SALAMO 108 - Tuvalu Revised Bible

Ko te 'Talo ki se Fesoasoani e 'Teke atu ei ki Fili(Sala 57.7-11; 60.5-12)

1Te Atua, toku loto ko tokagamalie!

Au ka usu pese kae tavae atu ki a koe!

Toku agaga, ala mai!

2Ala mai, taku kitala mo taku faili!

Au ka ala ake i te taeao pogipogi o 'viki atu.

3Te Aliki, au e fakafetai atu ki a koe i mua o malo.

Au e tavae ki a koe i mua o tino.

4A tou alofa tumau e oko atu ki luga i te lagi,

Mo tou fakamaoni e oko atu ki te vanimonimo.

5Te Atua, fakaasi tou sili i te lagi,

Mo tou 'malu i luga o te lalolagi kātoa.

6Faka'sao matou i tou malosi; tali mai ki taku talo,

Ko te mea ke 'sao a tino kola e alofa koe ki ei.

7Ne faipati mai te Atua i tena faletapuaki,

“Ko toku manumalo, ka vaevae ei ne au a Sekema,

Kae tufatufa ne au a te Vanu o Sukota ki oku tino.

8E oku a Kileata mo Manase;

A Efalaima ko toku pulou tau.

Ka ko Iuta ko toku tokotoko fakatupu.

9Ka fai ne au a Moapi mo aku tanoa 'fano

Kae ka 'pei oku taka ki luga i Etoma,

Ke fai mo fakailoga me e oku a ia.

Ka kalaga au mo te manumalo i luga o Filisitia.”

10Te Atua, ko oi ka ave ne ia au ki te fa'kai e 'pui faka'lei ki olo?

Ko oi ka takitaki ne ia au ki Etoma?

11E a, ne tiaki tonu eiloa ne koe matou?

E se vau koe o olo tasi mo te motou kautau?

12Fesoasoani mai ki a matou o taua mo omotou fili;

Me e se aoga lele se fesoasoani mai tino ola.

13E manumalo matou ma na fai e kau te Atua i a matou;

Ka fakatakavale ne ia omotou fili.