IOPU 37 - Tuvalu Revised Bible

1E fai ne te kautaufa toku fatu ke tuki valevale.

2Fakalogo mai koutou katoa ki te leo o te Atua ki te fa'tili tela e vau mai i tena gutu.

3E fai ne ia te uila ke takato fakalava i te lagi,

Mai i te sua kapakapalagi ki te sua kapakapalagi.

4Tena la ko te 'gulu eiloa o tena leo ko lagona atu,

Ko te leo fakatupu o te fa'tili;

Kae i te vaitaimi katoa tena,

A te uila e lapalapa sale eiloa.

5E 'tupu a mea fakaofoofogia i te fakatonuga a te Atua,

Ko mea fakaofoofogia kola e se mafai o malamalama tatou i ei.

6E fakatonu ne ia te kiona ke 'to ki te lalolagi,

Kae faka'to ne ia vaiua 'lotu eiloa.

7E fakagata ne ia a galuega a tagata;

E fakaasi ne ia ki a latou i a ia ko fai ana galuega.

8A manu vao ko olo ki olotou ana.

9A matagi o te afā e vau mai i saute, mo te 'moko masukisuki mai i matu.

10E fakaliu aisa ne te Atua a vai ki tena mānava,

O fai eiloa ke makeke pela me ne poloka aisa.

11A uila lapalapa mai i kaumana,

12I te taimi e gasue ei i te fakatonuga a te Atua.

E fai ne latou a mea katoa e fakatonu mai ne te Atua,

I kogā koga i te lalolagi.

13E aumai ne te Atua a vaiua mo fakasūsū te lalolagi;

E mafai foki ne ia o aumai mo fakasala ei a tagata,

Io me fakaasi ki a latou tena alofa.

14Iopu, mānava malie kae fakalogo mai; mafaufau aka ki mea gali kola e fai ne te Atua.

15E iloa ne koe me e fai pefea te fakatonuga a te Atua tela e ala ei o 'lapa mai a uila mai i kaumana?

16E iloa ne koe me ai a e tapeapea ei a kaumana i te lagi,

Ko te galuega tena o te 'mana o te Atua?

17Ikai, a koe e puapuaga fua i te 'vela manafai ko vau te matagi mai saute o fakasauā te fenua.

18E mafai ne koe o fesoasoani ki te Atua i te folaaga o te lagi,

Kae fai ke makeke e pela me se fiti ne fakamalapulapu?

19Akoako mai a muna e tau o fai ne matou ki te Atua?

A omotou mafaufau ko seai ne mea i ei;

Ko seai ne muna e tau o fai ne matou.

20Au se manako ke faipati au ki te Atua;

Ai a ka fai fua ei ne au se mea e ta ei ne ia a au?

21Nei, a te mainaga i te lagi ko oko eiloa i te maina,

Ko tō maina, ko se maua ne matou o kilo ki ei;

Ka ko te lagi ko mā, ko seai ne kaumana i ei,

Me ko oti ne ave keatea ne te matagi.

22A te mainaga malipolipo, pela mo te lanu o te aulo,

E lavea atu i matu, ka ko matou ko ma'taku i te 'malu o te Aliki ko i luga i a matou.

23A te 'mana o te Atua ko oko eiloa i te maluga,

Tena te mea ko se mafai ei ne tatou o fakapilipili atu ki a ia;

E amiotonu kae faimeatonu i ana faiga ki tagata.

24Tela la, e tau eiloa te ma'taku o tino ki a ia.

Kae e fakaseaoga ne ia a tino kola e fai pela i a latou e poto.