1 Tani 7.3; Faka 17.3,7-12 Ne matea ne au a te manu fekai e fanake mai te tai. E sefulu ona suki kae fitu ona ulu, mo foualiki i luga i suki takitasi, mo te igoa masei e tusi i ulu takitasi.
2Tani 7.4-6A te manu fekai tela ne matea ne au e foliga pela mo se pusi vao fekai, mo ona vae e pela mo vae o te manu ko te pea, mo tona gutu e pela mo te gutu o te leona. Ne tuku atu ne te talako ki te manu tenei a tona mana, tona nofogaaliki, mo tena pule malosi.
3E tasi te ulu o te manu e foliga mai pela me ko oti ne tamate, ka ko te mea ko mafu tona pakiaga. Ko ofo a tino katoa o te lalolagi, tau'tali atu ei i te manu fekai.
4Ne tapuaki a tino katoa ki te talako i te mea ko oti ne tuku atu ne ia tena pule ki te manu fekai. Ne tapuaki ki te manu fekai, kae fai ake penei olotou pati: “Ko oi e tusa tona malosi mo te manu fekai? Ko oi foki e mafai ne ia o tau mo ia?”
5 Tani 7.8,25; 11.36 Ne talia te manu fekai o fai so se mea masei, kae ne talia ke pule i te fasefulu lua masina.
6Ne kamata o faifai muna ki te Atua mo te igoa o te Atua, mo te koga e nofo i ei, pela foki mo tino e 'nofo i te lagi.
7Tani 7.21Ne fakasaoloto foki a ia ke tau ki Kelisiano, kae o fakatakavale foki ne ia, kae ne tuku foki ki a ia te pule i luga i matakaiga mo tino katoa, i luga i 'gana katoa mo fenua.
8Sala 69.28A tino katoa kola e nofo i te lalolagi e tapuaki ki te manu fekai, ko latou konei e se tusi olotou igoa i te tusi o te ola a te Tama Mamoe tela ne fakasataulo. A te tusi o te ola ne fai ka koi tuai o faite te lalolagi.
9“Fakalogo mai ki muna konei e fai atu ne au.
10Iele 15.2; 43.11So se tino ne filifilia ke puke fakapagota, e puke eiloa fakapagota; so se tino ne filifilia ke mate i te pelu, e mate eiloa i te pelu. A te mea nei se kalaga ki Kelisiano ke tumau i te kufaki mo te fakatuanaki.”
11Ne toe matea ne au te sua manu fekai ko fanake mai te lalolagi. E lua ona suki, e pela eiloa mo suki o te tama mamoe, kae faipati pela mo se talako.
12Ne fakaaoga ne ia te mana sili o te manu fekai muamua, i mua eiloa o te manu fekai muamua tena. Ne fakamalosi ne ia te lalolagi mo tino katoa e 'nofo i ei, ke tapuaki ki te manu fekai muamua tela ko mafu tona pakiaga.
13Ne fai ne te lua o manu fekai a vavega 'lasi; ne fai ne ia te afi ke to ifo mai te lagi ki luga i te lalolagi i mata o tino katoa.
14Ne fakavalea ne ia tino katoa e 'nofo i te lalolagi ona ko vavega katoa kola ne talia ke fai ne ia i mua o te manu fekai muamua. Ne fakatonu ne te manu fekai tenei a tino katoa i te lalolagi ke faite se fakatusa o te manu fekai ne pakia i te pelu, kae tenei eiloa e ola.
15Ne talia te lua o manu fekai ke manava atu te ola ki te fakatusa o te manu fekai muamua, ko te mea ke mafai o faipati te fakatusa tena, ke fakatonu atu foki ne ia ki a latou kola e se tapuaki ki ei.
16Ne fakamalosi ne te manu fekai a tino katoa, tino ma'luga mo tino ma'lalo, tino maumea mo tino ma'tiva, pologa mo tino saoloto, ke faka'piki a te fakailoga i olotou lima fakaatamai pela foki mo olotou lae.
17E seai se tino e mafai ne ia o fakatau mai io me o fakatau atu, seiloga ko isi te fakailoga tenei i a ia, tela ko te igoa o te manu fekai io me ko te napa o te manu fekai.
18E manakogina te fakaaoga o te mafaufau i te mea nei. So se tino e poto e 'tau o matea ne ia te uiga o te napa o te manu fekai, me i te napa e sui ne ia te igoa o te tino. A tena napa ko te ono selau ono sefulu ono.
Who We AreWhat We EelieveWhat We Do
2025 by iamachristian.org,Inc All rights reserved.
