IELEMIA 38 - Tuvalu Revised Bible

Ko Ielemia i te Vaikeli Masa

1A Sefatia te tama tagata a Matana, Ketalia te tama tagata a Pasula, Ieukala te tama tagata a Selemia, mo Pasula te tama tagata a Malakia, ne lagona ne latou taku faipatiga ki tino

2i te Aliki ne fai mai penei, “A te tino tela e nofo i loto i te fa'kai e mate i te taua, te fiakai io me i te famai. Ka ko te tino tela e fano ki tua o fakamalalo ki te kau Papelonia ka se mate; ka fakasao tena ola.”

3Ne fai foki au ki a latou i te Aliki ne fai mai penei, “Ka tuku atu ne au a te fa'kai ke fakatakavale ne te kau Papelonia.”

4Tena la, ne olo atu a ofisa kona ki te tupu kae fai atu ki a ia penei, “A te tagata tenei e 'tau o tamate. A muna a ia kona e fai e fakavaivai fua ne ia a loto o sotia i te fa'kai, ke oko foki eiloa ki tino katoa konei e 'toe i te fa'kai. A tena mea e fai, e se se fesoasoani ki tino, kae se taumafaiga fua o fai ke malaia a tino.”

5Ne tali atu te Tupu ko Setekaia, “Ko 'lei, fai te mea e 'loto koutou o fai ki a ia; e se mafai ne au o taofi koutou.”

6Tena ne puke ei ne latou a au, kae tukutuku ifo i lōpu ki lalo i te vaikeli o te Pelenise ko Malakia, tela e tu i te malae fono o te palesi. E seai ne vai i te vaikeli tena, na ko pela fua, tela la, ne 'goto ifo eiloa au i pela kona.

7E isi se eunuka e galue i te palesi e igoa ki a Epetimeleka, se tagata Sutana, ne logo me ne tuku ne latou au ki loto i te vaikeli. I te taimi tena, a te tupu e fai te lotou fono i te Mataloa o Peniamina.

8Tena, ne fanatu a Epetimeleka ki kona o fai ki te tupu penei,

9“Tou 'Malu, a te mea ne fai ne tagata konei e se 'lei. Ne tuku ne latou a Ielemia ki loto i te vaikeli ke mate i te fiakai, me ko seai ne meakai i te fa'kai.”

10Tena ne fakatonu ei ne te tupu a Epetimeleka ke puke se tokotolu tagata ke olo o 'futi aka au mai i lalo i te vaikeli koi tuai au o mate.

11Tena ne olo atu a Epetimeleka mo te tokotolu kona ki potu teu koloa o te palesi o puke mai ne gatu masaesae, tukutuku ifo ei ne ia ki a au i lōpu.

12Ne fai mai a ia ki a au ke tuku a laugatu masaesae kona mai i lalo i oku afiga, ke moa e pa'kia oku lima i te lōpu. Ne fai ne au a te mea tena,

13tena ne 'futi aka ei ne latou a au ki tua mai i te vaikeli. Fakamuli ifo, ne tuku eiloa au i te malae fono.

Setekaia ko Fakamolemole ki se Manatu Fesoasoani mai i a Ielemia

14I te taimi e tasi, ne fai te fakatonuga a te Tupu ko Setekaia ke avatu au ki a ia i te tolu o mataloa ki te Faletapu, kae fai mai penei, “Ka fai atu taku fesili ki a koe, kae manako au ke taku mai ne koe a te meatonu.”

15Ne tali atu au penei, “Kafai e faipati atu ne au a te meatonu, kae ka tamate ne koe a au, kae kafai e fai atu soku manatu fesoasoani, a koe e se fakalogo mai eiloa.”

16Tena la, ne tauto mai ki a au a te Tupu ko Setekaia penei, “Au e tauto i te igoa o te Atua ola, te Atua tela ne aumai ne ia te ola, me e se tamate ne au a koe io me tuku atu koe ki tino kola e fia tamate ki a koe.”

17Tena ne fai atu ei au ki a Setekaia i te Aliki Malosi, te Atua o Isalaelu, ne fai mai penei, “Kafai e talia ne koe tou takavale i ofisa a te tupu o Papelonia, kae ka fakasao tou ola, ka ko te fa'kai foki ka se 'sunu. A koe mo tou kaiga ka 'sao.

18Kae kafai e se talia ne koe tou takavale, ko tena uiga ka tuku atu a te fa'kai tenei ki te pule a te kau Papelonia kola ka 'sunu ne latou, kae ka se sao eiloa koe mai i a latou.”

19Kae ne tali mai a te tupu penei, “Au ko mataku i tino o te tou fenua kola ne tele ki te kau Papelonia. E iku au o tuku atu ke fakasaunoa ne latou.”

20Ne fai atu au penei, “A koe e se tuku atu ki a latou. Au e fakamolemole atu ke fakalogo koe ki te fekau a te Aliki, kae ka fanofano lei a mea katoa, mo tou ola foki ka sao.

21Ka ko te Aliki ne fakaasi mai ne ia ki a au i te fakaasiga, a te mea ka tupu ki a koe manafai e ita koe ma talia tou takavale i te kau Papelonia.

22I te fakaasiga tena, ne lavea ne au a fafine katoa kola koi toe i te palesi o Iuta ne avatu ki ofisa a te tupu o Papelonia. Faka'logo aka ki muna a latou e fai i te taimi ne olo atu ei latou:

‘A te tupu ko 'taki 'se ne ona taugasoa pele,

Ko pule malosi ne latou a ia.

Kae nei, i te gotōga o ana vae i lalo i te pela,

Ka ko ana taugasoa ko 'tele keatea mai i a ia.”’

23Ne toe fakaopoopo atu mo aku muna penei, “A otou fafine mo tamaliki ka ave ki te kau Papelonia, ka ko koutou e se 'sao mai i a latou. A koutou e ave fakapagota ne te tupu o Papelonia, ka ko te fa'kai tenei ka 'sunu ke ii ki lalo i te laukele.”

24Ne tali mai Setekaia, “Ke mo a eiloa e fakaasi ne koe ki se tino a te faipatiga a taua tenei, kae ka seai se fakalavelave e oko ki a koe.

25Kafai e 'logo a ofisa i a taua ne faipati, kae ka olo atu o fesili atu me ne a mea ne faipati taua ki ei. Ka tauto atu latou ke se tamate ne latou a koe manafai e fakaasi ne koe a mea katoa ne fai'pati taua ki ei.

26Fai atu ki a latou i a koe ne fakamolemole mai ke se fakafoki koe ki te falepuipui o mate i ei.”

27Tena, ne o'mai katoa a te kau ofisa o sili mai ki a au e uiga ki te ma faipatiga mo te tupu, kae ne fai atu ne au a pati kola ne fai mai ne te tupu ki a au. E seai eiloa se mea e mafai ne latou o fai, me e seai eiloa se tino ne lagona ne ia a te sautalaga tena.

28Eseki 33.21 Tena la, ne tausi eiloa ne latou a au i te malae fono o te palesi, ke oko eiloa ki te taimi ne fakatakavale ei a Ielusalema.