1 NOFOAIGA TUPU 27 - Tuvalu Revised Bible

Ko te Fakanofoga o te Malo mo Kautau

1Tenei te fakasologa o igoa o matai o kaiga takitasi, mo takitaki o kaukaiga mo ofisa maluga kola e pulepule ne latou a galuega i te malo. E tusa mo te lua sefulu fa afe tagata mo te takitaki o latou, e fai ne latou a galuega i te masina e tasi, ka oko ki te sua masina ko toe sui mai te lua sefulu fa afe mo te lotou takitaki, e pena eiloa i masina takitasi i te tausaga.

2-15Konei a igoa o takitaki o potukau i masina takitasi: Te masina muamua: ko Iasopeamo, te tama tagata a Sapatielu. A ia se tino i te kaukaiga o Pelesa, se vaega e tasi i te matakaiga o Iuta. Te lua o masina: ko Totai, se tino i te gafa o Ahoi Mikilota ko tena tokolua. Te tolu o masina: ko Penaia te tama tagata a Ieoiata te faitaulaga; a ia ko te takitaki o “Te Tinotolu.” A tena tama tagata ko Amisapata ne sui ne ia a ia o fai mo takitaki o te potukau tena. Te fa o masina: ko Asaelu, te taina o Ioapo. A ia ne sui ne tena tama tagata ko Sepatia. Te lima o masina: ko Samuta, se tino i te gafa o Isala. Te ono o masina: ko Ila, te tama tagata a Ikesi mai i Tekoa. Te fitu o masina: ko Helesa, se tagata Efalaima mai Pelona. Te valu o masina: ko Sipekai mai i Husa. A ia se tino i te kaukaiga o Sela, se vaega o te matakaiga o Iuta. Te iva o masina: ko Apiesa mai i Anatota, i te kogā laukele o te matakaiga o Peniamina. Te sefulu o masina: ko Malai mai i Netopa. A ia se tino i te kaukaiga o Sela. Te sefulutasi o masina: ko Penaia mai i Pilatonu i te kogā fenua o te matakaiga o Efalaima. Te sefululua o masina: ko Heletai mai i Netofa. A ia se tino i te gafa o Otinielu.

Ko te Pulepulega o Matakaiga o Isalaelu

16-22Konei a igoa o tino kola e pulepule ne latou a matakaiga o Isalaelu:

Te Matakaiga Tino Fakatonutonu

Leupena

Eliesa te tama tagata a Sikeli

Simeona

Sefatia te tama tagata a Maaka

Levi

Hasapaia te tama tagata a Kemuelu

Alona

Satoka

2 Eliu, se taina e tokotasi o te Tupu ko Tavita

Isakala

Omeli te tama tagata a Mikaeli

Sepulona

Isimaia te tama tagata a Opetaia

Nafatali

Ielemota te tama tagata a Asilielu

Efalaima

Hosia te tama tagata a Asasia

Manase i te Togala

Ioelu te tama tagata a Petaia

Manase i te Saegala

Ito te tama tagata a Sakalia

Peniamina

Iasieli te tama tagata a Apinelu

Tanu

Asalelu te tama tagata a Ielohamo

23 Kene 15.5; 22.17; 26.4 Ne seki lau ne te Tupu ko Tavita a tino mai lalo o te luasefulu tausaga, me i te Aliki ko oti ne tauto ke fai ne ia a tino Isalaelu ke tokouke e pela mo te uke o fetu i te lagi.

242Samu 24.15; 1NTupu 21.1-14 A Ioapo, te tama tagata a te fafine ko Seluia, ne taumafai o lau a tino, kae e seki oti. Ne fakasala ne te Atua a Isalaelu ona ko te laugā tino tena, tela la, e seki ai eiloa se fuainumela tonu ne fakamau i tusi a te Tupu ko Tavita.

Ko Tino e Pulepule ne latou a Tofi o te Tupu

25-31Konei a igoa o tino kola e pulepule ne latou a mea a te tupu:

Ko potu teu koloa a te tupu: ko Asimaveta te tama tagata a Atielu

Ko potu teu koloa a te malo: ko Ionatana te tama a Usia

Ko tino galue i fatoaga: ko Eseli te tama tagata a Kelupa

i togāvine: ko Simei mai i Lama i koga fai uaina: ko Sapeti mai i Sefama

Ko olive mo lakau ko sukamolo, i tafito mauga i te togala: ko Paala Hananu mai i Ketela

Ko koga e teu ei a sinu olive: Ioasa

Ko pulumakau i te kogā koga laugatasi i Salona: ko Silitai mai i Salona

Ko pulumakau i vanu: ko Safata te tama tagata a Atalai

Ko kamela: ko Opili, se Isamaeli

Asini: ko Ietaia mai i Melonota

Mamoe mo kouti: ko Iasisi, se Hakeli.

Ko Tino Fakatonutonu Totino a Tavita

32A Ionatana, te taina o te tamana o Tavita, se tagata fakatonutonu ko masani, kae se tagata poto foki. Ko laua mo Ieielu, te tama tagata a Hakemoni e pule i te faiga o akoga a tama tagata a te tupu.

33A Aitofele ko te tagata fakatonutonu a te tupu, ka ko Husai, te tagata Aki, ko te taugasoa o te tupu mo te tino fakatonutonu foki ki a ia.

34I te matega o Aitofele, ne sui a ia ne Apiata mo Ieoiata, te tama tagata a Penaia, o fai mo tino fakatonutonu a te tupu. A Ioapo ko te takitaki o te kautau.