SALAMO 11 - Tuvalu Revised Bible

Ko te Talitonu ki te Aliki

1Au e talitonu ki te Aliki, e sao ei au.

Kae ne valea pefea koutou o fai mai pela ki a au,

“Eva ki te mauga pela me se manu lele ke sao koe,

2Me i tino amio ma'sei ko futi olotou kausana kae fakatonutonu olotou matasana o sana a tino amio'tonu i te pouliga.

3E seai se mea e mafai o fai ne tino amio lei manafai ko malepe se mea.”

4A te Aliki e i loto i tena faletapu;

E i te lagi tena nofogaaliki.

E kilokilo mai a ia ki tino i koga katoa

Kae iloa foki ne ia olotou mea katoa e fai.

5Ka sukesuke ne te Aliki a tino lei mo tino amio ma'sei;

A tena loto katoatoa e se fiafia ki tino ofa tulafono.

6E faka'to ifo ne ia ki tino amio ma'sei te malala 'ka mo pauta 'ka;

E fakasala foki ne ia latou ki te matagi vela.

7E amiotonu te Aliki kae fiafia ki te amio lei;

A latou kola e faka'logo ki a ia ka fai mo latou tena manuia.