki 38.2,9,15kae ka fano o fakaloiloi a fenua e salalau valevale i te lalolagi katoa, tela ko Koka io me ko Makoka. Ka fakamaopoopo katoa ne Satani a fenua ki te taua, e pela eiloa mo te uke o one o te tafatai.

9Ko salalau valevale latou i koga katoa o te lalolagi, kae nikoi ne latou a te fa'kai o Kelisiano, ko te fa'kai tela e alofa a ia ki ei. Kae fakamasei latou ne te afi mai te lagi.

10Ka ko te Tiapolo, tela ne fakaloiloi ne ia latou, ne pei ki loto i te lase ka ulaula mo te pauta ka, tela ne pei foki ki ei a te manu fekai mo te pelofeta loi; kae ka fakapuapuagatia latou i kona i te ao mo te po, ke oko eiloa ki te se gata mai, ki te se gata mai eiloa.

Ko te Fakamasinoga Fakapalele

11 Tani 7.9,10 Ne matea ne au a te nofogaaliki lasi kae kena mo te tino e sagasaga mai i ei. Ne 'tele keatea mai ona mua a te lalolagi mo te lagi, ko se toe matea atu eiloa laua.

12Ne matea ne au a tino 'mate, tino ma'luga io me ko tino ma'lalo ko pau eiloa, e 'tu i mua o te nofogaaliki. Ne 'tala a tusi, ne toe 'tala foki te sua tusi, ko te tusi o te ola. Ne fakamasino a tino 'mate e tusa mo olotou mea ne fai, kola e tusi i loto i tusi.

13Ne tuku ake foki ne te tai ona tino 'mate. A te mate mo Seoli ne tuku ake foki ne laua a la tino 'mate. Kae ne fakamasino katoa e tusa mo olotou mea ne fai.

14Tela la, ne pei ki te lase ka ulaula o te mate mo seoli. A te lase ka ulaula tenei ko te mate fakalua.

15So se tino ne pei ki te lase ka ulaula, e se tusi tona igoa i te tusi o te ola.