SALAMO 73 - Tuvalu Revised Bible

KO TE TOLU O TUSI(Salamo 73-89) Te Faimeatonu o te Atua

1E alofa eiloa te Atua ki tagata Isalaelu kola e 'ma olotou loto.

2Toku fakatuanaki toe itiiti eiloa ko seai;

A toku talitonu foki ko tai galo atu eiloa.

3Ia au ne loto masei ki tino fia'sili i te mateaga ne au te solosolo 'lei o tino amio ma'sei.

4Seai ne mea mae e oko ki olotou foitino;

E ola 'lei olotou foitino, kae ma'losi foki.

5E se puapuagatia latou pela mo nisi tino;

Kae se maua foki ne latou ne fakalavelave kola e maua ne nisi tino.

6Tena te mea e safe ei ne latou ki olotou ua te fakamaualuga pela me se malele,

Kae fai foki ne latou a te fakasaua mo fai olotou gatu;

7E maua mai i olotou loto te amio masei,

Mo olotou mafaufau foki e fonu i togafiti ma'sei.

8E 'kata fakatauemu latou ki nisi,

Kae faipati foki ki mea ma'sei;

E fakamatamata latou kae faipati ki mea e fakasaua ei ne latou a nisi tino.

9Ne fai ne latou a muna ma'sei ki te Atua i te lagi,

Kae fai fakatonuga fiasili ki tino o te lalolagi.

10Tena te mea ne fuli atu ei a tino o te Atua ki a latou,

Kae talitonu ma'losi ki olotou muna katoa.

11E pela olotou muna, “E se iloa ne te Atua;

E se mafai foki o iloa ne ia tela e Tafasili i te Maluga.”

12E pena eiloa a tino amio ma'sei.

E uke olotou mea kae atea e fakaopoopo mai foki nisi mea.

13E a, e se aoga a te tausi o toku olaga ke 'ma, mai te agasala?

14Te Atua, ko oti ne fakapuapuagatia au ne koe i aso katoa;

Ko oti foki ne fakasala ne koe au i taeao katoa.

15Kafai ne faipati atu ne au ne muna pena,

E penei ko se tau au o taku me se tino o tou fenua.

16Tela la, ne taumafai malosi au ke malamalama i te mea tenei,

Ka ko oko eiloa te faigata ki a au.

17Ne fatoa malamalama au i te mea ka tupu ki tino amio ma'sei,

i taku fanoga ki loto i tou Faletapu.

18Ka faka'tu ne koe latou i koga molemole,

Ko te mea ke siga latou ki te malaia!

19Ko vave 'mate latou; kae olo ifo latou ki lalo i te ikuga fakamataku!

20Te Aliki, e pela latou me se moemiti tela e galo fua i te taeao,

Kafai e ala ake koe, ko se manatua ne koe olotou foliga.

21I te taimi ne fita ei toku mafaufau kae mae toku loto,

22Au ne valea pela me se manu;

Ne seki malamalama au i a koe.

23Ka ko au e fakapilipili faeloa ki a koe,

Kae ne taofi mau ne koe toku lima.

24Ne takitaki atu au ne koe ki tau fakatonuga,

Kae fakamuli ko talia ei au ne koe mo te fakaaloalo.

25Se a se isi mea e maua ne au i te lagi,

Na ko koe fua?

Tenei ko maua ne au koe, se a foki se isi mea e toe manako ei au i te lalolagi?

26Toku mafaufau mo toku foitino ko gasolo o vaivai,

Ka ko te Atua ko toku malosi;

Ko ia ake eiloa e manako au ki ei.

27A tino kola e tiaki ne latou a koe, ka 'mate;

Ka fakamalaia foki ne koe a latou kola e se fakamaoni ki a koe.

28Kae ki au, se mea tafasili i te gali te pili ki te Atua;

E maua toku puipuiga i te Aliki Maluga,

Ko folafola atu ei ne au a mea katoa ne fai ne ia!