1-2A Kola, te tama tagata a Isala, mai i te kaukaiga o Koate, i te matakaiga o Levi, ne fia toa o teke atu ki te takitakiga a Mose. Ne 'kau mai ki a ia e tokotolu tino mai i te matakaiga o Leupena— ko Tatano mo Apilamo, kola ko tama tagata a Eliapo, mo Ono, te tama tagata a Peleti—mo te 250 o nisi tino Isalaelu, kola ne takitaki lauiloa ne filigina ne te fenua.
3Ne maopoopo atu latou ki mua o Mose mo Alona, kae fai atu penei, “Ko to silia katoa te lua mea tenei e fai! A tino Isalaelu katoa e o te Aliki, ka ko te Aliki e fakatasi mai ki a tatou katoa. Mose, ai a e fia pule ei koe i luga o te fenua katoa o te Aliki?”
4I te lagonaga ne Mose a pati kona, fakasiga ifo eiloa a ia ki lalo i te laukele o talo.
5Oti aka, fai atu ei a ia ki a Kola mo latou kola e kau i a Kola penei, “I te taeao ma taeao, ka fakaasi mai ne te Aliki a te tino tela ne filifili ne ia; a te tino tela ne filifili ne ia ka talia ne ia ke fanatu ki a ia i te fata-fai-taulaga.
6-7I te tafataeao ma taeao, a koe mo tau potukau, puke a ulo afi, tuku ki loto a malala 'ka mo mea faka-manogi, kae ave ki te fatafaitaulaga. I kona, ka lavea ei ne tatou, me ko oi i a tatou ne filigina ne te Aliki. Ko koutou tino Levi, ko to silia te otou gasuega.
8Ne faipati atu eiloa a Mose ki a Kola, muna a ia, “Fakalogo mai, koutou tino sa Levi!
9A koutou e manatu mamā ki te filifiliga o koutou ne te Atua o Isalaelu mai tino katoa o Isalaelu, ke mafai ne koutou o tavini atu ki te Aliki i tena Faleie, kae fai foki ne koutou a galuega mo tino Isalaelu katoa?
10Tena te tofi taua ko oti ne tuku atu ne te Aliki ki a koutou, kae nei ko manako foki koutou ki te tofi faitaulaga!
11A te se ma'lie o koutou ki a Alona, ko te otou teke tena ki te Aliki.”
12Tena, ne uga ei a te fekau a Mose ki a Tatano mo Apilamo, kae ne tali mai laua penei, “Maua se olo atu!
13Ko oti ne aumai ne koe matou mai te fenua laukele ola o Aikupito ke tamate matou i te vao tenei, se a foki te mea ko manako mai nei koe ki ei? E a, ko manako foki koe ke fai koe mo aliki o matou?
14E seai eiloa se fenua laukele ola kai oko matou ki ei, e seai foki ne fatoaga mo togāvine kai aumai ne koe ma matou, kae nei ko taumafai koe o fakaloiloi matou. A matou se olo atu!”
15Ne kaitaua Mose, tela ne fai atu ei ki te Aliki penei, “Sa taliagina se taulaga a tino konei. E seai eiloa se mea 'se kai fai ne au ki a latou; e seai foki eiloa se asini a latou kai puke ne au.”
16Muna a Mose ki a Kola, “Taeao ko o'mai koutou mo te luaselau limasefulu tino kona e kau mo koe ki te Faleie o te Aliki; a Alona e vau foki ki kona.
17Ka puke otou ulo, tuku ne mea faka'manogi ki ei, ko ofo atu ei i luga i te fata-fai-taulaga.”
18Tena, ne mai katoa latou mo olotou ulo, fao atu ki ei mo malala ka mo mea manogi, tu ei i te mataloa o te Faleie o te Aliki, fakatasi mo Mose mo Alona.
19Tena, ne fakamaopoopo ne Kola a te fenua katoa, kae tu faka fesagai ki a Mose mo Alona i te mataloa o te Faleie. Tena, ko te mainaga eiloa o te Aliki ko sae mai ki tino Isalaelu katoa,
20tena ne fai mai ei a te Aliki ki a Mose mo Alona penei,
21“Fakamao atu keatea mo tino kona me ka tamate nei ne au a latou.”
22Ka ko Mose mo Alona ne punou ifo ki lalo i te laukele, kae fai atu penei, “Te Atua, a koe ko te pogai o mea ola katoa. E a, ka kaitaua eiloa koe ki te fenua katoa ona ko te agasala a te tino tokotasi?”
23Muna a te Aliki ki a Mose,
24“Fai atu ki tino ke fakamao keatea mai faleie o Kola mo Tatano mo Apilamo.”
25Tena, ne olo atu ei a Mose mo takitaki o Isalaelu ki a Tatano mo Apilamo.
26Muna a Mose ki tino Isalaelu, “Faka'mao keatea mo faleie o tino masei kona, kae sa puke eiloa ki se mea a latou, i a koutou ma malaia fakatasi mo latou.”
27Tena, ne faka'mao keatea ei latou mo faleie o Kola, mo Tatano, mo Apilamo.
A Tatano mo Apilamo ko tu nei i tua o mataloa o la faleie, mo o la avaga mo la tamaliki.
