1 SAMUELU 7 - Tuvalu Revised Bible

1 2Samu 6.2-4; 1NTupu 13.5-7 Tena ne o'mai ei a tino Kiliata Iealima o puke atu te Pusa o te Feagaiga a te Aliki, ave ei ne latou ki te fale o te tagata e igoa ki a Apinatapu, tela e nofo i luga i te mauga foliki. Ne tofi ne latou tena tama tagata ko Eleasalo ke tausi ne ia te Pusa o te Feagaiga.

Samuel ko Takitaki i Isalaelu

2A te Pusa o te Feagaiga a te Aliki ne tuku eiloa i Kiliata Iealima i se taimi leva, kaati se luasefulu tausaga. I te taimi tenei, a tino Isalaelu e tagi sale ki te Aliki mo se fesoasoani.

3Muna a Samuelu ki tino Isalaelu, “Kafai ko mafaufau koutou o fuli atu ki te Aliki mo otou loto katoa, e tau o pei keatea mua ne koutou a atua fakaatea katoa, pela foki mo fakatusa o te atua ko Asitate. Tuku katoatoa atu otou loto ki te Aliki, kae tavini atu ki a ia fua tokotasi, kae ka fakasao ne ia koutou mai te malosi o tino Filisitia.”

4Tena, ne pei keatea ei ne tino Isalaelu a fakatusa o te atua ko Paala mo Asitate, kae tapuaki atu ki te Aliki tokotasi.

5Ne ave te fekau a Samuelu ki tino Isalaelu katoa ke maopoopo i Mesepa, mo tena pati ke talo a ia mo latou i kona.

6Tena, ne maopoopo katoa ei latou i Mesepa. Ne asu aka ne latou ne vai o ligi ki tua e fai mo taulaga ki te Aliki, kae ne fakalikiliki foki latou i te aso katoa tena. Ne fai aka mo olotou pati penei “A matou ko agasala ki te Aliki.” Ko te fa'kai tena o Mesepa ne fakamasino ei ne Samuelu a kinauga a tino Isalaelu.

7I te 'logoga o tino Filisitia i tino Isalaelu ko maopoopo i Mesepa, ne olo atu ei te tokolima tupu o Filisitia mo olotou kau o taua ki tino Isalaelu. Ne logo tino Isalaelu i te taua ko fanatu, tena ne mataku ei latou,

8kae fai atu ki a Samuelu penei, “Talo atu eiloa ki te Aliki te motou Atua ke fakasao mai matou mai i tino Filisitia.”

9Ne ta ne Samuelu se tamā mamoe kae sunu katoa ke fai mo taulaga ki te Aliki. Tena, talo atu ei a ia ki te Aliki ke fesoasoani mai ki Isalaelu, kae ne talia ne te Aliki tena talo.

10I te taimi ne ofo ei ne Samuelu te taulaga, ka ko tino Filisitia ko mai o taua ki tino Isalaelu; i kona foki eiloa, ko te Aliki eiloa ko fakapapa mai ana fatili mai te lagi ki te kau Filisitia, tena ne mataku valevale ei te kau Filisitia, kae 'tele.

11Ne olo atu te kau Isalaelu mai Mesepa, o afuli atu te kau Filisitia ke oko atu eiloa ki Peteka, kae ne 'ta atu eiloa ne latou i te auala.

12Ne puke aka ne Samuelu te fatu o toki i te va o Mesepa mo Sena, kae fai aka mo tena pati penei, “A te Aliki ne fesoasoani mai ki a matou,” fakaigoa ei ne ia te fatu tena, “Te Fatu o Fesoasoani.”

13Tena ne takavale ei te kau Filisitia, kae ne taofi latou ne te Aliki ke se toe olo o taua ki Isalaelu i aso e ola ei Samuelu.

14A fa'kai lasi katoa kola ne 'fao malo ne Filisitia i te va o Ekelona mo Kata ne toe faka'foki katoa ki Isalaelu tena ne toe 'foki mai ei a laukele o Isalaelu ki tino Isalaelu. Ne nofo filemu foki ei a tino Isalaelu mo tino Kanana.

15A Isalaelu ne takitaki ne Samuelu i aso ne ola ei a ia.

16I tausaga takitasi, e masani sale a ia o fano ki Peteli, Kilikala mo Mesepa, o fai se ikuga 'lei ki kinauga kona e tupu i kona.

17Ka oti ko toe foki atu ei a ia ki tena fale i Lama, o toe nofo i tena tulaga famasino. I te fa'kai tena o Lama, ne faite ei ne ia se fata-fai-taulaga e ofo atu ei ana taulaga ki te Aliki.