GALUEGA 10 - Tuvalu Revised Bible

Ko Petelu mo Konelio

1E isi se tagata e nofo i Kaisaleia e igoa ki a Konelio, kae se takitaki o te kautau Loma, e fakaigoa ki te kau a Italia.

2A ia mo tona kau kaiga, ne tino 'lotu kae ma'taku ki te Atua. E uke ana galuega alofa ne fai mo tino Iutaia, kae 'talo sale eiloa ki te Atua.

3I te itula e tolu i te sua afiafi, ne oko mai ki a ia se fakaasiga, tela ne matea 'lei ei ne ia te agelu a te Atua e vau ki a ia, kae faipati mai ki a ia penei: “Konelio!”

4Ne faka'toka atu a ia ki te agelu mo te mataku, ana muna, “Te Aliki, e a, e isi sau fekau?” Ne tali mai te agelu: “Ko talia ne te Atua au tinoga mo au galuega alofa, tena te pogai e masaua ei koe ne te Atua.

5Uga atu ne tino ke olo ki Iopa, o aumai ki konei a te tagata e igoa ki a Simona Petelu.

6E 'nofo mo te tagata tela e faite mea mai pa'kili o manu e igoa ki a Simona, kae tu pili ki te tai tona fale.”

7I te fanoga a te agelu, kalaga atu ei a ia ki ana tavini e tokolua mo te sotia e tokotasi, se tagata lotu.

8Ne fakamatala atu ne ia ki a latou a mea katoa, oti, uga atu ei ne ia ke olo ki Iopa.

9I te sua aso, ka koi olo atu eiloa latou i te lotou auala. Ko pili atu latou ki te fa'kai, ka ko pili ki te tutonu ne fanake a Petelu ki luga i te tuafale papa, o 'talo i ei.

10Ko likiliki Petelu, ka ko manako eiloa a ia o kai. Ka koi fakatoka a meakai, ne oko mai te fakaasiga ki a Petelu.

11Ne matea ne ia te lagi e matala, matea ei ne ia a te mea e fanaifo e pela mo se laugatu lasi, e 'sai ona kapa e fa kae tukutuku ifo ki lalo i te lalolagi.

12I loto i te mea tena, e tuku i ei a vaega manu vaefa valevale, manu 'tolo mo manu eva.

13Ne oko mai te leo ki a ia penei, “Tu ki luga e Petelu. Ta ne koe a mea kona, kae kai ki ei.”

14Ne tali atu Petelu, “Ikai e te Aliki, i a au nei e seki kai eiloa ki se mea kai lailai io me se meakai se 'ma.”

15Ne toe oko mai foki a te leo ki a ia i te fakalua penei, “Sa taku fakalailai ne koe a te mea ko oti ne faka'ma ne te Atua.”

16Ne tupu fakatolu a te mea nei, oti toe avake ei ki te lagi a mea kona.

17Ka koi 'numi te mafaufau o Petelu me se a te uiga o te fakaasiga ne matea ne ia, kae oko mai eiloa mo tino kola ne uga mai ne Konelio. Ne fesilisili latou me tu i fea a te fale o Simona, ke oko eiloa ki te 'tu atu o latou i te mataloa o te fale o Simona.

18Ne ka'laga atu latou ki loto, o fesili tonu me ko Simona tela e igoa foki ki a Petelu e nofo i loto.

19Ka koi mafaufau 'loto a Petelu ki te uiga o te fakaasiga, ne fai atu a te Agaga ki a ia, “Kiloke, e tokotolu a tagata konei e salasala ki a koe.

20Tu ki luga, kae fanaifo o fakafetaui latou. Sa mataku foki o olo mo latou me ne uga mai ne au latou.”

21Ne fanaifo a Petelu ki a latou, fai atu ei a ia, “Ko au tenei e 'sala koutou ki ei. Se a te fekau ne o'mai ei koutou?”

22Ne tali atu latou, “Ko Konelio te takitaki o te tokoselau ne uga mai ne ia matou. A ia se tagata amiotonu tela e tapuaki ki te Atua, kae fakaaloalogina malosi ne tino Iutaia katoa. Ne fakatonu a ia ne se agelu a te Atua, ke ami mai koe ki tona fale, ko te mea ke fakalogologo a ia ki au muna.”

23Tela, ami ei ne Petelu tagata kona ke ulu atu ki loto i te fale, moe ei i kona i te po.

I te taeaoakega, ne olo tasi ei Petelu mo latou. E isi foki ne taina mai Iopa ne olo tasi mo latou.

24Ne taunu a ia ki Kaisaleia i te sua aso, ki te koga tela e faka'tali mai ei a Konelio mo tona kaiga pela foki mo ona taugasoa ki tona oko atu.

25I te uluatuga a Petelu ki loto, fakafetaui ei a ia ne Konelio, kae fakasiga ki lalo i ona vae o ifo atu ki a ia.

26Ka ko Petelu ne fai atu ke tu ki luga, ana muna: “Tu ki luga, i a au se tino ola fua.”

