IELEMIA 32 - Tuvalu Revised Bible

Ko Togi te Laukele o Ielemia

1 2Tupu 25.1-7 A te Aliki ne faipati mai ki a au i te sefulu o tausaga o te nofoaiga a Setekaia te tupu o Iuta, ka ko te sefuluvalu o tausaga o te nofoaiga a Nepukanesa te tupu o Papelonia.

2I te taimi tena, a te kautau a te tupu o Papelonia e taua ki Ielusalema, ka ko au e 'loka i te malae o te palesi.

3A te Tupu ko Setekaia ne 'loka ne ia a au i kona, kae 'lou ne ia me ne folafola ne au i te Aliki ne fai mai penei, “Ka tuku atu ne au te fa'kai tenei ke fakatakavale ne te tupu o Papelonia,

4ka ko Setekaia e se sao. Ka tuku atu a ia ki te tupu o Papelonia kae ka faipati eiloa laua.

5A Setekaia ka ave ki Papelonia, kae ka nofo i kona ke oko ki te taimi e saga atu ei au o fai se mea ki ei. Kafai foki eiloa e taua atu a ia ki te kau Papelonia, e se manumalo eiloa a ia. Ko au, te Aliki, tena ne faipati atu.”

6A te Aliki ne fai mai ki a au,

7i a Hanamele, te tama tagata a te taina o toku tamana, e fai o vau ki a au mo tena fakamolemole ke togi aka ne au tena laukele i Anatota, i te kogā laukele o Peniamina, me i a au ko te kaiga pili eiloa o ia, tela la, e isi soku saolotoga o togi ma aku.

8Tena la, e pela eiloa mo muna a te Aliki, ne vau eiloa Hanamele ki a au i te malae fono o te palesi, kae fai mai ki a au ke togi ne au a te laukele o ia. Tela la, ko iloa ne au i te Aliki ne faipati mai eiloa ki a au.

9Ne togi ne au te laukele mai i a Hanamele, fua ei ne au te aofaki o te tupe o tuku atu ki a ia; a te togi e tusa mo te sefulufitu tupe siliva.

10Ne saina kae fakamautakitaki ne au te feagaiga, aumai foki ne au ne tino ke molimau i te mea tena, fua ei ne au te tupe i te mea fua mea mafa.

11Ne puke aka ne au a 'kopi e lua o te feagaiga tena — ko te 'kopi tela ko oti ne fakamautakitaki, tela e tusi ei te feagaiga mo ana faifaiga, mo te 'kopi tela e seki fakamautakitaki —

12tuku atu ei ne au ki a Paluka, te tama tagata a Nelia kae ko te mokopuna o Maseia. Ne tuku atu ne au ki a ia i mua o Hanamele, mo molimau kola ne saina i te feagaiga o te togiga o te laukele, mo tino kola e sagasaga i te malae fono.

13Ne fai atu au ki a Paluka i mua o latou katoa penei,

14“A te Aliki Malosi, te Atua o Isalaelu, ko fakatonu mai ki a koe ke puke ne koe a pepa o te feagaiga konei, ko te pepa tela ko oti ne fakamautakitaki mo te pepa tela e seki fakamautakitaki, kae ke tuku ki loto i se tiā ne faite ki one, ko te mea ke tausi fakalei mo tausaga mai mua nei.

15A te Aliki Malosi, te Atua o Isalaelu, ne fai mai i fale, laukele, mo togavine i te fenua tenei e toe togi katoa.”

Ko te Talo a Ielemia

16I te otiga ne tuku ne au a te pepa o te feagaiga o te togiga o te laukele ki a Paluka, tena ne talo ei au penei,

17“Te Aliki Sili, ne faite ne koe a te lagi mo te lalolagi ki tou mana malosi; e seai se mea e faigata ki a koe.

18Ko oti ne fakaasi atu ne koe tou alofa tumau ki tino e afe mo afe, kae e fakasala foki ne koe a tino ona ko agasala a olotou matua. A koe se Atua takutakua kae malosi; a koe ko te Aliki Malosi.

19E fai ne koe a fuafuaga lei kae fai mea fakaofoofogina; e lavea ne koe a mea katoa a tino e fai, kae e taui ne koe ki a latou e tusa eiloa mo olotou mea ne fai.

20I aso mua, ne fai ne koe a vavega mo mea fakaofoofogia i Aikupito, kae tenei eiloa koi tumau o fai ne koe ke oko mai ki aso nei, i loto i Isalaelu pela foki i nisi malo fakaatea aka foki, tela la, a koe nei ko iloa i koga katoa.

21Ne fakaaoga ne koe tou 'mana mo tou malosi o fai a vavega mo mea fakaofoofogia o fai te fili ke mataku, ko te mea ke aumai ei ne koe ou tino Isalaelu keatea mai Aikupito.

22Ne tuku ne koe mo latou a te fenua maumea kae laukele ola tenei, e pela eiloa mo tau tautoga ki olotou tupuga.

23Kae i te taimi ne o'mai ei latou ki te fenua tenei o nofo i ei, e seki fakalogo latou ki au fakatonuga io me ola i se olaga e tusa mo au akoakoga; e seai eiloa se mea ne fai ne latou i mea ne fakatonu atu ne koe. Tena la, ne aumai ei ne koe te fakasalaga ki a latou.

