SALAMO 145 - Tuvalu Revised Bible

Ko te Pese Tavae

1Toku Atua mo toku tupu, ka folafola atu ne au tou 'malu;

Ka tuku atu taku fakafetai ki a koe e se gata mai, e se gata mai eiloa.

2E fakafetai atu au ki a koe i aso katoa;

Ka 'viki atu au ki a koe e se gata mai e se gata mai eiloa.

3Te Aliki e sili kae 'tau o faka'maluga ona vikiga;

A tena malu e sili atu i te mea e iloa ne tatou.

4Au galuega ne fai ka vikia ne kautama katoa;

Ka folafola atu ne latou au galuega 'mana.

5A tou 'mana mo tou maluga ka faipatigina ne tino,

Kae ka mafaufau 'loto au ki au galuega fakaofoofogina ne fai.

6Au galuega 'mana ka faipatigina ne tino,

Kae ka folafola atu ne au tou maluga.

7Ka fai'pati latou e uiga mo tou aga'lei,

Kae usu pese e uiga ki tou alofa.

8Te Aliki e alofa kae alofa 'nau,

E tuai o ita kae fonu i te alofa tumau.

9E aga'lei a ia ki tino katoa,

E alofa a ia ki mea katoa a ia ne fai.

10Te Aliki, au manu katoa ne faite ka 'viki atu ki a koe,

Ka ko ou tino ka fakafetai atu ki a koe.

11Ka faipatigina ne latou te 'malu o tou malo,

Kae tavae ne latou tou malosi,

12Ko te mea ke iloa ne tino katoa au galuega 'mana,

Mo te 'malu fakatupu o tou malo.

13A tau pule e se gata mai,

A koe foki ko te tupu e se gata mai.

A te Aliki e fakamaoni ki ana feagaiga,

Kae amiotonu i ana mea katoa e fai.

14E fesoasoani a ia ki a latou katoa kola e puapuagatia;

E faka'tu ake ne ia latou katoa kola ne pakū.

15A mea ola katoa e 'kilo ki a koe mo te fakamoemoe,

Me ka tuku ne koe meakai ki a latou mafai e ma'nako latou ki ei.

16E tuku ne koe ki ei a mea e lava mo latou,

Kae fakamalie ne koe olotou manako.

17A te Aliki e amiotonu i ana mea katoa e fai,

Ne fai ana galuega mo te alofa.

18E pili faeloa a ia ki a latou kola e ka'laga atu ki a ia,

Kola e kalaga ki ei mo te loto fakamaoni.

19E tuku ne ia ki a latou kola e mataku ki a ia a mea katoa kola e ma'nako latou ki ei;

E lagona ne ia olotou tagi, kae faka'sao ne ia latou.

20E puipui ne ia latou katoa kola e alofa ki a ia,

Kae ka fakamalaia ne ia a tino amio ma'sei.

21Au ka 'viki faeloa ki te Aliki;

A meaola katoa e viki atu ki tena igoa tapu,

Ke oko ki te se gata mai.