FAATAOTO 20 - Tuvalu Revised Bible

1Kafai ko to lasi tau inu i te kava kae gasolo fua koe o valea kae pakalaga sale. Se uiga valea fua manafai e taumafai koe ko koe ke konā.

2E tau mo koe o mataku ki te tupu manafai e kaitaua atu ki a koe, e pela eiloa mo tou mataku ki te leona tela e gulu atu; kafai e fai ne koe a ia ke kaitaua, ko tena uiga e fai fua ne koe a koe ke tamate ne ia.

3E faigofie fua o fakatupu se finauga ne se tino valea; se faiga lei ke fakamao koe mai i se finauga pena.

4A te tagata toki lakau tela e paie ma toki ana fatoaga i te taimi tau, ka seai ne ana mea e maua i te taimi o te taukai.

5A mafaufauga o te tino e pela me ne vai i se vaikeli poko, kae e mafai fua o aumai ki tua ne se tagata atamai.

6A tino katoa e faipati sale pela i a latou e fakamaoni kae amiotonu, kae onoono ake la me mafai o maua ne koe se tino fakamaoni tonu eiloa i tino kona me ikai!

7E manuia a tamaliki manafai te lotou tamana se tagata fai mea tonu kae amiotonu.

8A te tupu e nofo mai i te nofoga fakamasino, kae e iloa ne ia a te masei manafai e kilo ki ei.

9E a, e mafai ne se tino o takutonu mai i tena mafaufau ko 'ma katoatoa, me ko oti ne faka'ma ana agasala katoa?

10A te Aliki e se fiafia ki tino kola e fakaaoga ne latou a fua se tonu.

11A uiga o te tamaliki e fakaasi mai i mea e fai ne ia, e mafai o iloa ne tatou manafai se tamaliki lei kae amiotonu.

12Ko oti ne aumai ne te Aliki ki a tatou a mata e lavea ei ne tatou a mea, mo taliga e fakalogologo ki ei tatou.

13Kafai e lasi tou taimi e fakamaumau ki te moe, ko tena uiga a koe ka mativa. Galue malosi kae ka uke au me mea e maua mo ou kai.

14A tino e muimui faeloa ki te togi o mea i te mafa, kae kafai ko fano ko fakamatamata ei ki tino i tena mea ne maua i se togi foliki.

15Kafai e iloa tonu ne koe te mea tela e fakamatala ne koe, ko tena uiga ko maua ne koe te mea e taua atu i aulo mo fatu taua.

16A te tino tela e tauto ke togi ne ia a te kaitalafu a te sua tino, se tino valea fua, e tau o puke mai sena manafa mō togi ki ei te kaitalafu.

17A mea ne maua ne koe i auala se tonu, e fiafia koe ki ei pela eiloa me ne meakai tafasili i te gali, kae fakamuli ifo ka pela fua me ne mu one.

18Salasala ki manatu fakatonutonu lei kae ka manuia koutou; sa sona tele fua ki loto i te taua kae seki ai ne aofaga a koutou ne fai.

19A te gutu faitala e se mafai o funa ne ia se mea funa. Fakamao keatea mai i tino gutu faitala.

20Kafai e muna masei koe ki ou matua, ko koe ka mate atu e pela me se moli tela e mate i te pouliga.

21Ko te faigofie o maua tou maumea, ko te foliki o tena aoga ki a koe.

22Sa taumafai o taui ne koe te mea se a te sua tino ne fai atu ki a koe. Talitonu ki te Aliki, kae ka fakatonu ne ia a mea katoa.

23Te Aliki e se fiafia ki tino kola e fakaaoga ne latou a fua se tonu.

24A te auala e olo i ei tatou taki tokotasi ko leva ne fuafuagina ne te Aliki; e mafai la pefea ne se tino o malamalama i te auala ka sasale ei a ia i tena olaga katoa?

25Mafaufau fakalei koi tuai o fai tau tautoga e uiga ki te taulaga tela ka ofo ne koe ki te Atua, i a koe ma salamo fakamuli.

26A te tupu poto e mafai eiloa o maua ne ia a te tino ne fai ne ia te agasala, kae ka fakasala mafa eiloa ne ia.

27Ne aumai ne te Aliki ki a tatou te mafaufau mo te lagona; e se mafai ne tatou o funa o'tou mafaufauga mai i a tatou eiloa.

28A te tupu e mautakitaki tena pule manafai e tumau i te fakamaoni, te amiotonu, mo te fai mea tonu.

29E tavae ne tatou te malosi o talavou, kae fakaava tatou ki te ulusina o toeaina.

30E isi ne taimi e fakatali eiloa tatou ke tupu se fakalavelave e mae ei tatou, kae fatoa fuli o'tou amioga.