1 SAMUELU 6 - Tuvalu Revised Bible

Ko te Fakafokiga o te Pusa o te Feagaiga

1Ko tusa nei mo te fitu masina o te Pusa o te Feagaiga a te Aliki i Filisitia.

2Ne olo atu a tino Filisitia o ka'laga ki faitaulaga mo tino fakataulaitu, kae fesili atu ki a latou penei, “Se a te mea e tau nei o fai ne matou ki te Pusa o te Feagaiga a te Aliki? Kafai e fakafoki nei ne tatou ki te koga ne aumai i ei ne a mea e tau o ave fakatasi mo ia?”

3Ne tali atu latou kona penei, “Kafai ko fakafoki ne koutou a te Pusa o te Feagaiga a te Atua o Isalaelu, e tau o ave foki ne koutou se meaalofa ki a ia, e togi ei otou agasala. A te Pusa o te Feagaiga e se tau o fakafoki kae seai se meaalofa e ave i ei. Kafai e isi se meaalofa e ave i ei, ko te mea ka 'lei otou masaki, kae ka iloa foki ei ne koutou te ala e fakasala soko ei ne ia koutou.”

4Ne fesili atu a tino penei, “Se a te meaalofa e tau o ave ne matou ki a ia?”

Ne tali atu a faitaulaga mo tino fakataulaitu penei, “E lima aulo e faite pela me ne mea faka'fua, kae e lima kimoa aulo, e tofu katoa a tupu o Filisitia kola e tokolima mo te mea faka'fua aulo e tasi mo te kimoa aulo e tasi. Se famai eiloa e tasi tela ne poko i a koutou katoa pela foki te toko lima tupu.

5E tau o fai ne koutou a fakatusa o mea faka'fua mo kimoa kona e fakamasei ne latou te otou fenua, kae masaua o avatu se fakaaloaloga ki te Atua o Isalaelu. Se taumate ka fakagata tena fakasalaga ki a koutou mo otou atua mo te otou fenua.

6Ai a e loto ma'keke ei koutou e pela mo te tupu o Aikupito mo tino Aikupito? Masaua a mea fakaofoofogia ne fai ne ia ke oko ki te taimi ne tiaki ei ne tino Isalaelu te fenua o Aikupito.

7Fakatoka ne ka e lua, mo se ava pulumakau kola e seki fakagalue eiloa; sai atu a pulumakau kona ki te ka, kae fakafoki atu a la tamā pulumakau ki te sai pulumakau.

8Puke mai te Pusa o te Feagaiga a te Aliki o tuku ki luga i te ka, kae tuku atu i ona tafa a te pokisi tela e tuku ei a fakatusa aulo, kola ko otou meaalofa ki a ia mo togi ei otou agasala. Fakatele atu te ka, ko tuku ei ke fano eiloa i a ia.

9Kilokilo faka'lei ki ei; kafai e fano ki te fa'kai o Peta Semese, ko tena uiga, ko te Atua o Isalaelu ne aumai ne ia te puapuaga ki a tatou. Kafai e se fano ki Peta Semese, ko iloa ei ne tatou me e se ko te Atua o Isalaelu ne aumai ne ia te mala; ka ko te mea eiloa ko oko ki tena taimi e tau ei o poko.”

10Tena ne fai eiloa ne tino kona a te mea ne fai atu ki a latou: ne puke atu latou ki pulumakau e lua, sai atu ki te ka, kae ave a tamā pulumakau ki te sai pulumakau.

11Ne fakasopo atu ne latou te Pusa o te Feagaiga ki te ka, fakatasi mo te pokisi tela e tuku ei a fakatusa aulo o kimoa mo mea faka'fua.

12Ne olo atu a pulumakau i te auala ki Peta Semese, olo tonu eiloa ki ei. Ne tagitagi sale eiloa pulumakau i te auala. Ne tautali atu eiloa i ei a tupu o Filisitia kola e tokolima, ke oko eiloa ki te tuakoi o Peta Semese.

13A tino o te fa'kai o Peta Semese e kati saito i te vanu, kae e poi eiloa i te okoatuga o te Pusa o te Feagaiga. Ko oko eiloa i olotou fia'fia i te laveaga ne latou.

14Ne oko atu te ka ki te laukele o te tagata e igoa ki a Iosua, tela e nofo i Peta Semese, te mea eiloa ko gata i kona, i tafa o te kaupapa lasi. Ne katikati ne tino Peta Semese te ka lakau, kae tamate a pulumakau ke ofo atu ke fai mo taulaga sunu ki te Aliki.

15Ne amo ifo ne te kau sa Levi a te Pusa o te Feagaiga a te Aliki, pela foki te pokisi tela e tuku ei a fakatusa aulo, tuku atu ei ne latou ki luga i te kaupapa lasi. Tena, ne ofo atu ei a taulaga sunu a tino Peta Semese, fakatasi mo nisi taulaga.

16Ne kilokilo atu eiloa a te tokolima tupu o Filisitia ki mea a tino Peta Semese e fai, oti aka foki atu ei latou ki Ekelona i te aso eiloa tena.

17Ne Avatu ne tino Filisitia a mea faka'fua aulo kola e lima ki te Aliki e fai mo meaalofa e togi ei olotou agasala, e takitasi mo fa'kai konei: Asetota, Kasa, Asekelona, Kata mo Ekelona.

18Ne avatu foki ne latou e lima kimoa aulo, e takitasi i fa'kai kola e pule ei a tupu kona e tokolima, fakatasi mo fa'kai foliki kae isi ne olo, mo fa'kai foliki e seai ne olo. A te kaupapa lasi i te laukele o Iosua, te tagata Peta Semese, tela ne tuku ei te Pusa o te Feagaiga a te Aliki, koi tu mai eiloa i kona e fai mo molimau ki te mea tena ne tupu.

19Ne tamate ne te Aliki e tinofitu tagata Peta Semese me ne kilo ki loto i te Pusa o te Feagaiga. Tena ne tagi fanoanoa ei a tino i te tamatega tenei ne te Aliki a olotou tino.

Ko te Pusa o te Feagaiga i Kiliata Iealima

20Tena ne fai atu ei a tagata o Peta Semese penei, “Ko oi te tino e mafai o tu i mua o te Aliki, te Atua Tapu? Tefea te koga e tau o ave ki ei ke galo atu mai i a tatou?”

21Ne uga ne latou a avefekau ki tino Kiliata Iealima mo te fekau tenei: “Ko oti ne fakafoki mai ne tino Filisitia a te Pusa o te Feagaiga a te Aliki. O'mai o puke atu.”