1Nei, se mea e se aoga toku tusi atu ki a koutou e uiga ki otou meaalofa mō kelisiano i Iutaia.
2Me iloa ne au i a koutou e loto fia'fia o fesoasoani ki a latou, tela e fakamatamata sale ei au e uiga ki a koutou ki tino Maketonia kae ne fai foki au ki a latou me i kelisiano Eleni ko leva eiloa ne toka talu mai te tausaga ne teka atu. Ka ko fai te otou loto toaga mo mea e ga'sue ei a loto o te tokoukega o latou.
3Ka ko uga atu eiloa ne au a taina kelisiano konei, o fakatalitonu me i aku muna tavae e uiga ki a koutou, e tonu faeloa.
4I te mea mana olo atu ei matou mo nisi tino Maketonia, kae maua ake ei ne matou i a koutou e se toka o fesoasoani, ko tae'ma matou i ei e pena foki koutou!
5Tela la, ne manatu au me se mea 'tau o fakamalosi a taina konei ka olo atu, ke 'mua atu i a au, ke na fakatoka te meaalofa tela ne fai feagaiga koutou ki ei, me fai ne koutou; ko te mea ke toka i te taimi e oko atu ei au, kae ke iloga foki me se meaalofa eiloa ne fai i te loto lagona tonu o fia tuku atu, kae se se mea ne fakamalosi ke fai.
6Tenei te pogai o te manatu: ko te tino tela e mu'tana ana fuaga ne toki, ka mu'tana foki ana fuataga e maua; ka ko te tino tela e uke ana fuaga ne toki, ka uke foki ana fuataga e maua.
7A tino takitokotasi e 'tau eiloa o fai a te mea tela ko iku i tena mafaufau ke fai; e se i te loto se malie io me ko te fai malo, me i te Atua e fiafia ki te tino tela e tuku ana mea mo te loto malie.
8Ka ko te Atua e mafai faeloa o tuku atu ne ia ki a koutou a fakamanuiaga e sili atu i mea e manako koutou ki ei, ko te mea ke maua a mea e ma'nako koutou ki ei, kola ka aoga malosi mo te faiga o galuega 'lei katoa.
9Sala 112.9 E pela mo muna a te Tusi,
“E lasi tena alofa o tuku atu mea ki tino mativa,
A tona alofa kaimalie foki, e tumau ki te se gata mai.”
10 Isa 55.10 A te Atua tela e tuku atu ne ia fuaga ki te tino toki lakau mo meakai ke 'kai ei tatou, ka tuku atu ne ia, kae fakauke foki ne ia te otou maumea i fuaga ka toki, kae toe fakauke foki ne ia a fua o te otou alofa.
11Ka fakamaumeagina koutou i ala kesekese, ko te mea ke lasi te otou alofa kaimalie i taimi katoa, ko te mea ke tokouke e fakafetai atu ki te Atua ona ko te meaalofa ne avatu ne matou.
12A te otou galuega alofa mo kelisiano i Iutaia, e se gata fua tona fesoasoani ki mea kola e ma'nako ki ei latou, kae ne fakatupu foki ne ia te loto fia fakafetai o tino tokouke ki te Atua.
13Ona ko fakamaoniga ne aumai i te otou galuega tenei ne fai, ka tokouke ka 'viki ki te Atua mo te otou fakamaoni i te 'tala 'lei i a Keliso, tela e takutaku atu ne koutou, pela foki mo te otou alofa kaimalie o fesoasoani ki a latou, mo nisi tino katoa.
14Tela la, ne 'talo latou mō koutou i te loto alofa, ona ko te lasi o te alofa tauanoa o te Atua ne fakaasi ki a koutou.
15Ke fakafetai tatou ki te Atua mo tena meaalofa e se mafai o fakamatalagina!
Who We AreWhat We EelieveWhat We Do
2025 by iamachristian.org,Inc All rights reserved.
