1Ne fai te feagaiga fakataugasoa a Solomona mo te tupu o Aikupito, i tena avagaga ki te tama fafine a te tupu tena. Ne aumai ne Solomona te fafine tena ke nofo i te Fa'kai o Tavita, ke oko ki te taimi e palele ei te faitega ne ia o te palesi, te Faletapu, mo te pui o Ielusalema.
2I te taimi tena, e seki ai ei se faletapu kai faite mō te Aliki, tela la, a tino e ofo eiloa olotou taulaga i fata-fai-taulaga kesekese.
3A Solomona e alofa ki te Aliki kae tausi foki ki fakatonuga a tena tamana ko Tavita, kae e 'ta sale foki ne ia a manu kae ofo atu i luga i fata-fai-taulaga kesekese.
4I te taimi e tasi, ne fanatu a ia ki Kipeona o ofo ana taulaga i kona, me i te fata-fai-taulaga takutakua eiloa e tu i kona. E fia ni selau ana taulaga sunu ko oti ne ofo sale ne ia i kona.
5I te po tena, ne fakaasi mai te Aliki ki a ia i te moemiti kae fesili mai ki a ia penei, “Se a te mea e manako koe ki ei ke avatu ne au ki a koe?”
6Ne tali atu Solomona, “A koe e alofa ki toku tamana ko Tavita, tau tavini; a ia se tagata 'lei, kae fakamaoni kae fai mea tonu i tena va feagai mo koe. Ne tumau eiloa tou alofa ki a ia, tela ne tuku atu ei ne koe se tama tagata ki a ia, kae tenei ko fai mo tupu o sui a ia.
7Te Aliki te Atua, ne fai ne koe a au ke sui ne au toku tamana o fai mo tupu, ka ko au koi foliki kae se iloa foki o pulepule.
8Au tenei ko fai mo tupu o te fenua tenei ko oti ne filifili ne koe ke fai mo ou fenua tonu, se fenua tokouke.
9Tela la, tuku mai te poto ki a au ke mafai ne au o takitaki tou fenua i te mea tonu kae ke mafai foki ne au o iloa te mea 'lei mo te mea masei. Ka mafai pefea ne au o taki te fenua tokouke tenei, manafai e seai se poto i a au?”
10Ne fiafia te Aliki ki te fakamolemole a Solomona tena,
11tena ne fai atu ei a ia penei, “Ona ko koe ne fakamolemole mai ke maua ne koe te poto e taki ei te fenua i te mea tonu, kae se ko koloa e uke, mo te ola loa, mo te mate o ou fili,
12tela la, ka fai eiloa ne au te mea e manako koe ki ei. Ka tuku atu ne au ki a koe te poto mo te malamalama tela e seki maua eiloa ne se tino mai ana mua, e seai foki se tino fakamuli ka maua ne ia te poto mo te malamalama tena.
13Ka tuku atu foki ne au ki a koe a mea e seki fakamolemole mai koe ki ei: a koe ka maumea kae fakaaloalogina i tou olaga katoa, e silia atu i tupu katoa.
14Kae kafai e fakalogo mai koe ki a au o tausi aku tulafono mo fakatonuga, e pela mo tou tamana ko Tavita, kae ka fai foki ne au a koe ke ola loa.”
15Ne pula aka Solomona, iloa aka ei ne ia i te Atua ne faipati atu ki a ia i te moemiti. Tena ne fanatu a ia ki Ielusalema tu i mua o te Pusa o te Feagaiga a te Aliki kae ofo atu ana taulaga sunu mo taulaga fakafetai ki te Aliki. Oti aka, fai ei ne ia se 'kaiga ki ana ofisa katoa.
Solomona ko Fakamasino ne ia se Mataupu Faigata16I te aso e tasi, ne o'mai e tokolua fafine tali tagata ki mua o te Tupu ko Solomona.
17Ne faipati aka te fafine e tokotasi penei, “Tou malu, a maua e nofo tasi mo te fafine tenei ne o'mai maua, i te fale e tasi; ne fanau ne au se tamaliki tagata i te fale, ka ko ia e nofo eiloa i ei.
18E lua aso mai tua o te fanauga o taku tama, kae fanau mai foki tena tamaliki tagata. Ko maua tokolua eiloa i te fale i te taimi tena, e seai aka foki eiloa se tino fakaatea.
19I te po e tasi, ne fiti atu a ia, tao eiloa ne ia tena pepe.
20Ne tu aka a ia ki luga, puke aka ne ia taku tama mai oku tafa, ka ko au e to taku moe, ave ei ne ia ki tena moega, kae tuku mai ne ia tena tama tela ko mate ki toku moega.
21I te taeaoakega, i taku pula akega o fagai te tamaliki, ne matea atu ne au me ko mate. Ne kilo faka'lei atu au ki ei, matea ei ne au me e se ko taku tama.”
22Kae muna a te sua fafine penei, “Ikai! A te tamaliki tenei e ola e aku eiloa, ka ko te tamaliki ne mate e a koe eiloa!”
Ne tali atu te fafine muamua penei, “Ikai! A te tamaliki tela ne mate e a koe eiloa, kae e a aku te tama tena e ola!”
Tena, ne fakakinau eiloa laua i mua o te tupu.
23Muna a te Tupu ko Solomona penei, “A koulua nei e fakatau finau i te tamaliki tena e ola mai. E fai mai te sua tino me e a ia te pepe tenei e ola mai, kae fai mai te sua tino me e a ia.”
24Ne uga te fekau a Solomona ke aumai se pelu,
25tena fai atu ei a ia penei, “Vaelua te pepe tena; tuku te afā e tasi ki te sua fafine ka ko te sua afā ki te sua fafine.”
26A te matua tonu eiloa o te pepe, ko oko eiloa i ana alofa ki tena tama, tena ne fai atu ei a ia ki te tupu penei, “Tou malu, fakamolemole, sa tamategina te pepe! Tuku atu ei ki te fafine tena!”
Kae muna a te sua fafine penei, “Sa aumaigina ki se tino i a maua, kae na vaelua atu te pepe tena.”
27Tena ne fai atu ei a Solomona penei, “Sa tamategina te pepe! Tuku atu ki te fafine muamua, me ko ia ko te matua tonu o te pepe.”
28I te logoga o tino Isalaelu i te ikuga ne fai ne Solomona ki te mea tena, ne gasolo ei latou o fakaaloalo a Solomona, me ko iloa ne latou me ko oti ne tuku ne te Atua ki a ia te poto o fakatoka faka'lei a mea e finau sale ei a tino i se auala tonu.
Who We AreWhat We EelieveWhat We Do
2025 by iamachristian.org,Inc All rights reserved.
