1Ko 'fonu toku mafaufau i muna gali,
Ka koi fakatoka ne au te pese tenei mō te tupu.
A toku laulaufaiva ko toka mo te pese,
E pela me se 'peni a te tino tusilima 'lei.
2A koe ko te tagata e sili i te taulekaleka i tagata katoa;
A koe se tagata poto i te faipati.
Ne fakamanuia faeloa te Atua ki a koe.
3Te tupu malosi, fakamau faka'lei tau pelu;
A koe e 'malu kae maluga.
4I tou 'malu, fano mo te manumalo;
Puipui te mea tonu mo te fai mea tonu!
Ko tou malosi ka maua ei ne koe a manumalo lasi!
5A matasana a koe e makai'kai, e suki ei a fatu o ou fili;
A malo ka siga kae tafola i lalo i ou vae.
6 Epe 1.8,9 A te malo tela ne tuku atu ne te Atua ki a koe,
Ka tumau ki te se gata mai, se gata mai eiloa.
E pule koe i tou malo mo te fai mea tonu;
7E fiafia koe ki te mea tonu, kae takalialia koe i te mea masei.
Tena te mea ne filifilia ei koe ne te Atua,
Tou Atua, kae silia atu te fiafia ne tuku atu ki a koe i lo tupu katoa.
8A ou gatu e fakasausau ki te mulo mo te aloe;
A koe e fakafiafia ne tino fai pese i palesi kola e fakagaligali ki nifo o elefane.
9E isi ne tamaliki fafine a tupu i te kau tamafine i tou palesi,
Ka ko te feitu fakaatamai o tou nofogaaliki e tu ei te kuini,
Tela e tau tena foitino ki teuga aulo e sili i te 'gali.
10Te avaga a te tupu, fakalogo mai ki aku muna,
Fakapuli ou tino mo ou kaiga.
11Ko tou tino gali ka manako ei te tupu ki a koe;
A ia ko tou pule, e 'tau ei mo koe o fakalogo ki a ia.
12Ka aumai ne tino o Tulo ki a koe a meaalofa;
A tino mau'mea foki ka taumafai ke fiafia atu koe ki a latou.
13A te tamaliki fafine a te tupu e nofo i te palesi,
Ko oko eiloa i te tinogali!
A tena gatu ne 'sui ki filo aulo.
14Ko takitaki atu a ia ki te tupu mo ona gatu lanu kesekese,
Ka ko ona taugasoa fafine e tau'tali atu i a ia,
E olo atu foki latou ki te tupu.
15E olo atu latou mo te lifu mo te fiafia,
Ki loto i te palesi o te tupu.
16A koe, toku tupu, ka tokouke au tamaliki tagata ke fai mo tupu,
E sui ei ou tupuga, ka fai ne koe latou mo pule i te lalolagi katoa.
17A taku pese tenei ka fakatumau ne ia tou takutakua ki te se gata mai,
Ka 'viki atu foki ki a koe tino katoa i aso katoa mai mua nei.
Who We AreWhat We EelieveWhat We Do
2025 by iamachristian.org,Inc All rights reserved.
