LOMA 6 - Tuvalu Revised Bible

Ko te Mate i te Agasala mo te Ola i a Keliso

1Se a te pati a tatou ka fai? Se mea 'lei ke tumau faeloa tatou o fai te agasala, ko te mea ke fakalasi te alofa tauanoa?

2Ikai, e se pena! Ne 'mate tatou i te agasala kae ka pefea o ola faeloa tatou i ei?

3Ne iloa tonu eiloa ne koutou a te mea tenei: i te papatisoga o tatou mō Keliso Iesu, e a, ne papatiso tatou ki te kau fakatasi mo ia i tona mate?

4Kolo 2.12Ne tanu fakatasi tatou i te papatisoga ki tona mate, e pela eiloa mo te toetuakega a Keliso mai tino 'mate i te 'malu o te Tamana, tela ka sasale i ei tatou i te ola fou.

5I te mea, kafai ko tasi tatou mo ia i te mate e pela mo tona mate, ka tasi foki tatou mo ia i te toetu e pela mo tena toetu.

6Me e iloa tonu ne tatou a te mea nei: ne fakasataulo fakatasi o'tou foitino mua mo Keliso i luga i tona sataulo, ke fakamasei ei te malosi o te feitu agasala o te foitino, ko te mea ke se toe pologa tatou ki te agasala.

7I te mea, kafai e mate se tino, ka fakasaoloto a ia mai te malosi o te agasala.

8Kafai ne 'mate fakatasi tatou mo Keliso, e talitonu foki tatou me ka toe ola fakatasi tatou mo ia.

9Me ko iloa ne tatou i a Keliso ne toetu mai te mate, ka se toe mate foki eiloa a ia, i te mea ko seai se malosi o te mate i luga i a ia.

10A te mate tela ne mate ei a ia, ko te mate mō agasala; kae ne mate fakatasi eiloa mo tino katoa, ka ko te ola tela ne ola ei a ia, ko te ola mō te Atua.

11Ke 'tau foki koutou o mafaufau ki ei, i a koutou ne 'mate i te agasala, ka ko ola mō te Atua i a Keliso Iesu.

12Tela la, ke se toe pule atu te agasala ki luga i otou foitino se tumau, i te mea mana faka'logo ei koutou ki olotou manakoga ma'sei.

13Sa tuku atu ne vaega i otou foitino ki te agasala ke fai mo mea faigaluega a te amio masei, kae tuku atu koutou ki te Atua e pela eiloa mo tino ne aumai mai te mate ki te ola, pela foki mo otou foitino, ke tuku atu ki te Atua ke fai mo mea faigaluega a te amiotonu.

14A te agasala, ka se pule atu ki luga i a koutou, i te mea i a koutou ko se ola i lalo o te tulafono, kae i lalo o te alofa tauanoa o te Atua.

Ko Pologa a te Amiotonu

15Se a la? E 'tau mo tatou o agasala faeloa i te mea i a tatou e se 'nofo mai i lalo o te tulafono, kae mai lalo o te alofa tauanoa? Ikai, e se pena!

16E iloa tonu eiloa ne koutou a te mea tenei: me kafai e tuku atu otou foitino ke fai mo pologa a se tino, e faka'logo koutou ki a ia, tela la, a koutou ko pologa a ia tela e faka'logo koutou ki ei, me ko te agasala, tela ko te mate tona ikuga, io me ko te fakalogo, tela ko te amiotonu tona ikuga.

17Kae fakafetai ki te Atua i te mea i a koutou ne pologa muamua a te agasala, kae nei ko talia ne koutou mo otou loto katoatoa a te mea tonu i akoakoga ne maua ne koutou.

18Kae nei la, ko oti ne fakasaoloto koutou mai i te agasala, ko fai nei koutou mo pologa a te amiotonu.

19Au e faipati ki te 'gana a tino, ona ko te vaivai o koutou. Ne tuku atu katoatoa otou foitino ke fai mo pologa a te amio se 'ma mo te se 'lei, o fai te masei. Ia, ke tuku atu foki otou foitino katoatoa ke fai mo pologa a te amiotonu, ke fai ei te 'lei.

20Ne seki pule atu te amiotonu ki a koutou, i te taimi koi pologa ei koutou ki te agasala.

21Se a la te taui ne maua ne koutou mai mea kola ne tae'ma koutou ki ei i te taimi nei? Ko te ikuga la o mea kona, ko te mate.

22Nei la, ko oti ne fakasaoloto koutou mai i te agasala, ko fai koutou mo tavini a te Atua, a te taui ka maua ne koutou ko te fakatapuga o koutou, mo tena ikuga, ko te ola se gata mai.

23Me i te taui o te agasala ko te mate ka ko te meaalofa faivasaga a te Atua; ko te ola se gata mai i a Keliso Iesu te tou Aliki.