AMOSA 9 - Tuvalu Revised Bible

Ko te Fakamasinoga a te Aliki

1Ne lavea ne au te Aliki e tu i tafa o te fata-fai-taulaga. Ne fakatonu mai a ia penei: “Kini malosi a ulupou o te Faletapu kae ka gasuesue ei te fapaologa. Kini ke fati a pou ke siga ifo te falealuga ki ulu o tino. Ka tamate ne au a tino e toe mai i kona i te taua. E seai se tino e tele keatea; e seai eiloa se tino e sao.

2E ui eiloa e keli ifo se auala mo latou ki lalo i te lalolagi o tino mate, ka puke mai eiloa ne au a latou i kona. Kafai foki e olo ake latou ki luga i te lagi, ka toe aveifo eiloa ne au a latou.

3Kafai foki e muni latou i luga i te mauga o Kalamelu, ka sala ne au ke maua. Kafai foki e muni latou mai i a au i lalo i te tai, ka fakatonu ne au te manu fekai o te tai ke ū ne ia a latou.

4Kafai foki e ave fakapagota a latou ne olotou fili, ka fakatonu ne au ke tamate a latou. Ko tonu eiloa i au ke 'ta fakapalele a latou kae se fesoasoani ki a latou.”

5Ne fakapatele mai te Aliki te Atua Malosi ki te lalolagi,

Tela ko galulu ei te lalolagi;

Ka ko tino katoa e 'nofo i ei ko fanoanoa.

A te lalolagi katoa ko fanake ki luga kae fanaifo

Ki lalo e pela mo te vaitafe ko te Naila.

6E faite ne te Aliki tena fale i te lagi,

Kae faite ne ia te vanimonimo mai luga aka o te lalolagi

Ne kalaga atu a ia ki suātai o te moana

Kae 'ligi ifo ne ia ki luga i te lalolagi.

A tena igoa ko te Aliki!

7Muna a te Aliki, “Tino o Isalaelu, a au e mafaufau malosi ki tino o Sutana e pela foki eiloa mo koutou. Ne aumai ne au a tino Filisitia mai Keleta, mo tino Sulia mai Kila, e pela eiloa mo te aumaiga ne au a koutou mai Aikupito.

8A au, te Aliki Sili, e kilokilo atu faeloa ki te malo agasala o Isalaelu, kae ka 'ta fakapalele ne au a Isalaelu mai te lalolagi. Kae se fakapalele katoatoa ne au te fanauga a Iakopo.

9“Ka tuku atu ne au te fakatonuga, kae lulu foki ne au a tino Isalaelu e pela mo saito i loto i te mea faka'ma saito. Ka lulu ne au latou mai malo katoa, ko te mea ke galo atu a tino e seai ne olotou aoga.

10A tino agasala i toku fenua ka mate i taua — ko latou kola e fai ake pela, ‘E se mafai ne te Atua o fakaoko mai se fakalavelave ki a tatou.’ ”

Ko te toe Atiakega o Isalaelu i Aso Fakamuli

11 Galu 15.16-18 Muna a te Aliki, “E oko mai te aso ka toe fakatu ei ne au a te malo o Tavita, e pela me se fale ne maofa valevale. Ka toe fakafou ne au ona pui kae toe fakatu ake. Ka toe faite ne au ke lei e pela eiloa mo tena tulaga i aso ko teka.

12Tela la, ka puke malo ne tino Isalaelu a mea koi 'toe i te fenua ko Etoma, e pela foki mo fenua katoa ne fai mo oku i aso mua.” Kona a muna a te Aliki tela ka fakatupu ne ia a mea kona.

13Muna a te Aliki, “Ka oko mai aso

Ka vave o 'tupu a saito,

Kae tuai te katiga.

Ka vave o ma'tua te taukai vine

Kae tuai te faitega o te uaina.

Ka 'to ifo mai mauga te uaina magalo,

Ko 'tafe atu ei ki mauga foliki.

14Ka toe fakafoki mai ne au oku tino ki te lotou fenua.

Ka toe faite ne latou olotou fa'kai ne māofa valevale.

Ke 'nofo latou i ei;

Ka toki ne latou a togavine ke inu uaina ei latou;

Ka toki foki ne latou a fatoaga ke kai latou i fuataga o lakau.

15Ka avatu ne au oku tino ki te laukele ne tuku atu ne au ki a latou,

Kae ka se mafai o toe ave keatea a latou.”

Kona a pati a te Aliki te otou Atua.