IOPU 13 - Tuvalu Revised Bible

1-2A muna katoa a koutou kona e fai, ko oti ne lagona ne au muamua.

E malamalama au i au muna katoa kona;

A toku atamai e pena eiloa mo tou atamai.

Au e se malalo atu i a koe.

3A te mea tenei e kinau ei au, se mea eiloa i te va o maua mo te Atua kae se ko koutou;

Au e manako ke kinau maua mo te Atua ki te mea tenei e mafa i toku loto.

4E fai otou muna fakaloiloi, ko te mea ke fakagalo ei te otou valea;

A koutou e pela me ne tokita kola ko se mafai o faka'lei se tino.

5Sa faipati, kae ka mafaufau aka a tino i a koutou e poto!

6Fakalogologo mai i te taimi e fakaasi ei te mea e mafa i toku loto.

7Ai a e loi ei koutou? I te otou fakatau, e fiafia te Atua i tala loi a koutou?

8E a, a koutou e taumafai o pulu te Atua?

E a, e sui ne koutou te Atua ke kinau tatou i te fono?

9Mata e isi se lei e mafai o lavea ne te Atua i a koutou, manafai e onoono fakalei atu ki a koutou?

I te otou fakatau, e mafai ne koutou o fakaloiloi a te Atua,

E pela mo tagata e fakaloiloi gofie sale fua ne koutou?

10E ui eiloa e funa ne koutou te otou takalialia ki nisi tino,

Kae ka kote eiloa koutou ne te Atua,

11Kae ka fakamatakutaku ne ia koutou ki tena mana.

12A otou muna poto ka se aoga pela me ne lefu;

A otou fakamatalaga ka se aoga pela me ne one.

13Sa uā, tuku mai soku avanoaga ke faipati atu au,

Ka ko te ikuga tena eiloa e vau.

14A au ko toka o peti toku ola.

15Ko seai soku fakamoemoega; e lei faeloa manafai e tamate au ne te Atua.

Au ka faipati ki te Atua i te mea e ma'fa ei toku loto.

16E se taumate, e iku au o sao i a au e loto malosi o faipati ki te Atua.

Me e seai se tino masei e mafai o fano o faipati fakafesagai ki te Atua.

17Fakalogo mai ki taku fakamatalaga.

18Au ko toka o fai taku tagi, me e iloa ne au i au e sao.

19Te Atua, e a, e 'lou ne koe i au e agasala?

Kafai e fai ne koe te mea tena, ko au ka se faipati,

Ko toka foki au o mate.

20Talia mai taku fakamolemole tenei, ki mea e lua konei e manako au ki ei,

Kae ka se taumafai au o muni mai i a koe;

21Fakagata tau fakasala ki a au, kae sa fakamatakutakugina au.

22Te Atua, faipati muamua koe, ko tali atu ei au.

Io me tuku mai ke faipati au, kae tali mai koe.

23Ne a aku agasala? Ne a mea se ne fai ne au?

Ne a agasala e 'lou mai me ne fai ne au?

24Ai a e kalo ei koe keatea mo au? Ai a e fai ei ne koe au e pela me se fili o koe?

25A koe e taumafai o fakamatakutaku au?

Au nei se lau lakau fua;

A koe e faitaua mai fua ki kau saito.

26E 'lou ne koe me ne fai ne au a agasala masei,

Ke oko foki eiloa ki mea ne fai ne au i aso koi talavou ei au.

27 Iopu 33.11 E saisai ne koe oku vae ki seni; e kilokilo fakalei koe ki aku mea e fai,

Ke oko foki eiloa ki gao o oku vae.

28Tena la, a te ikuga, ko au ko masei valevale e pela me se laupapa pala,

Pela me se peleue ne kai ne mogamoga.