1 KOLINITO 11 - Tuvalu Revised Bible

1 1Koli 4.16; Fili 3.17 Fakaakoako mai ki a au, e pela mo au e fakaakoako ki a Keliso.

Ko te Pulou o te Ulu i Tapuakiga

2E tavae ne au koutou i te mea e masaua faeloa ne koutou au, kae tau'tali foki koutou i akoakoga kola ne fai atu ne au ki a koutou.

3Au e manako ke iloa ne koutou i a Keliso e sili eiloa i tino katoa, a te tagata e sili foki i tena avaga, ka ko te Atua e sili foki i a Keliso.

4Tela la, ko te tagata e 'talo tavae io me folafola atu te muna a te Atua i mua o tino, kae pulou a tena ulu, ko te se ava tena ki a Keliso, tela ko te ulu o te Ekalesia.

5So se fafine foki e 'talo tavae io me folafola atu te muna a te Atua i mua o tino mo tona ulu se pulou, ko te se ava tena ki tena avaga. E pau eiloa mafai e kati 'kila tona ulu.

6Kafai se fafine e se pulou tona ulu, e 'tau la mo ia o kati 'kila tona ulu; kae se mea fakamasiasi ki fafine te kati 'kila olotou ulu; ke 'tau mo te fafine o faka'loa ona laulu, e ufiufi ei tena ulu.

7Kene 1.26,27I te mea, a te tagata e se 'tau mo ia o fakapulou tona ulu, me i a ia ko te 'malu mo te fakatusa o te Atua; ka ko te fafine ko te vikiga o te tagata,

8Kene 2.18-23me i te tagata e seki tupu mai i te fafine, ka ko te fafine ne tupu mai i te tagata.

9E seki fai foki a te tagata mō te fafine, ka ko te fafine ne fai mō te tagata.

10Ona ko agelu, ko 'tau ei o ufiufi a ulu o fafine, e fakaasi ei i a latou e mai lalo o te pulega a olotou avaga.

11I te tou olaga i te Aliki, e se maua ne te fafine o ola eiloa i a ia e aunoa mo te tagata, a te tagata foki e se mafai o ola eiloa i a ia e aunoa mo te fafine.

12E pela mo te fafine ne tupu mai i te tagata, e pena foki a te tagata, ne fanau mai i te fafine; ka ko mea katoa e mai te Atua.

13Ke mafaufau ake eiloa koutou ki ei: se mea 'tau mo se fafine o 'talo tavae ki te Atua kae se pulou tona ulu?

14E seki akoako atu te natula ki a koutou, i te tagata e 'loa ona laulu se mea fakamasiasi ki a ia?

15E a, e se ko te galiga tena ki te fafine ke 'loa ona laulu? Me ne tuku atu ki a ia laulu mo ufiufi tona ulu.

16Kae kafai so se tino e isi sena akoakoga e tai kese mo te mea tenei e akoako atu ne au, konei la aku muna e fai atu ki a ia; tenei eiloa te tu ko masani ei tatou i tapuakiga i Ekalesia.

Ko te 'Kaiga a te Aliki

17I fakatonuga konei mai lalo, e se tavae ne au koutou; i te mea i otou fono faka te Ekalesia e fakatupu ne ia te masei i lo te 'lei.

18A te mea muamua, au ne logo me isi ne mavaevaega i a koutou i otou fono faka te Ekalesia, kae talitonu au me tonu eiloa a nisi tala ko lagona ne au.

19Kati la e isi eiloa ne mavaevaega i a koutou, ko te mea ke matea 'lei ei a latou kola e fai mea tonu.

20Kafai e maopoopo fakatasi koutou, e se ko te 'kaiga a te Aliki tena e 'kai ei koutou.

21I te mea kafai e 'kai koutou, a nisi o koutou e sona 'kai kae inu ki te uaina, masaki atu ei mo isi tino ka ko isi ko konā.

22E seai ne otou fale e 'tau koutou o 'kai kae inu i ei? Io me ko koutou e ma'nako o fakamasiasi te Ekalesia a te Atua, kae fakamasiasi foki a latou kola e mativa? Ne a aku pati ka fai atu ki a koutou? Ke tavae ne au koutou i te mea tenei? Ikai, e se tavae ne au koutou!

23I te mea ne maua ne au mai te Aliki a te akoakoga tela ne tuku atu ne au ki a koutou: me i te po eiloa tela ne fakalata ei a te Aliki, ne puke ne ia te falaoa,

24ko fakafetai, ne tofitofi ne ia, ana muna, “Ko toku foitino tenei ko tuku atu mo koutou, ke fai te mea tenei mo fakamanatuga ki a au.”

25Eso 24.8; Iele 31.31-34; Eso 24.6-8E pena foki i te ipu uaina i te otiga ne 'kai, ana muna, “Ko te ipu tenei o te feagaiga fou i toku toto, ke fai te mea tenei i taimi katoa e inu koutou ki ei, mo fakamanatuga ki a au.”

26Me ko te otou 'kai sale ki te falaoa tenei kae inu ki te ipu, e folafola atu ei ne koutou te mate o te Aliki ke oko ki tena oko mai.

27Tela la, so se tino e kai ki te falaoa io me inu ki te ipu a te Aliki i auala se 'tau, ka nofosala a ia i te agasala i tena fakamasei ki te foitino mo te toto o te Aliki.

28Ke sukesuke ifo a te tino ki a ia eiloa, ka koi tuai o kai ki te falaoa me inu ki te ipu.

29Kae kafai ko te tino e sona kai ki te foitino o te Aliki manafai e kai ki ei, kae sona inu foki ki te ipu o te uaina, ka fakamasino a ia ne te Atua.

30Tena te pogai ko tokouke ei mai i a koutou ko masaki kae vaivai, ka ko 'mate foki a nisi tino.

31Kafai ne sukesuke ifo muamua tatou ki a tatou eiloa, e penei la e se 'nofo tatou mai lalo o te fakamasinoga a te Atua.

32Ka ko tatou, ko fakamasino kae fakasala ne te Aliki, ko te mea ke se fakasala fakatasi tatou mo tino se talitonu.

33Tela la e oku taina, kafai ko potopoto koutou fakatasi o 'kai i te 'kaiga a te Aliki, ke 'kai fakatasi koutou.

34Kae kafai so se tino ko likiliki, e 'tau mo ia o kai i tona fale, ko te mea ke mo a ma fakamasinogina koutou ne te Atua manafai e maopoopo koutou. Kae pela mo nisi feitu ake, ke tuku la ke fakatoka ne au manafai e oko atu au.