SALAMO 142 - Tuvalu Revised Bible

Ko te 'Talo mō se Fesoasoani

1Ko kalaga atu au ki te Aliki mō se fesoasoani;

Au e fakatagi ki a ia.

2Ko fakaasi atu ne au ki a ia a mea e se fiafia au ki ei;

Ko taku atu ne au ki a ia oku puapuaga katoa.

3Kafai au ka takavale, e iloa ne ia te mea e 'tau mo au o fai.

I te auala tela e saele ei au,

E isi se malei ne fakatoka ne oku fili mo tamate au.

4Ka kilo aka au ki oku tafa,

E seai eiloa se tino e fesoasoani mai ki a au.

E seai se tino e puipui ne ia au;

E seai foki se tino e tausi mai ki a au.

5Te Aliki, ko kalaga atu au mō se fesoasoani;

Te Aliki, ko koe fua toku lafiga;

Ko koe fua e manako au ki ei i te olaga nei.

6Fakalogo mai ki taku fakatagi mō se fesoasoani,

Me i au ko galo ki lalo i te loto vaivai.

Fakasao mai au mai oku fili;

Me ko tō malosi atu i au.

7Fakasao mai au mai oku puapuaga; e tusa mo tou atafai mai ki a au,

Tela ka viki atu ei au ki a koe i te maopoopoga o ou tino.