GALUEGA 20 - Tuvalu Revised Bible

Ko te Malaga ki Maketonia mo Eleni

1I te 'nogaifoga o te fakalavelave tena, ne 'luku ne Paulo a te kau talitonu katoa, kae fakamalosi atu latou ne ia. Ne fakatofa atu foki ki ei, fano ei ki Maketonia.

2Ne fanatu a ia i loto i fenua kona, kae fakamalosi atu ki tino i te muna tonu, oko atu ei a ia ki Eleni.

3Ne nofo a ia i kona i masina e tolu. Ne fakatokatoka a ia o fano ki Sulia, kae iloa ake ne ia i tino Iutaia ko fonofono ke ta a ia; tela, mafaufau ei a ia o toe foki atu o ui i loto i Maketonia.

4A Sopata ko te tama tagata a Pilasi mai Pelea. Ne olo mo ia, pela foki mo Alitako mo Sekuno mai Tesalonia, Kaio mai Teipe, Timoteo, Tukasi mo Tofimo mai Asia.

5Ne mua atu latou o faka'tali mai ki a matou i Teloa.

6Ne ma'laga mai matou mai Filipi, i te otiga o te 'Kaiga o Falaoa se Faka'fete. I te lima o aso mai tua ifo, oko atu ei matou ki a latou i Teloa, 'nofo ei matou i kona i aso e fitu.

Ko te Toe Asiga a Paulo ki Teloa

7I te Aso Tapu, ne maopoopo matou o fai te motou 'kaiga masani ko te tofitofiga o te falaoa. Ne faipati atu a Paulo ki a latou mo te mafaufau i a ia e faimalaga i te aso a taeao tela, aveaveloa ei tena lauga ke oko ki te valuapo.

8E uke foki eiloa a moli i potu o te fale aluga tela e fono ei matou.

9E isi se tamataene e igoa ki a Eutikasi, e nofo i te fakamalama. Ona ko te loa o te lauga a Paulo, ne gasolo ei o fia moe, ke oko eiloa ki te to o tena moe. Ne tō ifo ei a ia mai te tolu o fogafale ki lalo i te one. Ne puke ake ne latou a ia ko mate.

10Ne fanaifo a Paulo ki lalo, kae punou ifo mai luga i a ia o 'sai mai ne ia, kae fai atu ki tino, “Sa fanoa'noa me ola fua a ia.”

11Fakamuli ifo, fanake ei a ia ki luga, tofitofi te falaoa kae kai. Ne fai'pati mo latou ke oko eiloa ki te saega o te la, fano ei Paulo.

12Ne ave ne latou a te tamataene ki tena fale me ko ola, ka ko oko eiloa i te fiafia.

Mai Teloa ki Mileto

13Ne mua atu matou i te vaka o olo ki Aso, ko te koga tela e puke ifo ei ne matou a Paulo ki tai, me ne fai mai tena fakatonuga ki a matou ke olo atu ki kona, i a ia e fano i uta.

14I te fetauiga a matou mo Paulo i Asosi, ne puke ifo ne matou ki tai i te vaka, fano ei matou ki Metulene.

15Ne malaga mai matou mai kona, oko atu ei ki Kiosa i te sua aso. I te sua aso mai tua ifo, oko atu ei matou ki Samosi, kae toe taeao ake oko atu ei matou ki Mileto.

16Ko loto Paulo ke fano loa te lotou malaga e fakasili i Efeso, ke mo a mana toe maumau ne taimi i Asia. Ko oko eiloa i tena fakava'vave ke na oko a ia ki Ielusalema, i te Aso Penitekoso.

Ko te Lauga Fakamavae a Paulo ki Toeaina o Efeso

17Ne avatu a te fekau a Paulo mai Mileto ki Efeso, o fakamolemole atu ki toeaina katoa o te Ekalesia ke o'mai ki a ia.

18I te okomaiga a latou, fai atu ei a ia penei: “Ko iloa ne koutou me ne leva te 'tou 'nofoga i taku fatoa okomaiga ki Asia.

19I te agaga o te loto malalo mo loimata ma'ligi, ne fai eiloa taku galuega, i a au se tavini a te Aliki, i aso o te faigata kola ne oko mai ki a au ona ko pulepulega masei a te kau Iutaia.

20E iloa ne koutou me ko oti ne taku atu ne au ki a koutou, a mea katoa kola e 'tau o fesoasoani atu au ki a koutou; i aku lauga mo aku akoakoga ne fai atu ki a koutou i otou lukuga, pela foki mo otou fale.

21E pena foki eiloa aku polopolokiga ne fai ki tino Iutaia mo tino o fenua fakaatea, ko te mea ke salamo ki olotou agasala, kae 'fuli atu ki te Atua, ka ke talitonu foki latou ki te tou Aliki ko Iesu.

22Kae nei, ko fakalogo au ki te Agaga Tapu, ke fano au ki Ielusalema, kae e se iloa ne au me ne a mea ka oko mai ki a au i kona.

23Ko iloa ne au i te Agaga Tapu ko oti ne fai mai i fa'kai katoa ne oko au ki ei, i te fale puipui mo fakalavelave e faka'tali mai eiloa ki a au.

24 tela ne fai ne ia e alatu i te toto o tena tama tonu.

29I toku iloa, kafai e teka au keatea mo koutou, e uke a luko ka o'mai o fakatasi mo koutou. Kae ka 'fulu faka'ma ne latou a te lafu.

30Ka oko mai foki a te taimi tela ka isi ne tino mai i a koutou ka faipati ki te muna loi, o takitaki a tino talitonu ke tau'tali i a latou.

31Tela la, ke matapula'pula koutou, kae masaua foki me ne akoako ne au koutou mo loimata i tausaga e tolu, i te ao mo te po.

32“Kae nei, ko tuku atu ne au koutou ki te tausiga a te Atua mo te muna o tena alofa tauanoa; ko ia foki e mafai ne ia o putiputi ake koutou, kae avatu foki ne ia ki a koutou a fakamanuiaga kola e tausi ne ia mo ona tino.

33Au foki e se manako ki ne siliva me ne aulo, me ne gatu mai so se tino.

34E iloa 'lei eiloa ne koutou i oku lima konei, ko oti ne galue o fakatoka a mea katoa kola e manako au ki ei pela foki oku taugasoa.

35Ko oti ne fakaasi atu ne au ki a koutou auala katoa, me ko te ga'lue malosi o tatou ki auala konei, ko 'tau ei mo tatou o fesoasoani ki tino vaivai. Kae ke masaua foki ne koutou a te muna a te Aliki ko Iesu ne fai, ‘E sili atu te manuia o te tino tela e tuku atu fua ana mea i lo o te tino tela e talia ne ia.”’

36I te otiga o pati a Paulo, totuli ifo ei a ia ki lalo mo latou katoa, o 'talo.

37Ne 'sai atu latou ki a Paulo kae 'tagi, kae sogi fakamavae atu ki a ia.

38Ko oko eiloa i te lotou fanoa'noa i pati a Paulo kola ne fai atu ki a latou, me ka se toe matea eiloa ne latou a ia. Tela, olo atu ei latou o tuku atu ki tai i te vaka.