3 IOANE 1 - Tuvalu Revised Bible

1 Galu 19.29; Loma 16.23; 1Koli 1.14 Ko au ko te Toeaina.

Ko tusi atu au ki taku pele ko Kaio, tela e alofa tonu au ki ei.

2Toku taugasoa pele, au e 'talo ke solosolo 'lei a mea katoa ki a koe, ka ke tumau foki tou malosi faka te foitino, e pela eiloa mo te iloa ne au i a koe e malosi i te agaga.

3Ko oko eiloa i toku fiafia i te okomaiga o nisi taina kae fai mai e uiga ki tou fakamaoni ki te mea tonu, e pela eiloa mo tau masani ko te tumau i te mea tonu.

4E seai se mea e sili atu i toku fiafia ki ei, i lo te fakalogo ki tala i aku tama e ola eiloa i te mea tonu.

Ko Tavaegina a Kaio

5Toku taugasoa pele, ko oko eiloa i tou fakamaoni ki galuega e fai ne koe mō te kau taina, ke oko eiloa ki tino o fenua fakaatea.

6Ko oti ne faipati latou e uiga ki tou alofa ki te Ekalesia i konei. Fakamolemole, ke fesoasoani eiloa koe ki a latou, ko te mea ke fano eiloa a te lotou faigamalaga, i so se auala e loto ki ei a te Atua.

7Me ne faimalaga eiloa a latou ona ko te galuega a Keliso, kae e seai se fesoasoani ne maua ne latou mai i tino se talitonu.

8Tela la, a tatou Kelisiano, e 'tau eiloa o fesoasoani ki tino konei, ko te mea ke kau fakatasi tatou i te lotou galuega mō te mea tonu.

Ko Siofilisi mo Temetiu

9Ko oti ne tusi atu ne au se tusi toetoe ki te Ekalesia; ka ko Siofilisi, tela e manako ke fai mo olotou takitaki, e se fia fakalogo eiloa ki aku muna konei e fai atu.

10Tela la, kafai e oko atu au, e fakamasaua katoa ne au ana mea ne fai: ko mea masei katoa kola ne faipati ne ia e uiga mō matou, e pela foki mo ana tala loi ne fai! Kae se gata fua i kona; e se tali 'lei foki ne ia Kelisiano manafai e olo atu ki a ia, kae fakagata foki ne ia a tino kola e manako o tali 'lei latou, kae taumafai foki o 'taki keatea latou mai mafutaga faka te Ekalesia.

11Toku taugasoa pele, sa fakaakoako ki te masei, kae fakaakoako ki te 'lei. So se tino e fai mea 'lei e kau mo te Atua; so se tino e fai ne ia te masei e seki matea ne ia te Atua.

12A tino katoa ko oko eiloa i te tavae ne latou a Temetiu; e molimau eiloa te mea tonu e uiga ki a ia. A matou foki e molimau ki a ia, ka ke 'tau foki o iloa ne koutou me ko te mea e fai atu ne matou e tonu eiloa.

Ko Alofaaga Fakapalele

13E uke a mea e fia taku atu ne au ki a koe, ka ko au e se manako o taku atu i se peni tusitusi mo se vaitusi.

14Au e fakamoemoe ke fetaui taua i se taimi pili mai, ko fai'pati faka'lei ei taua.

15Ke i a koe te filemu.

Ko alofa atu katoa ou taugasoa ki a koe. Ko alofa atu foki au ki otou taugasoa katoa.