1 TUPU 18 - Tuvalu Revised Bible

Ko Elia mo Pelofeta a Paala

1I te tolu o tausaga o te seaiga o ne vai, ne faipati mai ei a te Aliki ki a Elia penei, “Fano o fakailoa atu ki te Tupu ko Aapo me ka faka'to ne au a te vaiua.”

2Tena, fano ei a Elia.

A te oge vai i Samalia ko oko eiloa i te fai malosi,

3tena ne kalaga atu ei a Aapo ki a Opetaia, tela e tausi ne ia a te palesi. A Opetaia, ko ia eiloa ko fakamaoni o tapuaki sale ki te Aliki.

4I te taimi ne 'ta ei ne Iesepela a pelofeta a te Aliki, ka ko Opetaia ne puke ne ia e toko‐selau o faka'muni i loto i ana, i vaega e lua, e taki tinolima i te vaega e tasi. E fagai kae fainu foki eiloa ne ia.

5Muna a Aapo ki a Opetaia penei, 'vau ke olo taua o onoono aka ki vaitafe foliki mo takele papa o vaitafe i te fenua, me e isi ne mouku e ola i ei mo fagai a solofanua mo miula. Kafai e isi ne mouku, kaati ko se 'tau ei o 'ta o'tou manu.”

6Ne fakatau olo laua ki kogā koga o te fenua ne loto laua ki ei, sua tino ki te sua feitu ka ko te sua tino ki te sua feitu.

7Ne fanatu Opetaia i tena auala, fetaui ei mo Elia. Ne lavea ne Opetaia a Elia, ifo atu a ia i ona mua kae fesili atu penei, “A koe na ko Elia eiloa?”

8Ne tali atu Elia, “Ao, au ko Elia eiloa. Fano nei o fai ki tou pule ko te tupu, i a au tenei e nofo i konei.”

9Ne tali atu Opetaia, “Se a taku mea ne fai, tenei ko fai ei ne koe a au ke tamate ne te Tupu ko Aapo?

10I te igoa o te Aliki ola, tou Atua, au e tauto me i a koe ne sala ne te tupu ki fenua katoa o te lalolagi. Kafai ko fakailoa mai ne takitaki o malo kesekese i a koe e galo i te lotou fenua, ka ko Aapo e manako eiloa ke tauto atu a takitaki o fenua taki‐tasi ki a ia i a koe e se nofo i olotou fenua.

11Kae nei, ko manako koe ke fano au o fai ki te tupu i a koe tenei e nofo i konei.

12Kae fai la pefea manafai e ave koe ne te agaga o te Aliki ki se koga 'mao i te taimi e fano ei au mai i konei? Tena la, kafai e fai au ki a Aapo i a koe tenei e nofo i konei, kae vau nei, a koe e galo i konei, ko tamate ei ne ia a au. Masaua i a au nei se tino e masani sale o tapuaki mo te fakamaoni ki te Aliki talu mai taku folikiga.

13E seki logo koe i te tamatega ne Iesepela a pelofeta a te Aliki, kae ne faka'muni ne au e tokoselau pelofeta i ana, i vaega e lua, e taki tinolima i te vaega e tasi, kae fagai kae fainu foki ne au?

14Tela la, e fakatonu mai pefea koe ki a au ke fano au o fai ki te tupu i a koe tenei e nofo i konei? Kaati e iku au o tamate ne ia!”

15Ne tali atu Elia, “I te igoa o te Aliki Maluga tela e tavini au ki ei, au e tauto me ka fakaasi eiloa au ki te tupu i te aso nei.”

16Tena, ne fano ei a Opetaia ki te Tupu ko Aapo o fai ki ei, tena ne fanatu ei a Aapo o fakafetaui ki a Elia.

17I te laveaga ne Aapo a Elia, muna a ia penei, “Tena ei koe te tagata faka'tupu fakalavelave i luga i Isalaelu!”

18Ne tali atu a Elia, “Se ko au te tagata faka'tupu fakalavelave, ko koe mo tou tamana. A koe ko se fakalogo ki te fakatonuga a te Aliki, kae ko tapuaki atu ki fakatusa o Paala.

19Fakatonu atu ki tino Isalaelu katoa ke fakafetaui mai ki a au i te Mauga o Kalamelu. Fai atu ki pelofeta a Paala kola e faselau limasefulu, mo pelofeta a Asaila kola e faselau kola e kau i ei a te Tupu fafine ko Iesepela ke mai katoa.”

20Tena, ne uga te fekau a Aapo ki tino Isalaelu katoa mo pelofeta a Paala ke maopoopo atu ki te Mauga o Kalamelu.

21Ne fanatu Elia ki te vaitino, muna a ia penei, “Ko afea e fai ei ne koutou se filifiliga tonu? Kafai te Aliki ko te Atua, tapuaki atu ki ei; kae kafai te Atua ko Paala, tapuaki atu ki ei.” Ka ko tino e se faipati eiloa.

