FAATAOTO 21 - Tuvalu Revised Bible

1A te Aliki e fakatonutonu ne ia a te mafaufau o te tupu, e pela eiloa mo te fakatonu ne ia te auala e tau o tafe ki ei se vaitafe.

2E isi ne taimi e leake nei koe i au mea e fai e tonu, kae masaua i te Aliki e fakamasino ne ia ou mafaufauga.

3Fai te mea tonu kae lei; a te Aliki e fiafia ki te mea tena i lo te aumai o taulaga ki a ia.

4A tino amio masei e takitakigina ne olotou uiga masei kae fakamatamata; a te mea tena se agasala.

5Fai fakalei au aofaga kae ka uke au mea; kafai e sona gasue fakavave fua koe, e se mafai o uke au mea.

6A te koloa e maua ne koe i faiga se tonu, e vave galo atu fua, kae ko oti ei ne taki ne latou koe 'ke pili ki te mate.

7A tino amio masei ko malaia eiloa i olotou uiga fakasaua; e se manako o fai te mea tonu.

8A tino agasala e sasale i auala pikopiko; a tino amiotonu e fai ne latou te mea tonu.

9E sili atu te nofo o koe i te tuafale o se fale, i lo te nofo fakatasi mo tau avaga gutu kotekote i loto i te fale.

10A tino amio masei e manako faeloa o fai amioga masei; e seai se tino e alofa latou ki ei.

11Kafai ko fakasala se tagata valea, ka maua ei se akoakoga ki tino, ke oko foki eiloa ki te tino se mafaufau. Ka ko te tagata poto ka tauloto ne ia a mea ne akoako atu ki a ia.

12A te Atua fai mea tonu, e iloa ne ia a mea e tupu i fale o tino amio masei, kae ka aumai ne ia a tino amio masei ke ta fakamasei.

13Kafai koe e se fiafia o fakalogo ki fakatagi a tino mativa, ko tena uiga a tau tagi mō se fesoasoani, e se mafai o lagona.

14Kafai se tino e kaitaua ki a koe, taumafai o ave funa ki ei se meaalofa, ko te mea ke filemu tena loto.

15Kafai ko fai te mea tonu, kae fiafia a tino amio lei, ka ko tino amio masei ka fanoanoa.

16A te mate e fakatalitali mai ki so se tino tela e kalo keatea mai i te mafaufauga lei.

17A te tino e fiaola i se olaga maumea, o inu i uaina, kae kai ki meakai gali — e se mafai ne mea kona o fai te tino tena ke maumea.

18A tino amio masei e aumai fua ne latou ki a latou eiloa a puapuaga kola e taumafai latou o fakaoko ki tino amio lei.

19E sili atu tou nofo i te toafa, i lo te nofo o koe mo tau avaga gutu kotekote kae gutu muimui.

20A tino poto e nofo i te olaga maumea kae gali, ka ko tino valea e vave oti fua olotou tupe ne fakaaoga valevale.

21Taumafai ke maua ne koe te loto alofa kae fai mea tonu, kae ka ola leva koe; ka fakaaloalogina koe ne tino kae fai fakalei ne latou a koe.

22A te takitaki atamai e mafai o puke ne ia a te fa'kai tela e pulu ne tagata malosi, kae ofa ne ia a pui kola e fakalagolago ki ei latou.

23Kafai koe e manako ke mao keatea mo fakalavelave, masaua la o fakaeteete i au muna e fai.

24Fakaasi mai ki a au se tino valea, kae ka fakaasi atu ne au te tino amio fakamatamata kae seai se mafaufau.

25A te tagata paie kae ita ma galue e fai fua ne ia a ia ke mate;

26a tena mea e fai i taimi katoa ko te mafaufau ki mea e manako ki ei. A te tagata amiotonu e mafai o tufa atu ana mea mo te loto alofa.

27A te Aliki e se fiafia ki tino amio masei kola e ofo atu olotou taulaga kae isi ne fakamoemoega masei i olotou loto.

28A te molimau a te tagata gutu loi e se mafai o talitonu ki ei a tino, ka ko te muna a te tagata mafaufau e talia gofie ne tino.

29A tino amiotonu e talitonu i a latou e lei, ka ko tino amio masei e taumafai o fai pela i a latou ko oko eiloa i te maluga.

30A te poto, te atamai mo te mafaufau faka te tagata e seai se aoga manafai te Aliki e se fiafia ki a koe.

31E mafai ne koe o aumai a solofanua o fakatoka mō se taua, kae ko te Aliki eiloa e aumai ne ia te manumalo.