SALAMO 37 - Tuvalu Revised Bible

Te Ikuga o Tino Amio Ma'sei mo Tino Amio Lei

1Sa manava'se ki faiga a tino amio ma'sei;

Sa loto ma'sei foki ki tino fai mea se tonu;

2Ka galo atu latou e pela mo mouku kola ko pakupaku;

Ka 'mate foki latou e pela mo lakau kola ko mage'mage.

3Fakatuanaki ki te Aliki kae fai mea lei;

Ke ola lei koutou i te fenua mo te filemu.

4'Sala tou manuia ki te Aliki,

Kae ka avatu ne ia ki a koe te mea e manako koe ki ei.

5Tuku atu katoa a koe ki te Aliki;

Fakatuanaki ki a ia, kae ka fesoasoani a ia ki a koe;

6Ka fai ne ia tau amio lei ke maina atu e pela mo te mainaga o te la i te tutonu.

7Fifilemu kae fakatalitali ki te taimi e fai ei ne te Aliki a te mea e tau o fai;

Sa manavase koe ki tino kola e manuia,

io me ki tino kola e taunu 'lei a fuafuaga ma'sei a latou.

8Sa manavase io me kaitaua;

Me e taki fua ne ia koe ki fakalavelave.

9A latou kola e fakatuanaki ki te Aliki,

Ka fai mo latou te fenua,

Ka ko tino amio ma'sei ka afuli keatea.

10E se toe leva nei, ka galo atu ei a tino amio ma'sei;

Ka salasala ne koe latou, kae se maua ne koe;

11Mata 5.5 Ka ko latou kola e loto malalo, ka fai mo latou te fenua,

Kae ka maua ne latou te manuia mo te filemu katoatoa.

12E faitogafiti masei a te tino amio masei ki te tino amio lei,

Kae pula 'toka ki ei mo te takalialia.

13E kata te Aliki ki tino amio ma'sei,

i te mea e iloa ne ia me ko pili fua o malaia.

14Ko tata ake a pelu a tino amio ma'sei kae futi olotou kausana,

O tamate a tino ma'tiva mo tino e fia maua se fesoasoani;

O tamate foki a tino amio lei;

15Kae ka 'mate eiloa latou i olotou pelu,

Ka fati'fati foki olotou kausana.

16A te mea foliki tela e maua ne te tino amio lei,

E sili atu te aoga i koloa katoa a te tino amio masei,

17Me i te Aliki ka ave keatea ne ia te malosi o tino amio ma'sei,

Kae puipui ne ia a tino amio lei.

18E tausi ne te Aliki a latou kola e faka'logo ki a ia,

Ka fai foki mō latou te fenua ki te se gata mai.

19E se fi'ta latou ma oko mai aso o puapuaga;

E lava 'lei foki olotou meakai i aso o te oge.

20Ka ko tino amio ma'sei ka 'mate;

A fili o te Aliki ka 'galo atu e pela mo pula lakau o te vao;

Ka 'galo atu foki latou e pela mo se au o te afi.

21E kaitalafu te tino amio masei kae se toe togi,

Ka ko te tino amio lei e kaimalie,

Kae tuku atu fua ana mea.

22A tino kola e fakamanuia ne te Aliki,

E nofo filemu a latou i te fenua,

Ka ko tino kola e fakamalaia ne te Aliki,

Ka afuli keatea mai te fenua.

23E takitaki ne te Aliki a te tino ke sao 'lei i te auala e 'tau o fano a ia i ei;

Kae puipui ne ia a latou kola e fakafiafia ki a ia.

24Kafai e 'siga latou, e toe vave 'tu,

Me fesoasoani te Aliki ki a latou o toe fakatū ake.

25Au nei ko toeaina, ko leva eiloa toku olaga,

Kae seki iloa eiloa ne au se tino amio lei ke tiakina ne te Aliki,

io me ko ana tamaliki foki ke akai meakai.

26E kaimalie a ia i aso katoa, kae tuku atu foki ana mea ke kaitalafu ne tino,

A tamaliki foki a ia e manuia faeloa.

27Ke fulitua koe mai mea ma'sei kae fai mea lei,

Ka ko au fanau ka ola i te fenua ki te se gata mai;

28Me i te Aliki e fiafia ki te mea tonu,

E se mafai foki o tuku tiaki ne ia ona tino fakamaoni.

E puipui faeloa ne ia a latou,

Ka ko fanau a tino amio ma'sei ka afuli ne ia keatea.

29A tino amio'tonu ka fai mo latou te fenua,

Kae ka 'nofo faeloa i ei ki te se gata mai.

30A muna a te tino amio lei e fai mo te poto,

E amiotonu foki a ia i mea katoa.

31E tausi ne ia te tulafono a tena Atua i tena loto,

Kae se mafai o tiakina ne ia.

32E lamalama te tino amio masei ki te tino amio lei o taumafai ke tamate ne ia;

33Kae se mafai ne te Aliki o toku atu a ia ki te malosi o tena fili,

io me tuku atu foki a ia ke sala i te fakamasinoga.

34Ke fakamoemoe koe ki te Aliki kae fakalogo ki ana fakatonuga;

Ka fakamanuia ne ia a koe o tuku atu mo koe te fenua,

Kae ka lavea foki ne koe a tino amio ma'sei ka afuli keatea.

35Ne iloa ne au se tino amio masei i aso mua tela e pule malosi mo te sauā;

E maluga atu a ia i tino katoa e pela me se alasi o Lepanona;

36Kae fakamuli ifo, ne fanatu au ki te koga ne tu i ei, ka ko galo i ei;

Ne salasala au ki ei, kae ne seki maua eiloa ne au.

37Onoono faka'lei ki te tino amio lei,

Kilokilo faka'lei foki ki te tino amiotonu;

A te tino filemu e fanafanau.

38Ka ko tino agasala e malaia eiloa,

A fanau foki a latou ka, 'solo keatea.

39E fakaola ne te Aliki a tino amiotonu,

Kae puipui foki ne ia latou i taimi o fakalavelave.

40E fesoasoani a ia ki a latou kae fakasao foki ne ia latou;

E fakaola ne ia a latou mai tino amio masei,

Me olo atu a latou ki a ia mō se puipuiga 'lei.