28Muna a Mose ki te fenua o Isalaelu penei, “Tenei te faiga ka iloa ei ne koutou i a au ne uga mai ne te Aliki o fai a mea katoa konei, kae e se ko taku filifiliga ke fai ne au a mea konei.
29Kafai e mate a tagata konei me ko oko atu eiloa ki a latou te mate, kae e se se fakasalaga mai i te Atua, ko tena uiga au e seki uga mai ne te Aliki.
30Kae kafai ko fai ne te Aliki se mea fakaofoofogia o vae a te laukele ke to a tagata kona ki loto i ei, kae ave ola ki te fenua o tino mate, ka iloa ei ne koutou i tagata konei ne teke ki te Aliki.”
31I te otiga o te faipatiga a Mose, ko te laukele eiloa tela e tu ei a Tatano mo Apilamo ko mavae lua
32tena to atu eiloa a laua ki loto i ei mo o la kaiga, fakatasi mo Kola mo latou kola e tau'tali i a ia, pela foki olotou mea katoa.
33Tena ne ave ola eiloa a latou kona mo olotou kope katoa ki te fenua o tino mate. Ne toe 'soko a te laukele mai luga o latou, tena, galo atu eiloa latou.
34A tino Isalaelu katoa kona ne nofo i kona ne tele katoa keatea i te lagonaga ne latou olotou tagi. Ne ka'laga latou penei, “Tele keatea, i tatou ma folo katoa ne te laukele!”
35Tena, ne aumai ei ne te Aliki te afi tela ne sunu ei a te 250 tagata kola ne fai olotou taulaga manogi.
Ko Ulo36Tena, ne fai mai ei a te Aliki ki a Mose penei,
37“Fai atu ki a Eleasalo, te tama tagata a Alona te faitaulaga, ke puke mai katoa a ulo palasi mai i lefu o tagata kola ne sunu ne te afi kae ligi atu a malala ka kona i loto i ulo kona ki se koga fakaatea, me i ulo kona e malu.
38Ne ala o malu a ulo kona me ne ofo atu i te fata-fai-taulaga a te Aliki. Tena la, puke a ulo kona a tagata kona ne mate i olotou agasala, kae tuki ke manifi mo fai a te ufi o te fata-fai-taulaga. A te mea tena se akoakoga ki tino Isalaelu.”
39Tena, ne puke aka ei ne Eleasalo te faitaulaga, a ulo kona o tuki ke ma'nifi mo fai a te ufi o te fata-fai-taulaga.
40A te mea tenei se akoakoga ki tino Isalaelu me e seai se tino fakaatea e tau o vau ki te fata-fai-taulaga o sunu ne ana mea manogi ki te Aliki, na ko tino fua i te gafa o Alona. So se tino e se fakalogo e tamate pela mo Kola mo tena kau. A mea katoa kola ne fai, e pela eiloa mo te fakatonuga a te Aliki ki a Eleasalo e auala i a Mose.
Ko Fakasao ne Alona a Tino Isalaelu41I te sua aso, ne mui'mui a te fenua katoa ki a Mose mo Alona, kae fai atu penei, “Ko oti ne tamate ne koulua a nisi o te fenua o te Aliki.”
42I te taimi ne maopoopo fakatasi ei a te fenua o mui'mui ki a Mose mo Alona, ne saga atu a latou ki te Faleie o te Aliki, kae matea ne latou a te kaumana e pulou i ei, mo te mainaga o te Aliki ko sae ake.
43Ne olo atu a Mose mo Alona o tu i mua o te Faleie o te Aliki
44kae ne fai atu mo te Aliki ki a Mose penei,
45“Fakamao keatea mai i tino konei, me ka ta fakapalele ne au a latou i konei eiloa!”
Ne punou ifo a laua kona ki te laukele,
46kae fai atu a Mose ki a Alona penei, “Puke mai tau ulo, tuku ne malala 'ka ki ei kae tuku atu mo ne mea manogi ki luga i malala 'ka. Ka oti ko fano fakavave koe o fai a te sauniga o te faka'maga o te fenua katoa. Fakavave! A te kaitaua o te Aliki tenei ko oti ne fakaasi mai, i te famai tenei ko poko.”
47Tena, ne puke aka a Alona ki tena ulo, tele atu eiloa ki te kogaloto o te maopoopoga. I te mateaga ne ia i te famai ko oti ne kamata o poko, ne tuku fakavave ei ne ia a mea manogi ki luga i malala 'ka, te mea eiloa ko fai ne ia a te sauniga o te faka'maga o te fenua katoa.
48Tena, ne gata ei a te famai i te faiga ne ia o te sauniga tena, kae poi aka mo ia i a ia e tu i te va o tino mate mo tino ola.
49A te aofaki o tino kola ne mate e tusa mo te sefulu fa afe fituselau, e se aofia i ei a tino kola ne mate fakatasi mo Kola.
50I te otiga o te famai, ne foki atu ei a Alona ki a Mose i te mataloa o te Faleie o te Aliki.
Who We AreWhat We EelieveWhat We Do
2025 by iamachristian.org,Inc All rights reserved.
