IELEMIA 34 - Tuvalu Revised Bible

Ko te Fekau e Uiga ki a Setekaia

1 2Tupu 25.1-11; 2NTupu 36.17-21 A te Aliki ne faipati mai ki a au i te taimi ne taua atu ei a Nepukanesa, te tupu o Papelonia, mo tena kautau, fakatasi mo kautau a malo mo fenua kola e pule ne ia, ki Ielusalema mo fa'kai i ona tafa.

2A te Aliki, te Atua o Isalaelu, ne fai mai ki a au, ke fano au o fai ki te Tupu o Iuta ko Setekaia penei, “Au, te Aliki, ka tuku atu ne au a te fa'kai tenei ki te tupu o Papelonia, kae ka 'sunu ne ia.

3A koe e se sao; ka puke fakapagota koe kae tuku atu ki a ia. Ka fakafesagai ou lua mata, kae faipati fakalei eiloa; tena, ko ave ei koe ki Papelonia.

4Setekaia, fakalogo mai ki aku muna konei e uiga ki a koe. A koe e se mate i te taua.

5A koe e mate mo te filemu, kae ka 'sunu mea manogi a tino i te taimi e tanu ei koe, e pela eiloa mo te 'sunuga sale ne latou a mea manogi i taimi ne tanu ei ou tupuga, kola ne fai mo tupu i ou mua. Ka 'tagi fanoanoa i tou mate, kae fai aka penei, ‘A te motou tupu ko mate!’ Ko au, te Aliki, tena ne faipati atu.”

6Ne fakaoko atu ne au a te fekau tena ki te Tupu ko Setekaia i Ielusalema

7i te taimi e taua mai ei te kautau a te tupu o Papelonia ki te fa'kai o Ielusalema. A te kautau a te fili e taua atu foki i te taimi tena ki fa'kai ko Lakisa mo Aseka, kona eiloa a nisi fa'kai kola ne fakamalosi fakalei.

Ko Faifaiga se Lei ki Pologa

8A te Tupu ko Setekaia, mo tino Ielusalema ne fai te feagaiga a latou ke fakasaoloto

9a pologa Epelu a latou, tagata mo fafine, ko te mea ke se toe ai se tino Isalaelu e fakapologa ne ia sena taina Isalaelu.

10A tino katoa o te fenua, mo olotou takitaki, ne loto tasi ke fakasaoloto olotou pologa, kae se toe fakapologa eiloa ne latou. Ne fakasaoloto eiloa ne latou olotou pologa,

11kae fakamuli ifo, ne toe 'fuli olotou mafaufauga, toe puke mai foki ne latou o fakapologa ne latou.

12Tena, fai mai ei te Aliki,

13te Atua o Isalaelu ki a au, ke fai atu au ki te fenua penei: “Ne fai ne au taku feagaiga mo otou tupuga i te taimi ne faka'sao ei ne au latou mai i Aikupito, kae fakasaoloto mai i te olaga fakapologa. Au ne fai ki a latou,

14Eso 21.2; Teu 15.12 me i taki fitu tausaga katoa, e tau o fakasaoloto ne latou a pologa Epelu kola ko oti ne tavini ki a latou i te ono tausaga. Ka ko otou tupuga e seki 'saga mai ki a au, io me faka'logo mai ki aku muna ne fai.

15I ne nai aso konei ko teka atu, ne 'fuli otou mafaufauga, fai ei ne koutou te mea tela e fiafia au ki ei. Ne fakasaoloto katoa ne koutou otou taina Isalaelu kola e pologa i a koutou, kae ne fai ne koutou se feagaiga i oku mua, i te Faletapu tela e tapuaki mai ei a tino ki a au.

16Kae ne toe 'fuli foki otou mafaufauga, ko fakaseaoga ei ne koutou a au. A koutou katoa ne toe olo o puke mai a pologa kola ne fakasaoloto ne koutou (ko latou ne manako ke fakasaoloto latou) kae fai malō ne koutou ke toe fai mo pologa a koutou.

17Tela la, a au, te Aliki, ko fai atu ki a koutou, i a koutou ko se fakalogo mai ki a au: e seki tuku atu ne koutou te saolotoga e tau ki otou taina Isalaelu. Tela la, i te taimi nei, ka avatu ne au te saolotoga ki a koutou: ko te saolotoga ke 'mate koutou i te taua, te famai, mo te fia'kai. Ka fai ne au a malo katoa i te lalolagi ke ma'taku i te mea e fai ne au ki a koutou.

18-19A tino maluga o Iuta mo Ielusalema, fakatasi mo ofisa o te palesi, mo faitaulaga, mo takitaki katoa, ne fai ne latou a te feagaiga mo au i te sasalega i te va o te avā feitu o te pulumakau tela ne kati lua ne latou. Ne ofa ne latou te feagaiga tena, kae seki tausi ne latou a ona tulafono. Tela la, ka fai ne au ki a latou a te mea tela ne fai ne au ki te pulumakau.

20Ka tuku atu ne au latou ki olotou fili, kola e fia tamate ki a latou, ka ko olotou foitino 'mate ka kai ne manu eva mo manu o te vao.

21Ka tuku atu foki ne au a te tupu o Iuta ko Setekaia, mo ana ofisa, ki a latou kola e fia tamate ki a latou. Ka tuku atu ne au latou ki te kautau a Papelonia, tela ko gata tena faitaua atu ki a koutou.

22Ka fai ne au a te fakatonuga, ko foki mai ei latou ki te fa'kai tenei. Ka taua atu latou ki te fa'kai tena, puke ne latou kae 'sunu. Ka fai ne au a fa'kai o Iuta ke pela me se toafa tela e seai ne tino e nofo i ei. Ko au, te Aliki, tena ne faipati atu.”