1A te Aliki ne fai mai ki a au ke fano au ki te palesi o te tupu o Iuta, kae fakaasi ki a latou a te fekau,
2te gafa o Tavita, te tupu, mo ana ofisa, mo tino Ielusalema, ke fakalogo ki muna konei a te Aliki:
3“Au, te Aliki, ko fakatonu atu ki a koutou ke fai ne koutou a te mea tonu mo te fakamasinoga tonu. Puipui fakalei ne koutou a te tino tela e fakaloiloigina mai i te tino fakaloiloi. Sa fai fakamasei io me fakasaua ne koutou a tino fakaatea, tamaliki seai ne matua, pela foki a fafine ko mate olotou avaga; kae sa sona tamategina a tino seai ne lotou mea se ne fai, i te koga tapu tenei.
4Kafai e fakamaoni koutou o tautali i aku fakatonuga, kae ka tumau eiloa te fakasologa o tupu i te gafa o Tavita. Ka tumau foki te ulu sale atu o latou mo olotou ofisa mo tino o te lotou fenua i loto i mataloa o te palesi tenei, i luga i kaliota mo solofanua.
5Mata 23.28; Luka 13.35 Kae kafai e se tautali koutou i aku fakatonuga, au e tauto ki a koutou i te palesi tenei ka masei valevale. Ko au, te Aliki, tena ne faipati atu.
6“I taku kilo, a te palesi o Iuta e gali pela mo te fenua o Kileata, pela foki mo mauga o Lepanona; kae ka fai ne au ke lavaki, ke fai mo koga e seai ne tino e nofo i ei.
7Ka uga ne au ne tagata ke olo o ofa fakamasei a te palesi tena. Ka o'mai latou mo olotou takū o kati ki lalo ona pou alasi, kae pei atu ki loto i te afi.
8“Fakamuli ifo, e tokouke a tino fakaatea ka fakasili aka i tafa o te fa'kai, kae fakatau fesilisili i a latou eiloa, me ai a ne fai ei ne au se vaega mea pena ki te fa'kai takutakua tenei.
9Kae ka tali atu koutou me ne ala o fai ne te Aliki a te mea tena ona ne seki tausi ne koutou a te feagaiga a koutou mo au, te otou Atua, kae ne tapuaki kae tavini atu eiloa koutou ki nisi atua.”
Ko te Fekau a Ielemia e Uiga ki a Ioasi10Tino Iuta, sa tagi fanoanoa mo te Tupu ko Iosia
Sa tagi fanoanoa i tena mate.
Kae ke tagi fanoanoa koutou ona ko losia tena tama tagata;
Ka ave ne latou a ia, se toe foki mai eiloa a ia,
Se toe lavea ne ia a te fenua ne fanau ei a ia.
11 2Tupu 23.31-34; 2NTupu 36.1-4 Konei a muna a te Aliki ne fai e uiga ki te tama tagata a Iosia ko Ioasi, tela ne sui ne ia tena tamana o fai mo tupu o Iuta, “Ko fano a ia keatea mai i konei, se toe foki mai.
12Ka mate atu eiloa a ia i te fenua ne ave ki ei a ia, kae ka se toe matea eiloa ne ia a te fenua tenei.”
Ko te Fekau a Ielemia e Uiga ki a Ieoiakimo13Ke malaia te tagata tela e faite tena fale i auala se tonu,
Kae fakalasi ne ia i uiga se fakamaoni;
E fai ne ia a tagata o tena fenua ke galue seai ne togi,
Kae se avatu ne ia se togi mō latou.
14Ke malaia te tagata tela e fai ana muna penei, “Ka faite soku fale
Kae fai ke lasi lei a potu i te fogafale ki luga.”
Ne fakapiki ne ia a fakamalama o tena fale,
Kae pui te koga i loto ki laupapa o te alasi,
Kae peni ne ia ki te peni kula.
15E mata e lei atu tou tulaga fakatupu
Manafai e faite ou fale ki laupapa o te alasi,
Ke gali atu i fale o nisi tupu?
A tou tamana ne fiafia me ne ola eiloa ke oko ki tena toeaina.