22Muna a Elia, “Ko au fua tokotasi nei te pelofeta a te Aliki e toe, kae e faselau limasefulu pelofeta a Paala.

23Aumai se avā pulumakau; ko pelofeta a Paala ke puke ne latou te pulumakau e tasi o tamate, katikati kae tuku ki luga i fafie, kae ke se faka'ka se afi. Ka fai foki ne au pena te sua pulumakau.

24Tena la, ko pelofeta a Paala ke talo ki te lotou atua ke faka'ka te taulaga a latou; au foki e talo ki te Aliki toku Atua ke faka'ka taku taulaga. Kafai e ka te taulaga a pelofeta a Paala, ko ia ko te Atua, kae kafai ko taku taulaga e ka, ko te Aliki ko te Atua.”

Tena, ne ka'laga katoa ei a tino o fakaasi te lotou loto ma'lie.

25Muna a Elia ki pelofeta a Paala, “Fakatoka mua te pulumakau a koutou i a koutou e tokouke. Sa faka'ka ne koutou se afi ki te otou taulaga, kae 'talo ki te otou atua ke faka'ka ne ia.”

26Tena, ne puke mai ne latou te pulumakau a latou, katikati, kae tuku ki luga i te fata-fai-taulaga a latou, kae talo atu ki a Paala ke faka'ka te taulaga a latou. Ne ka'laga latou penei, “Paala, tali mai ki a matou!” Kae e sakasaka eiloa latou i tafa o te fata-fai-taulaga tena ne faite ne latou. Kae e seai eiloa se tali.

27I te tutonu, ko Elia eiloa ko kamata o fakalili a pelofeta kona. Muna a ia, “Talo malosi! A Paala se atua eiloa! Se taumate kaati na koi fai sena miti, io me koi fano ki sena fekau, io me kaati ne fano ki se koga! Io me kaati nei e moe fua, kae e tau o fagu mua ne koutou!”

28Tena ne talo malosi eiloa a pelofeta a Paala, kae katikati olotou foitino ki naifi mo sifi, e pela eiloa mo faigā tapuakiga a latou, tena ko sali valevale ei a toto mai olotou foitino.

29Ne fai eiloa olotou tāga kona ke oko eiloa ki te fakaafiafi; kae seai eiloa se tali io me se mea ke lagona atu.

30Tena, muna a Elia ki te vaitino, “Soloki mai ke pili mai koutou ki a au.” Tena ne maopoopo atu katoa eiloa i ona tafa. Ne toe fakafou aka ne ia a te fata-fai-taulaga a te Aliki tela ne masei.

31

38Ne aumai ne te Aliki a te afi, tena ne sunu ei a te taulaga, mo fafie mo fatu, ne 'paku foki mo te laukele, masapakupaku foki ei te vai i te lua.

39I te laveaga ne tino a te mea tena, ne ka'laga ei latou penei, “Te Aliki ko te Atua; te Aliki fua tokotasi ko te Atua!”

40Ne fai te fakatonuga a Elia penei, “Puke mai a pelofeta a Paala, seai se pelofeta e fakasao!” Tena ne puke mai latou katoa ne te vaitino, 'taki atu ei latou ne Elia ki te vaitafe o Kisona, tena ne tamate ei ne latou a pelofeta kona.

Ko Gata te Oge Vai

41Muna a Elia ki te Tupu ko Aapo penei, “Na fano o kai. Ko lagona nei ne au te gulu o te vaiua lasi ko pili o oko mai.”

42Iako 5.18 I te fanoga a Aapo o kai, ka ko Elia ne kake atu ki te ulu o te Mauga o Kalamelu. Ne punou ifo a Elia ki lalo,

43kae fai atu ki tena tavini, “Fano o kilo pela ki te tai.”

Ne fano te tavini kae foki mai, muna a ia, “E seai se mea e lavea ne au.” E fitu taimi ne fai sale Elia ki tena tavini ke fano o onoono ki te tai.

44I te fitu o taimi, ne foki mai te tavini, ana muna, “Ne lavea ne au se kaumana foliki e pela eiloa me se lima o te tino i te lasi, kae e fanake mai i te kapakapālagi.”

Ne fakatonu atu Elia ki tena tavini penei, “Fano ki te Tupu ko Aapo kae fai ki ei ke na sopo ki tena kaliota o foki ki tena fale i a ia ma maua ne te vaiua.”

45I mu taimi eiloa kona, ko te lagi eiloa ko soko i kaumana uli, mo te matagi ko agiagi, ko te vaiua lasi eiloa ko tō ifo. Ne sopo Aapo ki luga i tena kaliota, foki atu eiloa ki Ieseleelu.

46Ne oko mai te 'mana o te Aliki ki a Elia; ne faka'mau faka'lei ona gatu ki tena taugasulu kae tele atu i mua o Aapo ki Ieseleelu.