SALAMO 15 - Tuvalu Revised Bible

Ko te mea e Manako ki ei te Atua

1Te Aliki, ko oi e tau o ulu ki loto i tou Faletapu?

Ko oi foki e tau o tapuaki i Siona, tou mauga tapu?

2Ko te tino tela e fai ne ia mea katoa e loto ki ei te Atua,

Kae fai faeloa ne ia a mea tonu,

Kae faipati ki muna tonu mo te alofa,

3E se fakaitaita foki ne ia a nisi tino.

E se fai ne ia amioga se 'lei ki ona taugasoa

Kae se fakasalalau foki ne ia ne pati fakalumaluma e uiga ki ona tuakoi.

4E takalialia ki tino kola e se fiafia ki ei te Atua,

Kae fiafia ki a latou kola e faka'logo ki te Aliki.

E fakamaoni a ia ki ana folafolaga

E tusa eiloa me pefea te faigata.

5E faka kaitalafu atu ne ia tupe kae se pasene,

E se talia ne ia se togi ke fakasala ei se tino e se sala.

A te tino tela e fai ne ia a mea katoa konei, ka sao 'lei faeloa a ia.