2 NOFOAIGA TUPU 34 - Tuvalu Revised Bible

Ko Iosia te Tupu o Iuta(2Tupu 22.1-2)

1 Iele 3.6 A Iosia ne fai mo tupu o Iuta, ka ko valu ei ona tausaga. Ne nofo a Ia i te nofoagaaliki i Ielusalema i tausaga e tolusefulu tasi.

2Ne fai ne ia a mea e fiafia ki ei te Aliki; ne tautali a ia i auala o tena tupuga ko Tavita, me ne tausi fakamaoni eiloa a ia ki tulafono katoa a te Atua.

Ko Teke ne Iosia a Tapuakiga Fapaupau

3I te valu o tausaga o te nofoaiga a Iosia, koi tamaliki eiloa a ia, ne kamata ei a ia o tapuaki atu ki te Atua o tena tupuga ko Tavita te Tupu. E fa tausaga mai tua ifo kae kamata o ofa ne ia a koga tapuaki fapaupau, fakatusa o te atua fafine ko Asaila, mo nisi tupua aka katoa.

42Tupu 21.3; 2NTupu 33.3 Mai i tena fakatonuga, ne ofa ei ne tena kau a fata-fai-taulaga kola e fai i ei a tapuakiga ki a Paala, kae ofa ki lalo a fata-fai-taulaga kola e pili ki ei, kola e sunu sale i ei a mea manogi. Ne tukipala ne latou ke liu lefu a fakatusa o Asaila, mo nisi tupua katoa, kae fakasalalau atu a te lefu o tupua kona i luga i tanuga o tino ne ofo taulaga sale ki ei.

51Tupu 13.2 Ne sunu ne ia a ivi o faitaulaga fapaupau kona, i luga o fata-fai-taulaga kona e fai ei olotou tapuakiga. I te faiga tena, ko toe faka'ma ne ia a Iuta mo Ielusalema, ke ma i feitu faka‐tapuakiga.

6E pena foki eiloa tena mea ne fai i fa'kai, mo koga ko maofa i Manase, Efalaima mo Simeona, ke oko atu foki eiloa ki Nafatali i matu.

7Ne ofa foki ne ia a fata-fai-taulaga mo fakatusa o Asaila i te malo ki matu. Ne tuki ne ia ke liu lefu a tupua kona, kae ofa likiliki a fata-fai-taulaga sunu mea manogi katoa. Oti aka, foki ei a ia ki Ielusalema

Ko Maua te Tusi o te Tulafono(2Tupu 22.3-20)

8I te sefuluvalu o tausaga o te nofoaiga a Iosia, ka ko ma ei te fenua mo te Faletapu i feitu fakatapuakiga, me ko oti ne ofa ne ia a koga tapuaki fapaupau katoa. Ne uga ne Iosia e tokotolu tagata ke toe faite fakalei a mea ne masei o te Faletapu o te Aliki te Atua: ko Safana te tama tagata a Asalia, ko Maseia te kovana o Ielusalema mo Ioa te tama tagata a Ioase se ofisa maluga eiloa.

9A te tupe tela ne maua ne te kau sa Levi kola e tiute, i te Faletapu, ne avatu ki a Hilikia, te Faitaulaga Sili. A te tupe tena ne maua mai mai tino Efalaima mo Manase, mo te Malo ki Matu, pela foki mai i tino o Iuta, Peniamina, mo Ielusalema.

10Ne avatu te tupe tena ki te tokotolu kola e pule i te toe faitega o mea masei o te Faletapu, kae ne avatu ne latou

11ki kamuta mo tino faka'tutu fale, ke togi mai a fatu mo laupapa kola e fakaaoga mo faite a mea o te Faletapu, te Faletapu tela ne tiakina ne tupu o Iuta ke pala.

12A tagata kola ne fai ne latou a te galuega, ne tagata fakamaoni. E tokofa sa Levi e takitaki i te kau kona e fai ne latou a te galuega: ko Iaata mo Opetaia mai i te kaukaiga o Melali, mo Sakalia mo Mesulama mai i te kaukaiga o Koate. A sa Levi kona ne tagata poto i mea fakatagitagi.

13A nisi sa Levi e onoono ki te aumaiaga o mea mo te galuega, mo te takitakiga o te kau galue i olotou galuega kesekese, ka ko nisi ne fakamau a tala o mea fai, io me e tiute i mataloa.

14I te taimi ne puke mai ei te tupe ki tua mo te potu teu koloa, kae maua ei ne Hilikia a te tusi o te Tulafono a te Aliki, ko te Tulafono tela ne aumai ne te Atua ki a Mose.

