SALAMO 90 - Tuvalu Revised Bible

TE FA O TUSI(Sala 90—106)Ko te Atua mo Tino

1Te Aliki, a koe ko te motou lafiga i taimi katoa.

2Ka koi tuai o faite ne koe a mauga,

Koi tuai foki o faite ne koe te lalolagi,

A koe ko te Atua mai mua loa,

Kae ka fai loa koe mo Atua ki te se gata mai.

3E fai atu koe ki te tino ke foki atu ki te mea ne māfua mai ei a ia;

E toe 'fuli ne koe a ia ke liu pefu.

4 2Pete 3.8 A te afe o tausaga ki a koe e pau eiloa mo se aso e tasi;

E pela mo te aso anafi tela ko teka atu,

E pela eiloa me se itula toetoe o te po.

5E ave ne koe matou keatea e pela mo ne mea e tapea i se lofiaga.

E toetoe atu te motou ola i lo te moemiti.

E pau matou me ne mouku e olaola ake i te taeao,

6E 'tupu ake kae matala olotou pula,

E mage'mage ko 'mate ei i te afiafi.

7Ko fakamaseigina matou i tou kaitaua;

Ko ma'taku foki matou i tou ita lasi.

8Ko i ou mua omotou agasala,

E matea foki ne koe omotou agasala 'funa.

9Ko fakatoetoe omotou ola ne tou ita;

E palele atu foki omotou ola e pela me se musumusuga.

10E fitu sefulu tausaga e mafai o ola matou i ei,

Kae kafai e tumau te malosi, e oko ki te valu sefulu;

Kae i taimi kona ko iai te fanoanoa mo te puapuaga;

Ko pili o palele te olaga, ko te mea eiloa ko oti atu.

11Ko oi e iloa ne ia te malosi katoatoa o tou ita?

Ko oi foki e iloa ne ia te fakamataku manafai e oko mai tou kaitaua lasi?

12Akoako mai ke iloa ne matou me toetoe fua te olaga;

Ko te mea ke iloa ne matou.

13Te Aliki, e gata afea tou ita?

14Fakafonu ake matou ki tou alofa tumau i taeao takitasi,

Ko te mea ke usu pese matou mo te fiafia i aso katoa o omotou olaga.

15Tuku mai ki a matou se fiafiaga lasi, e pela mo tau tukumaiga ki a matou te fanoanoa,

i tausaga katoa kola ne puapuagatia ei matou.

16Fakaasi mai au galuega 'mana ki au tavini;

Ke matea foki ne motou fanau tou mana malosi.

17Te Aliki te motou Atua, ke i a matou tau fakamanuiaga.

Tuku mai te fakamanuiaga ki mea katoa a matou e fai!