1 TIMOTEO 1 - Tuvalu Revised Bible

1Mai i au Paulo, se apositolo a Keliso Iesu i te fakatonuga a te Atua te tou Fakaola mo Keliso Iesu te tou fakamoemoega -

2 Galu 16.1 Ki a Timoteo, ko taku tama tonu i te fakatuanaki:

Ke i a koe te alofa tauanoa, te alofa 'nau mo te filemu mai te Atua te Tamana mo Keliso Iesu te tou Aliki.

Ko Polopolokiga ki Akoakoga 'Se

3Au e loto ke nofo koe i Efeso, e pela eiloa mo taku fakatagiatuga ki a koe i toku auala ki Maketonia. E isi ne tino i kona e akoako ne latou talitonuga 'se, kae 'tau mo koe o fakatonu atu latou ke gata te lotou akoako atu pena.

4Fai ki ei ke tiakina tala 'kai mo tala i gafa, me fakatupu ne mea kona te finauga; e se fai foki ne latou a fuafuaga a te Atua, kola e iloa i te fakatuanaki.

5A te uiga tonu o te fakatonuga tenei, ke fakatupu ne ia te alofa tela e maua mai i te loto 'ma, i te mafaufau 'lei mo te fakatuanaki fakamaoni.

6E isi ne tino ko 'fuli keatea mai mea konei, faka'segina ei foki latou ne faipatiga va'lea kona.

7E ma'nako latou ke fai mo faiakoga o tulafono a te Atua, kae se malamalama i a latou a mea kola e fai'pati ki ei, mo mea kola e kinau malosi ki ei.

8E iloa ne tatou me 'lei te Tulafono, manafai e fakaaoga faka'lei.

9Se mea e 'tau o masaua ne tatou, me i tulafono e seki fai mō tino 'lei, kae mō tino ofa tulafono mo tino masei, mo tino e seai ne olotou atua mo tino agasala, mo tino se fina lotu io me se ola faka te agaga, mo tino kola ne tamate ne latou olotou tamana mo olotou matua, mo tino tatino,

10mo tino fina lalolagi, mo tino e amio fakasotoma, mo tino e kaisoa tino, mo tino 'loi kola e fai molimau se tonu, io me ko tino foki kola e fai ne latou nisi amioga e 'teke ki te akoakoga tonu.

11Tena te akoakoga e maua i te tala 'lei ne tuku mai ki a au ke folafola atu ne au, ko te Tala 'Lei o te 'malu o te Atua manuia.

Ko te Loto Fakafetai ki te Alofa 'Nau o te Atua

12Au e fakafetai ki a Keliso Iesu te tou Aliki, me ko ia ne tuku mai ne ia te malosi ki a au mō taku galuega. Au e fakafetai ki a ia mō te fakaaoga ne ia a au, i te tofi ne ia a au o tavini ki a ia,

13Galu 8.3; 9.4,5kae e ui eiloa i toku faipati 'teke ki a ia, mo toku fakasaua kae muna masei foki ki a ia, kae 'nau mai eiloa te alofa o te Atua ki a au, i te mea i a au ne se talitonu ki a Iesu, kae ne fai foki ne au aku mea mo toku se malamalama.

14Ka ko te tou Aliki, ne fakamaligi ifo fakaasi ne ia tona alofa tauanoa ki luga i a au, kae tuku mai ne ia te fakatuanaki mo te alofa, e i a Keliso Iesu.

15Ko te muna tonu eiloa tenei, ke talia mo te loto katoatoa kae ke talitonu foki ki ei: a Keliso Iesu ne vau ki te lalolagi o fakaola a tino agasala, ka ko au te tino tafa sili i te masei i a latou,

16kae tenei eiloa te pogai tonu ne 'nau mai ei te alofa o te Atua ki a au, ko te mea ke fakaasi mai ne Keliso Iesu tona kufaki katoatoa i ana faiga ki a au, ko te tino agasala e tafa sili i te masei, ke fai mo fakaakoakoga ki a latou kola ka talitonu fakamuli ki a ia, kae maua ne latou te ola se gata mai.

17Ke i te Tupu o te se gata mai, tela e ola faeloa, kae se mafai foki o matea, ko te Atua eiloa e tokotasi, ke i a ia te 'malu mo te vikiga ki te se gata mai, ki te se gata mai eiloa! Amene.

18Taku tama ko Timoteo i te fakatuanaki, ko tuku atu ne au ki a koe te fakatonuga tenei, e tusa eiloa mo muna fakapelofeta ne faipatigina mō koe i aso ko teka. Ke fai a muna kona mo meatau a koe, ka koi taua koe i te taua 'lei,

19kae tausi foki tou fakatuanaki mo tou mafaufau 'lei. E isi ne tino ko se faka'logo ki olotou mafaufauga 'lei, ka ko fakamasei ne latou te lotou fakatuanaki.

20E iai mai i a latou kona a Humenio mo Alesana, kola ko oti ne tuku ne au a laua ki te mana o Satani, ko te mea ke fakagata te la faipati fakamasei ki te Atua.