24“A tino Papelonia ko oti ne faite ne latou a mea maluga mai i tua o te fa'kai, ko te mea ke kake latou ki loto o puke te fa'kai, kae i te vaitaimi tena a latou e taua atu eiloa ki te fa'kai. A te taua, te mate fiakai, mo te famai ka ala ei o takavale te fa'kai i te fili. E lavea ne koe me ko taunu katoa au folafolaga ne fai.

25Te Aliki Sili, ko koe ne fakatonu mai ki a au ke togi ne au a te laukele tenei i mua o tino kola ne molimau, e ui eiloa a te fa'kai ko pili o puke ne te kau Papelonia.”

26Tena, kae fai mai te Aliki ki a au penei,

27“Au ko te Aliki, te Atua o tino katoa. E seai se mea e faigata ki au.

282Tupu 25.1-11; 2NTupu 36.17-21 Ka tuku atu ne au a te fa'kai tenei ki te tupu o Papelonia ko Nepukanesa, mo tena kautau; ka fakatakavale ne latou

29kae sunu. Ka sunu ne latou ki lalo, fakatasi mo fale kola ne pogai ei toku kaitaua ki tino, me e sunu mea manogi i luga i tuafale kona ki a Paala, kae ligiligi atu a taulaga uaina a latou ki atua fakaatea.

30Mai i te kamataga o te tala tuku fakasolo o tino Isalaelu mo tino Iuta, ne fai faeloa ne latou au ke kaitaua kae se fiafia i olotou mea ne fai.

31A tino o te fa'kai tenei ne fai faeloa ne latou au ke kaitaua talu mai te aso ne faite ei te fa'kai. Ko oti ne tonu i a au, me ka ofa fakamasei ne au,

32ona ko amioga masei ne fai ne tino Iuta mo Ielusalema, fakatasi mo olotou tupu mo takitaki, mo faitaulaga mo pelofeta.

33Ne fulitua mai latou ki a au, kae e ui eiloa e akoako soko atu ne au latou, kae e se fia fakalogo eiloa latou.

342Tupu 23.10; Iele 7.30,31; 19.1-6 Ne avatu foki eiloa ne latou olotou tupua fakafoufou ki loto i te Faletapu tela ne faite mo fai tapuakiga ki a au, tela la, ko fakalailai ne latou.

352Tupu 23.10; Iele 7.31; Levi 18.21 Ne faite ne latou a fata-fai-taulaga ki a Paala i te Vanu o Hinomo, ke 'ta ei olotou tama tagata mo tama fafine ke fai mo taulaga ki te atua ko Moloka. E seki fakatonu ne au ke fai ne latou te mea tena, kae e seki oko ifo foki eiloa ki toku mafaufau me e mafai o fai ne latou se vaega mea pena o fai a tino Iuta ke agasala.”

Ko te Fakamoemoega Lei mo Aso Fakamuli

36A te Aliki, te Atua o Isalaelu, ne fai mai ki a au penei, “Ielemia, a tino e fai pela i te taua, te mate fiakai, mo te famai ka oko mai ki te fa'kai tenei, tena foki te pogai ka takavale ei i te tupu o Papelonia. Fakalogo mai nei ki nisi muna a aku konei ka fai atu.

37Ka fakamaopoopo mai ne au a tino o toku fenua mai i fenua katoa kola ne fakasalalau ne au ki ei latou i toku kaitaua; ka toe fakafoki mai ne au latou ki te koga tenei, ke nofo i ei mo te saogalemu.

38Tena la, ka fai latou mo oku tino, ka ko au ka fai mo Atua o latou.

39Ka tuku atu ne au e tasi te fakamoemoega o latou i te olaga nei: ke fakaaloalo mai ki a au i taimi katoa, mo te lei o latou mo tino i olotou gafa.

40Ka fai ne au se feagaiga tumau mo latou. Ka se mafai o fakagata te faiga ne au o mea lei mo latou, kae ka fai ne au latou ke ma'taku mai ki a au mo olotou loto katoa, ko te mea ke se toe fulitua mai ki a au.

41Ka fiafia au o fai a mea lei mo latou, kae ka fakatumau ne au latou i te fenua tenei.

42“Ne aumai ne au a puapuaga ki tino konei, kae nei ka aumai ne au ki a latou a mea lei katoa kola ne tauto au me aumai ki a latou.

43A tino e fai mai i te fenua tenei ka pela me se toafa tela ka seai ne tino io me ne manu e nofo i ei, kae ka tuku atu ki te kau Papelonia. Ka ko laukele i te fenua tenei e toe togi katoa foki eiloa.

44Ka togi ne tino a laukele kona, ka ko te feagaiga o te togiga e tau o saina, fakamautakitaki, kae ke isi foki ne tino e molimau i te faiga o mea kona. Ka fai te mea tena i te laukele o Peniamina, i fa'kai i tafatafa o Ielusalema, i fa'kai o Iuta, pela foki i fa'kai i te fenua mauga, i tafito mauga, mo fa'kai i Iuta ki saute. Ka fakafoki mai ne au a tino ki te lotou fenua. Ko au, te Aliki, tena ne faipati atu.”