NUMELA 8 - Tuvalu Revised Bible

Ko te Fakatulagaga o Moli

1 Eso 25.31-40; 37.17-24 Muna a te Aliki ki a Mose

2“Fai ki a Alona me kafai ko fakamau ne ia a mata moli e fitu ki te tulaga‐moli, e tau o tuku ne ia ki se koga lei, ko te mea ke maina ki mua.”

3Ne fakalogo Alona ki te fakatonuga, tela ne tuku ei ne ia a moli kona ke saga ki mua.

4A te tulagamoli katoa, ne faite ki aulo, e pela eiloa mo te ata tela ne fakasino ne te Aliki ki a Mose.

Ko te Faka'maga mo te Fakatapuga o te Matakaiga o Levi

5Muna a te Aliki ki a Mose,

6“Vae fakaatea a tino sa Levi mai tino Isalaelu kae faka'ma latou penei:

7apiapi atu a vai faka'ma ki luga i a latou, kae fai atu ki a latou ke vele a fulu i olotou foitino kae 'ta olotou gatu. Tena ko 'ma ei latou.

8Tena, ka puke mai ei ne latou a te tamā pulumakau tagata mo mea kola e manakogina mo te taulaga saito, kola ko falaoa e palu tasi mo te sinu olive, kae ka toe puke mai ne koe a te sua pulumakau tagata mo fai te taulaga mo agasala.

9Ka oti, ko fakamaopoopo ei ne koe a te fenua o Isalaelu kae fai ki tino sa Levi ke tu i mua o toku Faleie.

10E tau mo tino Isalaelu o na olotou lima ki ulu o tino sa Levi,

11ka ko Alona ka fakatapu ne ia a latou ke fai mo meaalofa fakapito a tino Isalaelu ki a au, ko te mea ke fai ne latou taku galuega.

12A tino sa Levi ka tuku olotou lima ki ulu o te ava pulumakau tagata; e tasi ke ofo mo fai te taulaga mo agasala, ka ko te sua pulumakau mo fai te taulaga sunu, ko te mea ke mafai ei o fai te sauniga o te faka'maga o te kau sa Levi.

13“A te matakaiga o sa Levi ke fakatapu ke fai mo meaalofa fakapito ki a au, ka ko Alona mo ana tama tagata ke fai mo takitaki o latou.

14Fakakese a te matakaiga o Levi mai tino Isalaelu i te faiga tena, ko te mea ke fai latou mo oku.

15Kafai eiloa ko oti ne faka'ma kae fakatapu ne koe a te matakaiga o Levi, ko saoloto ei latou o ga'lue i toku Faleie.

16Ko oti ne puke ne au a latou ke fai mo sui o toekimua tagata katoa o Isalaelu, tela la, e o oku latou.

17Eso 13.2 I te taimi ne tamate ei ne au a toekimua tagata katoa o Aikupito, ka ko toekimua tagata i kaiga takitasi o Isalaelu ne fakatapu ne au ke fai mo oku, e pena foki a toekimua o olotou manu katoa.

18Ko puke nei ne au a te matakaiga o Levi e fai mo sui o toekimua tagata o Isalaelu.

19Ka ko tuku atu latou ki te pulega a Alona mo ana tama tagata. A te matakaiga o Levi se meaalofa mai i tino Isalaelu ke galue i toku Faleie mo tino Isalaelu kae ke puipui foki ne latou a tagata Isalaelu katoa, mai puapuaga kola e oko ki a latou, manafai e fakapilipili latou ki te Potu Tapu.”

20Tena ne fakatapu ei ne Mose mo Alona mo tino katoa o Isalaelu a tino sa Levi, e pela eiloa mo te fakatonuga a te Aliki ki a Mose.

21Tena ne faka'ma ei a foitino o te kau sa Levi kae 'ta olotou gatu, ko te mea eiloa ko fakatapu latou ne Alona ke fai mo meaalofa fakapitoa ki te Aliki. Ne fai foki ne Alona a te sauniga e faka'ma ei latou.

22Ne tau'tali eiloa a tino Isalaelu ki mea kola ne fakatonu ne te Aliki ki a Mose e uiga ki te kau sa Levi. Tena, ko talia a tino sa Levi ke galue i te Faleie o te Aliki i lalo o te pulega a Alona mo ana tama tagata.

23Muna a te Aliki ki a Mose,

24“Ko te luasefulu lima tausaga e kamata ei te tino sa Levi o fai tena tiute i toku Faleie,

25kae e litaea i te limasefulu tausaga.

26Mai tua ifo, e mafai ne ia o fesoasoani ki nisi taina sa Levi i te faiga o olotou tiute i toku Faleie, kae e se mafai ne ia o fai se galuega i a ia eiloa tokotasi. E pena te fakasoasoaga ne koe a tiute o te kau sa Levi.”