1Muna a te Aliki ki a Samuelu, “E gata afea tou fanoanoa ona ko Saulo? Ko oti au ne se manako ki ei ke fai mo tupu o Isalaelu. Kae nei, puke mai ne sinu olive kae fano ki Peteleema, ki te tagata e igoa ki a Iese, me ko oti ne fili ne au se tamaliki mai ana tama tagata ke fai mo tupu.”
2Ne fesili atu Samuelu, “E mafai pefea ne au o fai te mea tena? Kafai e logo Saulo i te mea tena, ko au ka tamate ne ia!”
Ne tali atu te Aliki, “Puke se tamā pulumakau, kae fai pela i a koe ne fano o ofo te taulaga ki te Aliki.
3Kami atu a Iese ki te faiga o te taulaga, kae ka fakasino atu ne au te mea e tau o fai ne koe. Ka faū ne koe ke fai mo tupu a te tino tela e fakasino atu ne au.”
4Tena, ne fai eiloa ne Samuelu te mea ne fai atu ne te Aliki, tena ne fanatu ei a ia ki Peteleema, kae olo atu ki a ia a takitaki o te fa'kai, ko pole'pole eiloa i te mataku, kae fai atu ki a ia penei, “Te pelofeta, a koe na ne vau i se feitu 'lei?”
5Ne tali atu Samuelu, “Ao. Au ne vau o ofo atu se taulaga ki te Aliki.” Ne fai foki a ia ki a Iese mo ana tama tagata ke faka'ma olotou foitino, kae ne kami ne ia latou ke o'mai ki te faiga o te taulaga.
6I te okomaiga o Iese mo ana tama tagata, ne matea ne Samuelu a Eliapo, te tama tagata e tokotasi a Iese, tela ne manatu aka a ia penei, “A te tagata tenei e tu mai i mua o te Aliki, kaati ko ia eiloa tela ne filifili ne te Aliki.”
7Kae ne fai atu te Aliki ki a Samuelu, “Sa saga ki tena loa mo tena gali. Se ko ia tena; e se pau taku filifiliga mo te filifiliga a te tagata. A te tagata e kilo ki te gali o te feitu ki tua, ka ko au e kilo ki te loto o te tino.”
8Ne kalaga atu a Iese ki tena tama ko Apinatapu, aumai ei ne ia ki a Samuelu. Kae ne fai atu Samuelu, “ikai, se tena te tino ne fili ne te Aliki.”
9Ne toe puke mai ne Iese tena tama ko Sama, kae fai atu Samuelu, “ikai, se ko ia foki tena ne fili ne te Aliki.”
10Ne puke fakasolosolo mai ne Iese ana tama e toko fitu ki a Samuelu, kae ne fai atu Samuelu ki a ia penei, “ikai, e seai se tino i a latou kona ne fili ne te Aliki.”
11Tena ne fesili atu ei a Samuelu ki a Iese penei, “Koi isi ne au tama tagata aka fakaatea?”
Ne tali atu a Iese, “'Toe nei ko te toekimuli fua, kae tela loa e tausi mamoe i tua o te fa'kai.”
Muna a Samuelu, “Fai ki ei ke vau. Tatou e faka'tali eiloa ke oko mai, ko ofo ei te taulaga a tatou.”
12Tena ne uga ei te fekau a Iese ki ei ke vau. A ia tena, se tamataene malosi kae taulekaleka. Muna a te Aliki ki a Samuelu. “Ko ia tena, faū atu a ia!”
13Ne puke aka ne Samuelu te sinu olive, faū eiloa ne ia a Tavita i mua o ona taina. I kona foki eiloa, ko Tavita eiloa ko ulufia ne te agaga o te Aliki, kae ne nofo eiloa i a Tavita mai te aso tena o fano ki mua. Oti aka, ko Samuelu eiloa ko foki atu ki Lama.
Ko Tavita i te Palesi o Saulo14Ne fano keatea te agaga o te Aliki mai i a Saulo, kae ulu atu ki ei te agaga masei tela ne uga ne te Aliki ki ei, tela ne fakapuapuaga ne ia a Saulo.
15Ne fai atu ana tavini ki a ia penei, “E iloa ne matou me ko te agaga masei tenei ne uga atu ne te Atua, tena e fakafi'ta ne ia koe.
16Tela la, tou malu, fai mai se fakatonuga ke sala ne matou se tagata e poto i te tata kitala. Kafai ko ulu atu te agaga masei ki a koe, kae ka tata te kitala a te tagata tena, kae ka toe 'lei koe.”
17Tena ne fakatonu atu ei a Saulo ki a latou penei, “Sala mai se tagata e poto i te ta kitala o aumai ki konei ki a au.”
18Ne fai te tavini tokotasi a ia penei, “E isi se tama tagata a Iese, te tagata Peteleema, ko ia eiloa ko poto i te tata lakau. A ia tena se tagata toa kae taulekaleka foki, se sotia 'lei kae poto foki i te faipati. A te Aliki e fakatasi ki a ia.”
19Tena ne uga ei ne Saulo ana avefekau ki a Iese mo te fekau tenei: “Tuku mai tau tama tagata ko Tavita, tela e tausi ne ia mamoe, ke vau ki a au.”
20Tena ne uga atu ei ne Iese a Tavita ke fano ki a Saulo, kae avatu ne ia ke fano mo ia se tamā kouti, se asini e fakauta ki falaoa, mo te taga e fonu i uaina.
21Ne oko atu a Tavita ki a Saulo, tena galue eiloa i kona. Ne fiafia malosi a Saulo ki a Tavita, tena ne fili ei ne ia ke pukepuke sale ne ia ana mea tau.
22Tena ne uga ei a te fekau a Saulo ki a Iese penei: “Au e fiafia ki a Tavita. Tuku mai a ia ke galue i a au i konei.”
23Mai i te taimi tena, kafai eiloa e oko atu ki a Saulo te agaga masei tela e uga mai sale ne te Aliki, kae puke aka Tavita ki tena kitala o tata, tena ko fano ei te agaga masei, mo Saulo foki ko 'lei mai.
Who We AreWhat We EelieveWhat We Do
2025 by iamachristian.org,Inc All rights reserved.
