1Ne fakatonu ne te Tupu ko Tavita a ofisa katoa o Isalaelu ke maopoopo atu katoa ki Ielusalema. Ne maopoopo mai katoa ki Ielusalema a ofisa o matakaiga, ko ofisa kola e pulepule ne latou a galuega o te malo, ko takitaki o kaukaiga, ko tino e pulepule ne latou a tofi o te tupu, mo manu tausi katoa a ia mo ana tama tagata, ko ofisa katoa o te palesi, ko sotia ko iloga, mo tagata tāua katoa.
2 2Samu 7.1-16; 1NTupu 17.1-14 Ne tu atu Tavita i olotou mua, kae faipati atu ki a latou, ana muna: “Tagata o toku fenua, fakalogo mai ki a au. Au e manako o faite se fale tumau mō te Pusa o te Feagaiga, te nofoaga o te Aliki te tou Atua. Ko oti ne fakatoka ne au a mea mo faite se faletapu e fakaaloalo ei a ia,
3kae ne seki talia ne ia ke fai ne au, me i a au se sotia kae ko lasi foki te fakamaligi toto ko oti ne fai ne au.
4A te Aliki te Atua o Isalaelu, ne filifili ne ia a au mo tino i toku gafa ke pule i luga i Isalaelu ki te se gata mai. Ne fili ne ia a te matakaiga o Iuta ke maua mai sale i ei a takitaki; ne fili ne ia a te kaiga o toku tamana mai i te matakaiga o Iuta. Mai i te kaiga tena, ne fili ei ne ia a au kae fai ne ia a au mo tupu i luga i Isalaelu katoa.
5E tokouke tama tagata ne tuku mai ne ia ki a au, kae ko Solomona ne fili ne ia mai aku tagata katoa, ke pule ne ia Isalaelu, te malo o te Aliki.
6“Muna a te Aliki ki a au, ‘Ko tau tama ko Solomona e faite ne ia a toku Faletapu. Ko oti ne fili ne au a ia ke fai mo aku tama, ka ko au ke fai mo tamana o ia.
7Ka fakatumau ne au tena malo ki te se gata mai, manafai e fakalogo fakalei a ia ki aku tulafono mo fakatonuga, e penei mo te taimi nei.’
8“Tela la, toku fenua, i te taimi nei, i mua o te tou Atua mo te maopoopoga tenei a Isalaelu, te fenua o te Aliki, ko fai atu ei au ke tausi fakalei koutou ki mea katoa kola ne fakatonu mai ne te Atua, ko te mea ke tumau koutou i te fenua gali tenei, ko te mea foki ke nofo tumau i ei a tino i otou gafa ki te se gata mai.”
9Ne faipati foki a ia ki a Solomona, ana muna, “Taku tama, au e fai atu ki a koe, ke talitonu koe ki te Atua o tou tamana, kae tavini atu ki a ia mo tou loto katoa mo tou mafaufau katoa. E iloa ne ia a 'tou mafaufauga mo 'tou manakoga katoa. Kafai e tautali koe i a ia, kae ka talia ne ia a koe; kae kafai e fulitua koe ki a ia, kae ka tiakina foki ne ia a koe ki te se gata mai.
10E tau o iloa nei ne koe, i a koe ko oti ne filifili ne te Aliki ke faite ne koe tena Faletapu malu. Na mafaufau la nei koe o fai, kae fai mo te loto kātoa.”
11Ne avatu ne Tavita ki a Solomona a te ata o te Faletapu katoa, ona potu teu koloa, mo nisi potu aka katoa, pela foki te Potu Tafasili i te Tapu, te koga e fakamagalo ei a agasala.
12Ne avatu foki ne ia a te ata o mea katoa kola e mafaufau a ia o fai mō koga fono, mo potu i olotou feitu, mo potu e teu ei a meafale o te Faletapu, mo meaalofa ne fakatapu mō te Aliki.
13Ne avatu foki ne Tavita ki a ia a te ata mō te fakatokaga o faitaulaga mo sa Levi i te faiga o olotou tiute, i te faiga o galuega mō te Faletapu, pela foki te tausiga o mea fai meakai o te Faletapu.
14Ne tuku atu foki ne ia a fakatonuga ki te uke o siliva mo aulo e tau o fakaaoga mō te faitega o mea fai meakai,
15mō te faitega o moli takitasi mo tulaga‐moli,
16te faitega o taipola siliva, mo taipola aulo takitasi kola e tuku ei a falaoa e ofo atu ki te Atua.
17Ne tuku atu foki ne ia a fakatonuga e uiga ki te uke o tina aulo mo faite a tui, pōla mo tiā, mo te uke o siliva mo aulo ke fakaaoga i te faitega o tisi,
18mo te uke o tina aulo mō faite te fata-fai-taulaga tela e sunu ei a mea manogi, pela foki te faitega o kaliota mo kelupi kola e fola o la kapakau i luga o te Pusa o te Feagaiga a te Aliki.
19Muna a te Tupu ko Tavita penei, “A mea katoa kona, e i loto i te ata tela ne tusi, e pela eiloa mo te fakasinosinoga ne fakaasi mai ne te Aliki ki a au ke fai.”
20Muna a te Tupu ko Tavita ki tena tama tagata ko Solomona, “Ke toka tou loto kae loto malosi. Kamata te galuega kae ke mo a eiloa e faka'lave te galuega i so se mea. A te Aliki te Atua, tenei e tavini au ki ei, e fakatasi atu eiloa ki a koe. Ka se tiakina eiloa ne ia a koe, kae ka fakatasi atu eiloa ki a koe ke oko ki te taimi e palele ei te faitega o tena Faletapu.
21A faitaulaga mo te kau sa Levi ko oti ne fakasino ki ei olotou tiute e tau o fai i te Faletapu. A tagata poto i galuega kesekese ko toka o fesoasoani atu ki a koe, ka ko tino katoa mo olotou takitaki e i lalo o tau pulega.”
Who We AreWhat We EelieveWhat We Do
2025 by iamachristian.org,Inc All rights reserved.
