FAILAUGA 12 - Tuvalu Revised Bible

1Tela la, ke masaua te Atua ko te tufuga, i aso konei koi tupu ake ei koutou, me kafai e oko mai aso ka toeaina ei koutou, ka fai aka ei otou muna penei, “Ko seai soku fiafia i te olaga tenei.”

2Ko te taimi tena ka se maina malosi ei a te mainaga o te la mo te masina mo fetu ki a koe, mo kaumana vaiua ka se mafai o ma'tafi keatea.

3Tena la, ko ou lima kola ne puipui sale ei ne ia koe ka pole'pole, mo ou vae ma'losi ka gasolo o vaivai. A ou nifo ka se uke malosi, ko se maua ei ne koe o lamu faka'lei au meakai, mo ou mata ka se kite faka'lei.

4A ou taliga ka se lagona a mea e tupu i auala. Ka tai se lagona foki ne koe a te tagitagi o te mea solo saito i te taimi e solo ei saito, mo te leo o lakau fakatagitagi i te taimi e fakatagi ei, ka ko te leo o te manu e usu pese ka mafai o fagu ne ia a koe mai tou moe.

5Ka mataku sale koe o fano ki koga maluga, kae ka mataku foki koe i te sasale sale. A ou laulu ka sinā; ka se maua eiloa ne koe o 'tolo ki se koga, kae ka se toe ai se mea e manako malosi koe ki ei i te lalolagi tenei.

Ka olo atu matou ki te koga malolo o matou, kae ka tagi fanoanoa a tino i auala.

6A te filifili siliva ka motu, ka ko te mōli aulo ka to kae mafā; ka motu a te lopu e asu ei a vai i te vaikeli, mo te tiā vai ka malikiliki eiloa.

7Ka foki atu tou foitino ki te pefu o te lalolagi, ka ko te manava o te ola ka toe foki atu ki te Atua, tela ne aumai ne Ia ki a tatou.

8Muna a te Failauga, ko oko eiloa i te se aoga, e se aoga lele eiloa.

Ko te Fakaotiga

9A te Failauga se tagata e poto, tena ne akoako eiloa ne ia a tino ki mea e iloa ne ia. Ne tauloto ne ia a muna fakatusa kae tofotofo foki eiloa ne ia me ne mea tonu me ikai.

10A te Failauga ne taumafai o sala a muna fakamafanafana loto, ka ko muna ne tusi ne ia ki lalo ne muna tonu eiloa.

11A muna a tagata poto e pela me ne lakau e 'kai olotou mata kola e fakaaoga ne tausi mamoe o takitaki ki ei a mamoe, ka ko muna o te poto kola e tuku fakatasi, e tumau eiloa e pela me ne fao ne tuki. A mea kona ne aumai ne te Atua, te Tausi Mamoe o tatou katoa.

12Taku tama, e isi te sua mea e tau o onoono faka'lei koe ki ei. E seai se gatamaiga o te tusitusiga o tusi, kae kafai ko to tauloto malosi koe, ka fi'ta foki koe.

13I te otiga ne kilokilo au ki mea katoa kona, e tasi eiloa taku muna e fai atu: Mataku ki te Atua, kae tausi ki ana fakatonuga, me e tena eiloa te pogai ne faite ei a te tagata.

14A te Atua ka fakamasino eiloa ne ia tatou i 'tou mea katoa e fai, me ne mea 'lei io me ne mea masei, ke oko foki eiloa ki mea e fai 'funa.