1 NOFOAIGA TUPU 12 - Tuvalu Revised Bible

Ko Tino Muamua eiloa i te Matakaiga o Peniamina kola ne kau i a Tavita

1I te taimi ne nofo ei a Tavita i Sikilaka, te koga ne tele a ia ki ei ke sao a ia mai i a Saulo, kae ne kau atu ki a ia a sotia e tokouke, ne sotia atamai kae masani,

2ne tino i te matakaiga o Peniamina; a Saulo se tino i te matakaiga tena. E mafai ne latou o sana a matasana mo fatu ki lima fakaatamai io me ko fakamaui o latou.

3-7A latou e i lalo o te pulega a Aiesa, mo Ioasa, ko tama kona a Sema mai i Kipea.

Konei a igoa o sotia kona:

Iesielu mo Peleti, tama tagata a Asimaveta

Pelaka mo Ieu mai Anatota

Isimaia mai Kipeona, se sotia takutakua, kae se takitaki o “Te Tinotolu ”

Ielemia, Iasielu, Ioananu mo Iosapata, mai i Ketala

Elusai, Ielumota, Pealia, Semalia, mo Sefatia mai i Halifa

Elekana, Isia, Asalelu, Ioesela, mo Iasopeamo, mai te kaukaiga o Kola

Ioela mo Sepatia, tama tagata a Ielohama, mai i Ketoa.

Ko Tino i te Matakaiga o Kato kola e Kau i a Tavita

8Konei a igoa o sotia takutakua kae atamai mai i te matakaiga o Kato kola ne kau i te kautau a Tavita i te taimi ne nofo ei a ia i te fa'kai fakaolo i te vao. A latou ne tagata ko masani i te fakaaogaga o talita mo tao; ne tagata e pela mo leona i te fakamataku kae vave pela me ne tia o mauga.

9-13Konei olotou igoa, mai i te tino maluga o fanaifo ki lalo: ko Eseli, Opetaia, Eliapo, Misimana, Ielemia, Atai, Elielu, Ioanani, Elisapata, Ielemia mo Makapani.

14A nisi tagata i te kau kona, mai i te matakaiga o Kato, ne ofisa maluga kola e takitaki i kautau e taki tokoafe tagata i ei; a nisi tagata ne ofisa tai malalo kola e takitaki i kautau e taki tokoselau tagata i ei.

15I te masina muamua o te tausaga e tasi, i te taimi e lofia ei te vaitafe o te Iolitana kae ulu atu latou o ta valevale a tino kola e nofo i vanu, i te feitu ki te saegala pela foki te feitu ki te togala.

Ko Tino mai Matakaiga o Peniamina mo Iuta

16I te aso e tasi, e isi se potukau tagata mai i matakaiga o Peniamina mo Iuta ne olo atu ki te fa'kai fakaolo tela e nofo ei Tavita.

17Ne fanatu a Tavita o fakafetaui ki a latou, kae fai atu penei, “Kafai koutou e o'mai i se feitu fakataugasoa o fesoasoani mai ki a au, a koutou e talia ne au mo te fiafia ke kau i a matou! Kae kafai e taumafai koutou o fakatogafiti au ke maua au ne oku fili, e ui eiloa e seki fakapakia ne au koutou, ka ko te Atua o omotou tupuga ka iloa ne ia te otou mea e taumafai o fai, kae fakasala foki ne ia koutou.”

18Ne ulufia ne te agaga o te Atua a te tagata e tokotasi o latou e igoa ki a Amasai, tela ne fai mo takitaki o te “Tinotolu” fakamuli ifo, tena ne kalaga ei a ia penei,

“Tavita te tama a Iese, matou e kau i a koe!

Ke manuia koe mo tino e fesoasoani ki a koe!

A te Atua e kau atu i a koe. ”

Ne talia faka'lei ne Tavita a latou, kae fai ne ia mo ofisa i tena kautau.