27Ulu tasi atu ei a Petelu mo Konelio ki loto i te fale. E sasale ki loto kae fai'pati. I te la uluga ki loto i te fale, matea ei ne ia me e tokouke a tino e potopoto mai i loto.

28Ne fai atu a Petelu ki a latou, “E iloa katoa ne koutou i te tino Iutaia e fakatapu o fakatasi io me o asiasi ki se tino o fenua fakaatea, ka ko te Atua ko oti ne fakamaina faka'lei ne ia ki a au, me e se 'tau mo au o taku fakase'ma se tino.

29Tela la, i te aumaiga o te otou fekau ke vau au, vau eiloa au mo toku loto fiafia. Tenei la, ko fesili atu au me se a te pogai ne ma'nako ei koutou ke vau au?”

30Muna a Konelio, “Ko tusa mo te tolu o aso ko teka atu nei, ne 'talo au i loto i toku potu i te itula e tolu i te fakaafiafi, kae poi eiloa au i te tagata e malapulapu ona gatu e tu mai i oku mua.

31Ana muna ki a au, ‘Konelio, ko oti ne lagona ne te Atua au 'talo, ka ko au galuega alofa e masaua faeloa ne ia.

32Uga atu se tino ki Iopa, o ami mai ki konei a te tino e igoa ki a Simona Petelu, tela e nofo i te fale o Simona te tino faite mea mai pa'kili o manu, kae e tu pili tona fale ki te tai.’

33Tena te pogai ne uga atu fakavave ei taku fekau ke vau koe, ka ko oko eiloa i te 'lei, i a koe ko oko mai. Kae nei a matou ko i konei i mua o te Atua, o fakatalitali atu o fakalogologo, ki mea kola ne taku atu ne te Aliki, ke vau koe o taku mai ki a matou.”

Ko te Lauga a Petelu

34 Teu 10.17 I kona foki eiloa, kamata eiloa o lauga atu a Petelu ki a latou, ana muna: “Se mea tonu i te Atua e se fakailoga tino.

35So se tino o so se fenua e mataku ki te Atua, kae amiotonu foki, e talia faeloa a ia ne te Atua.

36Tena te fekau ne tuku ki tino Isalaelu, ke folafola atu te Tala 'Lei o te filemu e alatu i a Iesu Keliso, tela ko te Aliki o tino katoa.

37E iloa 'lei eiloa ne koutou a mea taua ne 'tupu i Iutaia katoa, kae ne kamata eiloa o folafolagina i Kalilaia, mai tua ifo o te papatisoga ne folafola ne Ioane.

38E iloa foki ne koutou i te tukuatuga ne te Atua ki a Iesu te Nasaleta a te Agaga Tapu mo te mana. Ne fano sale a ia o fai a galuega alofa, kae faka'lei foki a latou kola e pukea ne agaga ma'sei, i te mea ko kau fakatasi a ia mo te Atua.

39A matou ne tino molimau ki mea katoa ne fai ne ia i te fenua ko Iutaia, pela foki i Ielusalema. Ne tamate ne latou a ia i luga i te sataulo.

40Ne fakatu ake a ia ne te Atua i te tolu o aso, kae ne fai foki ne ia ke matea.

41Kae ne seki matea ne tino katoa, ka ko matou fua kola ne filifili ne te Atua ke fai mo tino molimau. Ne 'kai kae inu fakatasi matou, i te otiga ne fakatu ake ne te Atua mai te mate.

42Ne fakatonu foki ne ia a matou ke folafola atu a te tala 'lei ki tino, kae ke molimau tonu foki me i a Iesu ko ia eiloa tena ne tofi ne te Atua, ke fai mo Famasino o tino 'mate mo tino ola.

43Ne fai'pati katoa a pelofeta e uiga ki a ia, me i tino katoa kola e talitonu ki a ia, e maua ne latou te fakamagaloga o olotou agasala, e alatu i te mana o tona igoa.”

Ko Maua ne Tino o Fenua Fakaatea a te Agaga Tapu

44Ka koi faipati atu eiloa a Petelu ki a latou, ne fanaifo te Agaga Tapu i luga o tino katoa kola e fakalogologo ki te muna.

45Ne ofo a Iutaia talitonu kola ne olo atu mo Petelu ki Iopa, i te Atua ko 'ligi atu foki ne ia tena meaalofa ko te Agaga Tapu ki luga i tino o fenua fakaatea.

46I te mea ko lagona atu ne latou me faipati ki 'gana kesekese kae tavae atu foki ki te maluga o te Atua. Ne faipati ake ki luga a Petelu, ana muna:

47“A tino konei, ko maua ne latou a te Agaga Tapu, e pela eiloa mo te mauaga ne tatou. E a, e isi se tino e mafai ne ia o taofi latou ke se papatiso?”

48Tela, fakatonu atu ei ne ia ke papatiso a tino konei i te igoa o Iesu Keliso. Fakamolemole atu ei a tino kona ke 'nofo ake latou mo ia i ne mo aso.