IOPU 10 - Tuvalu Revised Bible

1Au ko fita i te olaga nei. Fakalogo mai ki toku se malie.

2Te Atua, sa fakamalaiagina au.

Taku mai me se a taku mea se ne fai?

3Mata se mea lei ke saua koe pena?

Ke takalialia ki te mea ne faite foki eiloa ne koe?

Ka oti ko kata ei koe ki togafiti a tino amio masei?

4E a, e pau tau kiloga mo te kiloga a te tagata?

5E mata e toetoe tou ola e penei mo te ola o matou?

6Ai a la e salasala ei koe ki aku agasala katoa?

Ai a e sukesuke ei ne koe aku mea se katoa ne fai?

7E iloa ne koe i a au e se se, e iloa foki ne koe me e

Seai se tino e mafai ne ia o fakasao au mai i a koe.

8Au ne faite ne koe ki ou lima,

Ko lima foki kona ne ta fakamasei ei au.

9Masaua i a au ne faite ne koe mai i te one;

E a, ka toe tukipala ne koe au ke toe liu one au?

10Ne avatu ne koe te malosi ki toku tamana ke fakafua ei au;

Ne puti ake ne koe au i te moegatama o toku matua.

11Ne faite ne koe toku foitino ki ivi mo uaua,

Kae ufi ne koe a ivi ki kano mo pakili.

12Ne aumai ne koe ki a au te ola,

Ne tumau foki tou alofa ki a au,

Ko tau tausiga tenei e fakatumau ei toku ola.

13Kae nei, ko iloa ne au i a koe ne mafaufau muni ke fakapakia ne koe a au.

14Ne alamati ne koe te taimi e agasala ei au,

Ko te mea ke se fakamagalo ne koe a au.

15I te taimi eiloa e agasala ei au,

Ko au eiloa ko fakasala ne koe,

Kae kafai e fai ne au te mea tonu,

E seai se taui e maua ne au.

Au ko puapuaga kae ko masiasi masei eiloa.

16Kafai e manuia au i se mea, kae vau koe o sala au o ta, e pela koe me se leona;

E fakaaoga foki eiloa ne koe a vavega o ta ei au.

17E isi faeloa ne molimau a koe e uiga ki toku se lei;

A tou ita ki a au, e gasolosolo ake eiloa o lasi;

E fai faeloa au fuafuaga fou e ta ei au.

18Te Atua, ai a ne tuku mai ei ne koe au ke fanau ki te lalolagi nei?

Au ne 'tau eiloa o mate atu kae seki lavea oku mata ne tino.

19A te fanatu mai i te moegatama ki te tanuga se mea tafasili i te lei,

E pela eiloa moi ne seki tupu mai lele eiloa.

20E a, e se pili nei au ki te mate? Tuku mai au ke filemu!

Tuku mai au ke fiafia i mu taimi o oku konei koi toe.

21Se leva nei ko fano ei au, se toe foki mai eiloa;

Au e fano ki te fenua pouli kae seai se mainaga i ei.

22Se fenua o te pouliga mo te fenumiaki valevale,

A te mainaga i ei ko te pouliga.