Ko Tagata mai i te Matakaiga o Manase

19E isi ne sotia mai i te matakaiga o Manase ne olo o 'kau i a Tavita, i te taimi ne fanatu ei a ia i te kau Filisitia o taua ki te Tupu ko Saulo. A Tavita ne seki fesoasoani ki te kau Filisitia, me i tupu o Filisitia e se talitonu ki a ia, i a latou ma fakatogafiti ei ne ia ke po latou ne Saulo, tena la, ne uga ei ne latou a Tavita ke foki ki Sikilaka.

20Konei a igoa o sotia ne olo atu o kau i a Tavita i te taimi ne foki ei a ia: Atina, Iosapata, Ietiaelu, Mikaeli, Iosapata, Eliu, mo Siletai. A latou katoa kona ko oti ne takitaki i taki tokoafe i Manase.

21Ne fai latou mo ofisa i te kautau a Tavita, me i a latou ne sotia ko iloga. Fakamuli ifo, ne fai foki latou mo ofisa i te kautau a Isalaelu.

22Toe itiiti eiloa kae tofu te aso mo tino e solo mai o kau i a Tavita, tela la, ko oko eiloa i te vave tokouke o te kautau a Tavita.

Ko Kautau a Tavita

23-37I te taimi ne nofo ei a Tavita i Hepelona, e tokouke eiloa a sotia masani ne kau atu ki tena kautau, o fesoasoani ki te fakasopoga o Tavita ke fai mo tupu, o sui a Saulo, e pela eiloa mo te tautoga a te Aliki. Konei a aofaki o latou:

Iuta, 6,800 tagata ko toka mo meatau, e tofu mo talita mo tao.

Simeona: 7,100 tagata ko oti ne fakamasani faka'lei;

Levi 4,600 tagata;

Tino e kau i a Ieoiata, tino i te gafa o Alona, e 3,700 tagata;

Matakaiga o Satoka, se tamataene atamai i te taua: 22 takitaki tagata;

Peniamina (Ne tino o te matakaiga o Saulo): 3,000 tagata, a te tokoukega o tino i te matakaiga o Peniamina ne tumau eiloa te lotou fakamaoni ki a Saulo); 3,000 tagata (a te tokoukega o tino i te matakaiga tena ne tumau loa te olotou fakamaoni ki a Saulo);

Efalaima: 20,800 tagata ko iloga i olotou kaukaiga;

Manase i te Togala: 18,000 tagata kola ne fili ke olo o fakasopo Tavita ke fai mo tupu;

Isakala: 200 takitaki, fakatasi mo tino e pule ne takitaki i kona. A takitaki kona e iloa ne latou te mea e tau o fai ne Isalaelu, mo te taimi lei e tau o fai ei;

Sepulona: 50,000 tagata masani kae fakamaoni, kae ko oti ne fakamasani faka'lei i te fakaaoga o meatau valevale;

Nafatali: 1,000 takitaki, fakatasi mo te 37,000 tagata e tofu mo talita mo tao;

Tanu: 28,600 tagata masani;

Asela: 40,000 tagata ko toka mo taua;

Ko matakaiga i te saegala o te Iolitana — Leupena, Kato, mo Manase i te Saegala: 120,000 tagata ko oti ne fakamasani ki te fakaaogaga o meatau valevale.

38A sotia katoa kona, ko toka katoa mo se taua, ne olo ki Hepelona, mo te fakamoemoega ke fai ne latou a Tavita mo tupu o Isalaelu. A tino katoa o Isalaelu e kau fakatasi katoa i te manatu tena.

39Ne nofo tasi latou mo Tavita i kona i aso e tolu o kai kae inu i mea ne fakatoka ne olotou tino mo latou.

40E ui eiloa i te mao ki matu o matakaiga o Isakala, Sepulona, mo Nafatali, ka ko olotou tino ne o'mai eiloa mo asini, kamela, miula mo pulumakau ne fakauta ki meakai — falaoa, mati, lesini, uaina mo sinu olive. Ne aumai foki ne latou a pulumakau mo mamoe o tamate ke kai. A faiga katoa kona, ko te fakaasiga o te fiafia o tino katoa i te fenua katoa.