SAPAKUKA 3 - Tuvalu Revised Bible

Ko te 'Talo a Sapakuka

1Mea nei ko te talo a te pelofeta ko Sapakuka:

2Te Aliki, au ko oti ne logo i te mea ne fai ne koe,

Tela ko fonu ei au i te mataku.

Toe fai aka i aso nei, a mea fakaofoofogia kola ne fai sale ne koe i aso mua.

Alofa mai ki a matou, tiga foki eiloa e kaitaua koe.

3Te Atua ko toe foki mai mai Etoma;

Te Atua tapu ko toe foki mai mai mauga o Palana.

Ko ūfi te lagi i tena mainaga gali;

Ka ko te lalolagi ko fonu i ona vikiga.

4E vau a ia mo te mainaga o te uila;

Tela e la'pa mai i tena lima,

Te koga tena e funa ei tona 'mana.

5E uga ne ia te famai i ona mua;

Kae fakatonu ne ia te mate ke tautali atu i a ia.

6E galulu te lalolagi manafai e tu a ia,

E pole'pole a malo manafai e kilo atu a ia.

A mauga taumua ko maofa valevale;

Ko galo ki lalo a mauga malosi,

Ko mauga kona kola ne sasale sale ei a ia i aso mua.

7E lavea ne au a tino o Kusani ko ma'taku

Ka ko tino o Mitiana ko pole'pole.

8Te Aliki, a koe e ita ona ko vaitafe?

E kaitaua koe ona ko te tai?

E sopo koe i luga i kaumana;

A kaumana o te afā ko tau kaliota,

Tela ko aumai ne koe te manumalo ki ou tino.

9E fakatokatoka koe o fakaaoga tau kausana,

O fakatoka o sana au matasana.

E vaelua ne koe a te lalolagi ki te uila.

10E polepole a mauga mafai e lavea ne latou a koe;

A vai e ma'ligi ifo mai luga i te vanimonimo.

A vai i lalo ifo o te lalolagi e gulu,

Ka ko olotou galu ko maluga faka eiloa.

11Ko se gasue te la mo te masina i te lapaga o au matasana

Ma'kini mo te malapuga o tau tao malapulapu.

12E malaga koe i loto i te lalolagi mo te kaitaua;

I tou kaitaua e lakalaka ei ne koe a malo.

13E fano koe o fakasao ou tino,

O fakasao tau tupu filifilia.

Ne ta ne koe te takitaki o tino amio masei,

Kae fulu faka'ma foki a tena kau.

14Ne pakia masei te pule o tena kautau i au matasana,

I te taimi ne o'mai ei latou e pela me se afā o fakamasei matou,

Kae mata kaitaua e pela me ne tino e fakasaua muni ki tino ma'tiva.

15Ne lakalaka ne au solofanua a te tai

Tela ko sou ei te tai.

16E lagona ne au a mea katoa konei, tela ko polepole ei au;

Oku laugutu ko pole'pole eiloa i te mataku.

Toku foitino ko fano o faka'mate,

Ka ko oku vae ko se maua o 'tu.

Ka fakatalitali eiloa au mo te filemu ki te taimi

Tela ka fakasala ei ne te Atua a tino kola e o'mai o faitaua ki a matou.

17E ui eiloa e seai ne fua i luga o mati

Kae seai foki ne fuataga i luga o vine,

E ui eiloa e se fua lei a olive

Ka ko seai foki ne fuaga e maua mai saito,

E ui eiloa e mate katoa a mamoe

Ka ko 'ma kalekale a sai pulumakau, kae seai eiloa se pulumakau iei;

18E fiafia faeloa au i te Aliki te Atua ko toku fakaola.

19 2Samu 22.34; Sala 18.33 E aumai ne te Aliki ki au te malosi.

E fai ne ia au ke makini pela me se tia,

Kae tausi faka'lei ne ia au i luga o mauga.