GALUEGA 27 - Tuvalu Revised Bible

Ko Malaga atu Paulo ki Loma

1I te taimi ne tonu i ei me e 'tau mo matou o olo ki Italia, tuku atu ei ne latou Paulo mo nisi pagota ki lima o Iulio, se ofisa i te kautau a Loma tela e taku “Ko te kautau a te Kaisala.”

2Ne 'sopo matou ki luga i te vaka mai Atamutiu, tela ko toka o malaga atu ki taulaga o Asia, malaga atu ei matou. A Alitako te Maketonia mai Tesalonia, ne olo tasi foki matou.

3Ne oko matou ki Saitonu i te taeaoakega. Ne atafai Paulo ne Iulio, tela talia ei ne ia ke fano o fakatalofa ki ona takaga, ke maua ne ia a mea kola e manako a ia ki ei.

4Teka atu ei te motou vaka mai kona, kae ona ko te 'pono o te matagi, tele fakatafatafa atu ei te motou vaka i te feitu o Kupelu tela e u i te matagi.

5Ne folau atu te motou vaka i te kogatai o Kilikia mo Pafulia, oko atu ei matou ki Mula i Lukia.

6Ne maua ne te ofisa i kona a te vaka Alesania e fano ki Italia, faka'sopo ei ne ia matou ki ei.

7Ne teletele malie atu eiloa te motou vaka i ne mo aso. Ona ko te 'pono o te matagi, afe ei matou ki te fa'kai ko Nitoi. Ko se mafai eiloa ne matou o folau tonu ona ko te matagi, folau tonu atu ei te motou vaka ki te feitu o Keleta tela e u i te matagi, i tafa o te mataosoga ko Salamone.

8Ne tele fakapilipili eiloa te motou vaka i uta, kae ona ko te faigata o te matagi, oko atu ei matou ki te taulaga e 'lei i te tau, tela e igoa ki te Taulaga Malu, kae se 'mao mai te fa'kai ko Lasea.

9Ne leva eiloa te motou 'nofoga i kona, ke oko eiloa ki te taimi ko se mafai eiloa o toe fano te malaga, me ko siliga aso ne fai ei a talosaga fakalikiliki mō tapuakiga ke maua se 'lei, kae tenei e mautakitaki eiloa a te kaumatagi. Tela, fai atu ei a muna fesoasoani a Paulo:

10“Oku tagata, ko matea atu nei ne au me ka penei eiloa te tou faigamalaga; ka lasi te fakamaseiga o kako, ki te vaka pela foki mo te ola o tino.”

11Ka ko te pule o te kautau, e fakalogo eiloa ki te muna a te kapeni mo te tino e o ia te vaka, kae se fia saga eiloa ki muna a Paulo ne fai atu.

12A te koga tela e tau ei a te vaka, e se se koga e 'lei mo aso o te tau 'moko; tela la, a te tokoukega o latou ko loto ke na fano te vaka, ke taumafai ke oko atu latou ki Foinia, manafai e mafai. Se taulaga e tasi i Keleta, tela e tu fakasaga ki saute o fano ki te togala, matu o fano ki te togala, ko te mea ke 'nofo i ei latou i kona i aso o te tau 'moko.Ko te Afā ne Fepaki ki a Latou

13Ko kamata o agiagi malie mai te matagi mai saute, tela mafaufau ake ei latou kona, me ko mafai ne latou o fakataunu te lotou fuafuaga. Ne sisi ake te taula, teletele atu eiloa te vaka i gatai o Keleta.

14E se leva foki, kae agi mo te afā, tela e fakaigoa ki te “Tokelau,” e agi tonu mai eiloa mai i te fenua.

15Ne fepaki ki te vaka, ka ko se mafai eiloa o fano tonu te vaka ki luga o te matagi, palele ei te motou taumafai atu, tela fakatapea ei te vaka, ko tuku eiloa ki te ave a te matagi.

16Ne tai tapu malie matou, i te motou telega i te feitu ki saute o te tama motu e igoa ki a Kauta. Ne mafai eiloa ne matou i konei o ivi ake te poti, e tiga eiloa i te faigata, kae ne to ake eiloa ki luga.

17Ne 'futi ake ne latou, saisai mau ei ne latou ki lopu ki luga i te vaka. Ne ma'taku latou i a matou ma kasa i kauone e ave sale ne te au i te teatea o Lipua, tela, tuku ifo ei ne latou te la, kae tuku te vaka ke ave ne te matagi.

18E se matuku eiloa a te agi o te matagi, tela la, i te taeaoakega, laku ei ne latou ki te tai a kako o te vaka.

19Kae i te sua aso mai tua ifo, ne puke olotou lima ki mea faigaluega o te vaka, kae laku foki ne latou ki te tai.

20Ko se matea ne matou a te la io me se fetu i aso e uke, ka ko te matagi e mautakitaki eiloa tona agi malosi. Ko palele atu foki te motou fakamoemoega ki te ola.

