PESE A SOLOMONA 3 - Tuvalu Revised Bible

1I po katoa i luga i toku moega, e moemiti faeloa au ki taku pele;

Ne sala sale au ki ei, kae e seki maua ne au.

2Ne fano sale au i loto i te fa'kai,

I auala lasi mo auala foliki.

Ne sala au ki taku pele

Kae seki maua eiloa ne au.

3A tino leoleo kola e tausi ne latou te fa'kai ne lavea ne latou au.

Ne fesili atu au ki a latou penei,

“Kai lavea eiloa ne koutou taku pele?”

4I te taimi eiloa ne tiakina atu ei ne au a latou,

Te mea eiloa ko maua ne au taku pele.

Ne sai ne au a ia kae seki toe tiakina ne au mai oku lima

Ke oko eiloa ki te taimi ne ave ei ne au a ia ki te fale o toku matua,

Ki te potu ne fanau ei au.

5Fa'fine o Ielusalema, tauto mai ki a au i te igoa o te tia tele makini mo kasele,

Ke se fakalavelave ne koutou te famau a maua.

Ko te Tolu o PeseKo muna a te Fafine

6Se a te mea tenei e vau mai i te vao,

E pela me se au,

E manogi pela me se mea fakamanogi pela foki me se sinu o te mulo,

Te mea fakamanogi tela e fakatau atu sale ne tino fai mea togi?

7A Solomona ko vau, e amo mai i luga i tena nofogaaliki;

E tino ono sotia e tausi ne latou a ia,

Ko toe sotia tafa'sili eiloa o Isalaelu.

8A sotia katoa kona ko latou eiloa ko poto i te taua ki pelu;

A latou ne sotia ko masani faka eiloa mo taua.

E tofu katoa latou mo pelu,

Kae toka faeloa mo so se potukau e taua mai ki a latou i se po.

9A te Tupu ko Solomona e amo mai i luga o te nofogaaliki e faite ki laupapa tafasili i te gali.

10A ona pou e ufi ki siliva;

Ka ko te koga ki luga e ufi ki te laugatu e teuteu ki aulo.

A famalū o te nofogaaliki tena e ufi ki te laugatu lanu kulakula,

Tela ne faite faka'lei eiloa ne fafine o Ielusalema.

11Fa'fine o Siona, o'mai o onoono ki te Tupu ko Solomona.

E na mai i tena ulu a te kalauna tela ne tuku ne tena matua ki tena ulu

I te aso ne fakaipoipo ei a ia,

Te aso ne lifu kae fiafia ei a ia.