2 SAMUELU 2 - Tuvalu Revised Bible

12A Apinelu mo ofisa a Isoposeta ne olo atu mai Manaima ki te fa'kai o Kipeona.

13A Ioapo, te tama a te fafine e igoa ki a Seluia, mo ofisa a Tavita ne fakafetaui atu ki a latou i pugāloto vai, tena saga'saga ei latou i kona, te sua potukau i te sua feitu o te pugaloto vai tena, ka ko te sua potukau i te sua feitu.

14Muna a Apinelu ki a Ioapo, “Tuku mai ne tamataene mai a koutou ke fe'paki mo ne tamataene mai a matou.”

Ne tali atu Ioapo, “Ko 'lei.”

15Tena, e tinogafulu mo te tokolua mai te kau a Isoposeta tela e sui mai i te matakaiga o Peniamina, ne taua atu mo te tinogafulu mo te tokolua mai te kau a Tavita.

16Ne fakatau puke atu eiloa taki vasoa kona, fakatau suki eiloa olotou soa, tena, ne siga katoa eiloa te tinolua mo te tokofa kona ki lalo, mate katoa eiloa. Tena la, a te koga tena i Kipeona e fakaigoa ko te “Laukele o Pelu.”

17Tena, ko te mea eiloa ko taua a Apinelu mo tena kau mo te kau a Tavita, kae ne takavale a Apinelu mo tena kau.

18A tamaliki tagata a Seluia kola e tokotolu: ko Ioapo, Apisai mo Asaelu ne nofo i kona. A Asaelu, tela ko ia eiloa ko makini pela me se tia,

19ne afuli ne ia Apinelu, tele tonu atu eiloa ki a ia.

20Ne kilo ifo Apinelu ki ona tua kae fai aka penei, “A koe na ko Asaelu?”

Ne tali atu Asaelu, “Ao.”

21Muna a Apinelu, “Sa vau o afuli au! Fanatu o afuli se sotia o fao ana mea.” Ka ko Asaelu ne fanatu eiloa o afuli a ia.

22Tena, ne toe fai atu Apinelu ki a Asaelu penei, “Sa vau o afuli au! Sa faigina se mea ke tamate koe ne au. E se mafai ne au o fakafesagai ki tou taina ko Ioapo manafai e tamate koe ne au.”

23Ka ko Asaelu e tele atu eiloa; tena ne velo atu ei ne Apinelu tena tao tu eiloa i te tinae o Asaelu, kae sae ki tua. Ne siga ifo Asaelu, mate eiloa, ka ko tino katoa kola ne o'mai ki te koga tena e takato ei a ia, ne tu i te koga tena.

24Ka ko Ioapo mo Apisai ne olo o sala Apinelu, kae i te tōga o te la, ne oko atu ei laua ki te Mauga o Ama, tela i te feitu ki te saegala o Kia, i te auala ki te vao o Kipeona.

25Ne toe maopoopo a tagata Peniamina ki a Apinelu, kae toe fakatoka mo se taua i luga i te koga maluga.

26Ne kalaga atu a Apinelu ki a Ioapo penei, “E a, ka taua faeloa tatou ki te se gata mai? E se iloa ne koe me kafai ko oti aka te tou taua, ko te fanoanoa fua ka maua ne tatou? A tatou ne tino o te fenua e tasi. E fai mafea koe ki tau kau ke sa toe o'mai o afuli matou?”

27Ne tali atu Ioapo, “Au e tauto i te igoa o te Atua ola, me moi ne se faipati mai koe, penei e afuli faeloa koutou ne taku kau ke oko ki te taeao.”

28Tena, ne fakatagi ne Ioapo te pu e fakailoa ei ki tena kau ke sa toe olo o afuli a te kau Isalaelu, tena ne gata ei te lotou taua.

29Ne ma'laga atu Apinelu mo tena kau i loto i te Vanu o Iolitana i te po katoa tena; ne olo atu latou ki te sua feitu o te Vaitafe o Iolitana, ma'laga atu i te taeao katoa o te aso fou tena, tena oko atu ei latou ki Manaima.

30Ne gata te afuliga a Ioapo i te kau a Apinelu, tena, fakamaopoopo ei ne ia tena kau kae lavea aka nei, e tinogafulu mo te tokoiva a tino i tena kau e galo, fakatasi mo Asaelu.

31E toluselau onosefulu tagata i te kau a Apinelu mai i te matakaiga o Peniamina, ne 'ta ne te kau a Tavita.

32Ne puke mai ne Ioapo mo tena kau a te foitino o Asaelu, o ave o tanu i te tanuga o te kaiga i Peteleema. Tena, ne ma'laga atu latou i te po katoa tena, kae i te vaveao ne oko atu ei latou ki Hepelona.