ESELA 3 - Tuvalu Revised Bible

Ko Toe Kamata a Tapuakiga

1I te fitu o masina, a tino Isalaelu katoa ko nofo katoa i olotou fa'kai.

2Eso 27.1 Tena la, ne maopoopo katoa latou i Ielusalema, kae ne toe faite a te fata-fai-taulaga ne Iosua te tama tagata a Iosataka, mo ana taina faitaulaga, mo Selupapelu te tama tagata a Salatielu fakatasi mo ana kaiga, ko te mea ke toe mafai ne latou o sunu olotou taulaga i ei, e pela eiloa mo fakatonuga kola e tusi i te Tulafono a Mose, te tagata o te Atua.

3Nume 28.1-8 E ui eiloa e ma'taku a tino Isalaelu kola ne foki mai i te tafeaga i tino kola e nofo atu i te fenua, kae ne toe faite eiloa ne latou a te fata-fai-taulaga i te koga tela ne tu ei muamua. Tena la, ne toe kamata ei latou o toe sunu olotou taulaga i luga i ei i tafataeao mo afiafi takitasi.

4Nume 29.12-38 Ne fakamanatu ne latou a Kaiga Fiafia o Fakamalumalu e pela eiloa mo te masani; i aso takitasi e ofo eiloa ne latou a te taulaga e manakomia mo te aso tena;

5Nume 28.11—29.39 kae ofo atu foki ne latou a taulaga masani ke sunu katoa mo taulaga kola e tau o ofo i te Kaiga Fiafia o te Masina Tu, pela foki i maopoopoga masani kola e tau ei o fai tapuakiga a tino ki te Aliki, e pela foki mo taulaga kola e tuku atu ki te Aliki mo te loto malie.

6E ui eiloa e seki kamata te toe faitega o te Faletapu, kae ne kamata a tino o sunu olotou taulaga ki te Aliki i te po muamua o te fitu o masina.

Ko Toe Faite te Faletapu

7Ne tuku atu ne tino olotou tupe ke togi ei a kamuta, mo tino poto i faiga o galuega ki fatu, kae ave ne latou a meakai mo mea inu mo sinu olive ki fa'kai o Tulo mo Saitonu ke fesuiaki ki lakau ko alasi o Lepanona, kola e fai ke aumai i te tai ki Iopa. A mea katoa kona ne fai mo te saolotoga mai a Kulesa, te tupu o Pelesia.

8Tena la, i te lua o masina i te tausaga mai tua o te tausaga ne foki mai ei latou ki te koga ne tu ei te Faletapu i Ielusalema, ne kamata ei te galuega. A Selupapelu, Iosua, mo tino katoa o te fenua, mo faitaulaga mo te kau sa Levi, mo tino katoa kola ne 'foki mai i te tafeaga ne fesoasoani katoa ki te galuega. A tino o te matakaiga o Levi kola ko luasefulu tausaga te ma'tua o fano ki luga ne fai katoa mo takitaki i te toe faitega o te Faletapu.

9A te tagata sa Levi ko Iesua mo ana tama tagata, mo Katamiela mo ana tama tagata mai te kaukaiga o Hotavia, ne kau fakatasi i te takitakiga o te toe faitega o te Faletapu. Ne fesoasoani ki a latou a te kau sa Levi i te matakaiga o Henatata.

10 1NTupu 25.1 I te kamataga o fakatakato a te fakavae o te Faletapu ne te kau ga'lue, ka ko faitaulaga kola e pei mai ki olotou gatu loa e tu mai i olotou tulaga mo pu i olotou lima, ka ko te kau sa Levi i te kaukaiga o Asafo e tu foki i kona mo olotou sumepalo. Ne vikia ne latou te Aliki e pela eiloa mo fakatonuga i aso o te Tupu ko Tavita.

111NTupu 16.34; 2NTupu 5.13; 7.3; Sala 100.5; 106.1; 107.1; 118.1; 136.1; Iele 33.11 Ne usu ne latou te vikiga o te Aliki, kae fakafokifoki ne latou a te tali o te pese a latou penei:

“A te Aliki e aga'lei, ka ko tena

alofa mō Isalaelu e se gata mai.”

Ne pakalaga katoa a tino ki te mea e mafai ne latou, o viki atu ki te Aliki, me i te galuega o te fakavae o te Faletapu ko kamata o fai.

12A faitaulaga mo tino sa Levi kola ko ma'tua, mo matai o kaukaiga ko oti ne lavea ne latou a te Faletapu muamua, kae i te onoono atuga a latou i te fakatakatoga o te fakavae o te Faletapu tenei, ne 'tagi latou ki luga mo te fanoa'noa, ka ko tino kona i kona e ka'laga mo te fiafia.

13Ko se lagona lei atu eiloa a leo o tino e ka'laga mo te fia'fia mo leo o tino e tagi i te fanoa'noa, me ko oko eiloa i te logoa valevale.