15Muna a Hilikia ki a Safana, “Ko maua ne au a te tusi o te Tulafono i konei i te Faletapu.” Ne tuku atu ne ia a te tusi ki a Safana,

16kae ave ne Safana ki te tupu. Ne fai atu a Safana ki te tupu: “Ko oti ne fai ne matou a mea katoa kola ne fakatonu mai koe ke fai ne matou.

17Ko oti ne puke ne matou a te tupe tela e teu i te Faletapu o ave ki te kau galue o te Faletapu, mo te kau kola e fakatonutonu ne latou a galuega.”

18Ne toe fakaopoopo atu mo ana muna penei, “E isi se tusi tenei ne aumai ne Hilikia ki a au.” Tena ne faitau atu ei ne ia te tusi tena mo te leo maluga ki te tupu.

19I te lagonaga ne te tupu a muna mai i te tusi, ne saesae ona gatu i te fanoanoa,

20kae fai atu tena fakatonuga ki a Hilikia, mo Aikamo te tama tagata a Safana, mo Apatonu te tama tagata a Mikaia, Safana te failautusi o te fono, mo Asaia te tavini a te tupu. E penei te fakatonuga:

21“A koutou ko fai mo sui o oku mo tino o te fenua konei koi toe mai i Isalaelu mo Iuta ke olo koutou o fakafesili te Aliki. Sili atu e uiga ki akoakoga i te tusi tenei. A te Aliki ko kaitaua ki a tatou me i 'tou tupuga ne seki tausi ki te muna a te Aliki, kae seki fai foki ne tatou a mea e fai mai i te tusi tenei.”

22Tena la, mai i te fakatonuga a te tupu, tena ne olo atu ei a Hilikia mo tena kau o fakafesili te fafine e igoa ki a Hulita, se pelofeta tela e nofo i te fa'kai fou o Ielusalema. A tena avaga ko Saluma, te tama tagata a Tikeva, kae ko te mokopuna o Halasa, e tausi ne ia a gatu loa o te Faletapu. Ne fakamatala atu ne latou a te mea ne o'mai ei latou,

23kae ne fai atu a ia ki a latou ke foki ki te tupu kae fai atu ki ei a te fekau mai i te Aliki penei:

24“Ka fakasala ne au a Ielusalema mo tino katoa i ei, ki fakamalaiaga kola e tusi i te tusi tena ne faitau atu ki te tupu.

25Ne teke mai latou ki a au, kae ne ofo foki olotou taulaga ki nisi atua, tena ko fakaoso ei ne latou toku kaitaua i olotou mea katoa ne fai. Au ko oko eiloa i te kaitaua ki Ielusalema, kae ka se mafai eiloa o gata toku kaitaua.

26Kae tenei la taku fekau ki te tupu: Ne fakalogologo koe ki muna e fai mai i te tusi,

27kae ne salamo koe. Ne fakamalalo koe i oku mua, o tagi kae saesae ou gatu, i tau logoga i a au ko fakatoka o fakasala Ielusalema mo ona tino. Ko oti ne lagona ne au tau talo,

28tela la, a te fakasalaga o Ielusalema ka se oko mai i te taimi nei, vagana ke oti ne mate atu koe. Ka tuku ne au a koe ke mate mo te filemu.”

Tena te fekau ne foki mai mo tagata kona ki a Iosia.

Ko te Feagaiga ke Fakalogo ki te Aliki(2Tupu 23.1-20)

29Ne fakamaopoopo ne te Tupu ko Iosia a takitaki katoa o Iuta mo Ielusalema,

30tena, olo fakatasi ei latou ki te Faletapu, fakatasi mo faitaulaga, te kau sa Levi, mo tino katoa, tino maumea mo tino mativa. Ne faitau atu ne te tupu i te leo maluga a te tusi o te feagaiga, tela ne maua i te Faletapu.

31Ne tu a ia i pou o tupu, kae fai tena feagaiga ki te Aliki me ka fakalogo a ia o tausi ana tulafono mo fakatonuga mo tena loto mo tena agaga katoa, kae fai a mea e tusi i te tusi o te feagaiga.

32Ne fai ne ia a tino Peniamina mo tino katoa i kona, i Ielusalema, ke tauto o tausi a te feagaiga. Tena la, ne fakalogo eiloa a tino Ielusalema o fai a mea e manakogia i te feagaiga tena ne fai ne latou mo te Atua o olotou tupuga.

33Ne ofa ne te Tupu ko Iosia a tupua fakatakalialia katoa i te kogā laukele o te kau Isalaelu. A Iosia ne taumafai ki tino ke tumau te lotou tavini ki te Aliki, te Atua o olotou tupuga, i aso ne ola ei a ia.