21Ko leva foki aso e seki 'kai eiloa a tino, tela tu ake ei Paulo i olotou mua, kae fai atu: “Oku tagata, ne 'tau eiloa i a koutou o faka'logo mai ki a au, ke se teka mai tatou mo Keleta; penei e seai se mea e fakamasei io me maumau.

22Kae nei, ko fakamolemole atu au ki a koutou, ke loto ma'losi! E seai eiloa se tino o tatou e mate; ko te vakamutu fua ka malepe.

23I te mea ne oko mai ki a au i te po a te agelu a te Atua, tela e o ia a au, ko ia foki tela e tapuaki au ki ei,

24ana muna, ‘Paulo, sa mataku! E 'tau mo koe o tu i mua o te Kaisala; kae kiloke, ko tuku atu ne te Atua ki ou lima a ola o tino katoa kola e faimalaga koutou.’

25Tela la e oku tagata, ke loto ma'losi koutou! Me i a au e fakatuanaki ki te Atua, me e ola eiloa tatou, e pela eiloa mo te mea ko oti ne taku mai ki a au.

26Ka ko te mea, a tatou nei ka ake ki uta i se fenua.”

27Ko te sefulu fa tenei o po, ka koi kini eiloa matou ne te matagi, tela, tapeapea eiloa matou i te matagi i te Tai Metitilani. Kati ko te valuapo, ne tukutaumate ne te kauvaka me ko pilipili latou ki se fenua.

28Pei ifo ne latou te leti, iloa ake ei ne latou me tusa mo te selau lua sefulu futu a te 'poko o te koga tena. Se leva foki, toe pei ifo te leti, iloa ake me ko fuaiva futu te 'poko.

29Ne ma'taku latou i te mea ma kasa te motou vaka, tela pei ifo ei ne latou i te mulivaka a taula e fa, olioli ei latou ke na ao.

30Ne taumafai te kauvaka ke 'tele keatea latou mai te vaka; tuku ifo ei ne latou te poti, ke fai ake pela i a latou e olo o pei ifo a taula i te taumua.

31Ne fai atu Paulo ki te ofisa mo sotia, “Kafai e se 'nofo a kauvaka konei i luga i te vaka, e se mafai o ola koutou.”

32Tela, kati ei ne sotia a lopu e 'sai ei te poti, ke tapea.

33Ko pili o ao, fakamolemole atu ei Paulo ki a latou ke tapa ake olotou alo, tela, fai atu ei a ia penei, “Ko oti ne 'nofo fakatalitali koutou i te sefulu fa aso, kae e seki 'kai eiloa koutou.

34Tela la, ko fakamolemole atu au ke 'kai ake koutou, ko te mea ke ma'losi koutou. E seai eiloa se laulu otou ulu e to.”

35I te otiga o ana muna konei, puke ei a Paulo ki mo falaoa, kae siki tena fakafetai ki te Atua i mua o latou katoa. Ne tofitofi ne ia, kamata eiloa o kai ki ei.

36Tela, pela ake eiloa olotou loto, saga atu ei o 'kai.

37E tusa mo te 276 te aofaki katoa o matou i luga i te vaka.

38I te otiga katoa o tino ne 'kai, fakamāmā ei ne latou te vaka, i te lakuga o saito ki te tai.

Ko Kasa te Vaka

39I te aoakega, ko se iloa 'lei ne kauvaka me ko oi te fenua tena, kae matea atu fua ne latou a te maofega o te fenua mo tena kauone, tela, tonu ake ei i a latou me kafai e mafai, ko te mea eiloa ko fakakasa ne latou a te vaka i kona.

40Kati ei ne latou a taula o tiaki. Se gata fua i kona, ne 'tala foki ne latou a lopu e saisai ei a foe uliuli. Ne sisi ake ne latou a te la i te taumua, ko te mea ke agi ne te matagi a te vaka ki mua, ke tele atu ki uta i te tafatai.

41Ne tele tonu atu te vakamutu ki te tafua'aga, kasa eiloa i ei. Ko mautakitaki eiloa te taumua, ko se mafai eiloa o to keatea, ka ko te mulivaka ko malepelepe ne tuki ne galu.

42Ko fai a te fuafuaga a sotia ke tamate a pagota, ko te mea ke seai se tino o latou e 'kau ki uta kae tele.

43Ka ko te pule o te kau sotia, ne manako ke fakasao Paulo; tela taofi ei ne ia a latou ke mo a e fai ne latou a te mea nei. Ne fakatonu atu a te pule o te kau sotia ki tino katoa kola e maua ne latou o 'kau, ko latou kona ka muamua o le'le ki te tai o 'kau ki uta.

44Ka ko latou kola e 'toe ke tau'tali atu ki uta i lagai, io me ko so se mea o te vaka. E tena eiloa a te faifaiga ne 'sao 'lei ei a matou katoa ki uta.