IOSUA 18 - Tuvalu Revised Bible

Ko te Vaevaega o te Toega o te Fenua

1I te otiga ne puke ne tino Isalaelu a te fenua, ko te mea eiloa ko maopoopo atu ki Sailo, fakatu ei ne latou a te Faleie o te Aliki i kona.

2Toe fitu nei a matakaiga o Isalaelu e seki tuku atu olotou vaega i te fenua.

3Tena, ne fai atu ei a Iosua ki tino Isalaelu penei, “Tefea te taimi e olo atu ei koutou o na puke a te fenua tela ne aumai ne te Aliki, te Atua o otou tupuga ki a koutou?

4Fili mai e taki tokotolu tagata mai matakaiga takitasi. Ka uga atu ne au latou ke olo o fakatuakoi faka'lei a kogā laukele kola e manako koutou ke fai mo otou tofi. Ka oti ko toe foki mai ei ki a au.

5A te toega o te fenua ka vaevae i a latou i vaega e fitu: a Iuta i saute, ka ko losefa i matu.

6Tusi ki lalo se fuafuaga 'lei o vaega kona e fitu ko aumai ei ki a au. Tena, ko fai ei ne au se vili e fakailoa ei ne au ki te Aliki, te tou Atua, e uiga mo koutou.

7A te matakaiga o Levi e seai se vaega o latou me i te vaega o latou ko te tavini atu ki te Aliki i te tofi faitaulaga. A matakaiga o Kato, Leupena mo Manase ki te Saegala ko oti ne maua te vaega o latou i te feitu ki te saegala o te Iolitana tela ne avatu ne Mose, te tavini a te Aliki mō latou.”

8Tena ne olo atu eiloa a tagata kona o fai te fafanua o te fenua o Kanana i te otiga ne tuku atu ne Iosua a fakatonuga konei: “Olo atu o fai se fafanua o te fenua kātoa, ka oti ko foki mai ei koutou ki a au. Tena, ko faipati ei au ki te Aliki i konei i Sailo, e uiga mō koutou, i te faiga o te vili.”

9Ne olo atu a tagata kona o tusi faka'lei te vaevaega o te fenua ki vaega e fitu, kae tusi mo igoa o fa'kai lasi. Tena, foki atu ei latou ki a Iosua i Sailo.

10Tena ne kalaga ei a Iosua ki te Aliki i te faiga o te vili, tuku atu ei ne ia a vaega kesekese o te fenua ki matakaiga kona koi toe.

Ko te Vaega o Peniamina

11Ko te matakaiga o Peniamina ne mua o avatu tena vaega. A te laukele o latou e tu i te va o matakaiga o Iuta mo Iosefa.

12A te tuakoi o latou ki te feitu ki matu e kamata mai i te Iolitana, ko fanake ei mai te sifoga i lalo o fano ki luga i te feitu ki matu o Ieliko, ko fano ei faka te togala, ulu i loto i fenua maugā, ke oko eiloa ki te vao o Petavene.

13Mai i kona, ko fanatu ei ki te sifoga i te feitu ki saute o te fa'kai o Lusa, tela e fakaigoa foki ko Peteli, ko fanaifo ei pela ki Atalota Ata, i luga i te mauga i te feitu ki saute o te feitu ki lalo o Peta Holono.

14I kona ko toe mafuli ei te tuakoi o fano faka saute mai te feitu ki te togala o te mauga tena o fano ki Kiliata Paala io me ko Kiliata Iealima, tela e aofia i te vaega o te matakaiga o Iuta. Tena te tuakoi ki te togala.

15A te tuakoi ki saute e kamata i kautafa o Kiliata Iealima o fano ki Vaipuna o Nefatoa.

16Mai kona ko fano ei pela ki te tafito o te mauga tela e tu i luga o te Vanu o Hinomo, i te mata ki matu o te Vanu o Lefaima. Mai i kona ko fano ei ki saute, i loto i te Vanu o Hinomo, i te feitu ki saute o Iepuse, o fano faka Enelokelo.

17Mai kona, ko fano ei fakamatu ki Enesemese o fanatu eiloa ki Kelilota, tela e luta mo te Auala o Atumima. Tena, ko fanaifo ei te tuakoi tena ki Fatu o Pohana, Pohana ko te tama tagata a Leupena,

18ko fanatu ei fakamatu e fakatafa i te ulu mauga i luga o te Vanu o Iolitana, ko fanaifo ei i loto i te vanu,

19o fakatafa i te feitu ki matu o te ulu mauga o Peta Hokala, kae gata mai i te mata tafa ki matu o te Tai Mate, tela e tafe ki ei te vaitafe o Iolitana. Tena te tuakoi ki saute.

20A te Iolitana ko te tuakoi ki te saegala. Kona a tuakoi o te laukele o te matakaiga o Peniamina.

21Konei a fa'kai lasi o te matakaiga o Peniamina: ko Ieliko, Peta Hokala, Emeke Kesise,

22Peta Alapa, Semalaima, Peteli,

23Avima, Paala, Ofala,

24Sefalamoni, Ofeni, mo Kepa: e sefulu lua fa'kai lasi mo fa'kai foliki i olotou tafatafa.

25Ko Kipeona, Lama, Pelota,

26Mesepa, Kafila, Mosa,

27Lekema, Ilefeelu, Talala,

28Sela, Haelefa, Iepuse io me ko Ielusalema, Kipea, mo Kiliata Iealima: e sefulu fa'kai lasi mo fa'kai fo'liki i olotou tafatafa. Tena te vaega o Peniamina.