A ia se tagata e fai mea tonu kae fakamasino ki te mea tonu,
Kae e manuia i ana mea katoa e fai.
16E fakamasino ne ia a tino mativa i te mea tonu
Kae ne solosolo lei tena olaga katoa.
Tena te uiga tonu o te tagata ko iloa tonu ne ia a te Aliki.
17Ka ko koe e kilo fua ki mea e manako ki ei tou loto;
E tamate ne koe a tino amiotonu,
Kae pule fakasaua ne koe ou tino.
Ko te Aliki tena ne faipati.
18 2Tupu 23.36—24.6; 2NTupu 36.5-7 Tena la, ne faipati mai te Aliki e uiga ki te tama tagata a Iosia ko Ieoiakimo, te tupu o Iuta, ana muna,
“E seai se tino e tagi fanoanoa i tena mate,
Io me fai aka penei,
‘Ko alofa au i toku taugasoa!’
E seai se tino e tagi fanoanoa
Ki a ia io me tagi aka penei,
‘Toku aliki! Toku tupu!’
19A te faiga fanoanoa e fai ki a ia,
E pela mo te faiga fanoanoa ki te manu ko te asini,
Ka oti ko toso atu ei a ia keatea,
O ave o pei ki tua i mataloa o Ielusalema.
Ko te Fekau a Ielemia ki te Ikuga o Ielusalema20Tino Ielusalema, olo ki Lepanona o pakalaga,
Olo o tagi i te fenua o Pasana;
Kalaga mai mai i mauga o Moapi,
Me i fenua e kau mo koutou ko takavale katoa.
21A te Aliki ne faipati atu ki a koutou i te taimi ne maumea ei koutou,
Ka ko koutou e seki fia fakalogo.
Tena eiloa te mea ne fai ne koutou i te otou olaga katoa;
E se mafai eiloa ne koutou o fakalogo ki te Aliki.
22A otou tino pule ka agi keatea ne te matagi,
A tino e kau mo koutou ka puke fakapagota,
A te otou fa'kai ka fakamasiasi
Ona ko amioga masei katoa a koutou ne fai.
23A koutou e manava mo te saogalemu i tafa o alasi kola ne aumai mai i Lepanona;
Kae ko alofa au i a koutou manafai ko oko atu te mae ki a koutou
Pela mo te mae o te fafine ka fai o fanau.
Ko Te Fakamasinoga a te Atua ki a Ieoiakini24 2Tupu 24.8-15; 2NTupu 36.9,10 Muna te Aliki ki te Tupu ko Ieoiakini, te tama tagata a Ieoiakimo, te tupu o Iuta, “Au ko te Atua ola, e faipati tonu atu au penei, me moi fai pela a koe ko te mama i toku lima fakaatamai, e tapale eiloa koe ne au keatea
25kae tuku atu koe ki tino kola e mataku koe i ei, tino kola e fia tamate ki a koe. Ka tuku atu ne au a koe ki te Tupu ko Nepukanesa o Papelonia mo tena kautau.
26Ka fai malo ne au a koe mo tou matua ke ave fakapagota. Ko olo koulua ki te fenua e seki fanau i ei koulua, kae ka mate eiloa koulua i kona.
27Ka toe fia kilo ou mata ki te fenua tenei, kae e se mafai, i a koe e se toe foki mai.”
28Ne fai atu au penei, “E a, kai fai a Ieoiakini pela me se tiā one ko mafa, tela ko pei keatea kae ko seai eiloa se tino e manako ki ei? Tena te pogai ne ave fakapagota ei a ia mo ana tamaliki ki se fenua e seki iloa eiloa ne latou?”
29Te fenua, te fenua, te fenua!
Fakalogo mai ki muna a te Aliki:
30“A te ikuga o te tagata tenei,
Ne fakamalaia eiloa ke 'galo ana tamaliki,
Ke pela me se tagata tela e se mafai o taunu ana mea e fai.
Ka seai ne tino i tena gafa ke pule i Iuta,
Ke fakatumau ei te fakasologa o tupu i te gafa o Tavita.
Ko au, te Aliki, tena ne faipati atu.”
Who We AreWhat We EelieveWhat We Do
2025 by iamachristian.org,Inc All rights reserved.
