1A matakaiga o Leupena mo Kato ko oko eiloa i te uke o olotou pulumakau. I te mateaga ne latou a te lei o te fenua o Iaseli mo Kileata mo tausi pulumakau,
2tena ne olo atu ei latou ki a Mose mo Eleasalo mo takitaki katoa o te fenua kae fai atu penei,
3-4“A te kogā fenua tenei, tela ne fesoasoani te Aliki ki a Isalaelu ke puke ne latou—ko te fakai ko Atalota, Tipono, Iaseli, Nimala, Hesepono, Eleale, Sipama, Nepo mo Peono—se laukele lei mo lafu manu, me ko oko eiloa i te uke o tou manu.
5Fakamolemole tuku mai mo matou te laukele tenei ke fai mo tofi o matou, kae sa avegina matou ki te sua feitu o te Iolitana, o nofo i ei.”
6Ne tali atu a Mose penei, “A koutou e fiafia o nofo i konei kae tuku otou taina Isalaelu ke olo o taua?
7E mafai pefea ne koutou o fakavaivai a loto o tino Isalaelu ke se olo atu ki te sua feitu o te Iolitana ki te fenua tela ko oti ne tuku ne te Aliki mo latou?
8Nume 13.17-33 Tena te mea ne fai ne otou tamana i te taimi ne uga ei ne au latou mai Katesa Paenea ke olo o onoono fakalei ki te fenua ne tuku mai ne te Atua.
9Ne olo atu latou ke oko eiloa ki te Vanu o Esekolo, tena matea ei ne latou te fenua, kae i te taimi ne foki mai ei, ne fakavaivai ne latou a loto o tino ke se olo ki te fenua ne tuku mai ne te Aliki mo latou.
10Nume 14.26-35 Ne kaitaua te Aliki i te taimi tena, tela ne fai ei tena tautoga penei:
11‘Au e tauto me mai luga o te se fakamaoni mai o latou ki a au, e seai eiloa se tino i te luasefulu tausaga o fano ki luga kola ne o'mai mai Aikupito e ulu atu ki loto i te fenua tela ne tauto ne au ki a Apelaamo, Isaako mo Iakopo.’
12A te mea tena e aofia ei a tino katoa, na ko Kalepo fua te tama a Iefune te tino Keni mo Iosua te tama a Nuno; ne fakamaoni eiloa laua kona ki te Aliki.
13Ne kaitaua te Aliki, tela ne fai ei ne ia a te fanauga a Isalaelu ke takasese sale i te vao i tausaga e fasefulu, ke oti atu ne 'mate a te tupulaga tela ne fakasala ne ia.
14Kae nei, ko 'kau eiloa koutou mo otou tamana, koutou se tupulaga fou kae fonu i tino amio masei kola ko taumafai foki o fakaoso te Aliki ke toe kaitaua ki tino Isalaelu.
15A koutou matakaiga o Leupena mo Kato, kafai koutou e ita ma tautali i te Aliki, ko tena uiga ka toe tiakina ne ia a te fenua o Isalaelu ke takasese i te vao nei, kae ko koutou e pogai ei te fakamalaiaga tena.”
16Ne toe olo latou ki a Mose kae fai atu penei, “Talia mai muamua ke faite aka ne pui mo omotou mamoe, mo ne fa'kai mo olotou pui, ke nofo i ei omotou fafine mo tamaliki.
17Ka oti ko olo ei matou mo omotou taina Isalaelu o taua, ko matou e muamua i te kautau, ke oko ki te taimi e maua ei ne latou te fenua tela ne tuku mai ne te Aliki mo latou. I te vaitaimi tena, ka ko isi ei ne fa'kai e fai a pui ke nofo ei omotou fafine mo tamaliki e sao ei latou mai i tino o te fenua tenei.
18E se mafai eiloa matou o foki mai ki omotou kaiga, vagana ke toka fakalei eiloa te fakanofoga o omotou taina Isalaelu i te fenua ne tusia mo latou.
19E seai se laukele e puke mo matou i te feitu tena o te Iolitana, me e tenei ko maua te vaega o matou i te feitu tenei ki te saegala o te Iolitana.”
20Ne tali atu a Mose, “Kafai e tonu eiloa otou pati kona e fai mai, na fakatoka la nei, i mua o te Aliki, mo te taua.
21A otou sotia katoa e tau o ulu i loto i te Iolitana kae ka takitaki latou ne te Aliki o taua atu ki otou fili ke oko eiloa ki te taimi e fakatakavale ei latou ne te Aliki,
22kae puke te fenua. Kafai ko toka te feitu tena, ko foki mai ei koutou ki te otou tofi tenei, me ko oti te otou tiute ki te Aliki pela foki ki otou taina Isalaelu. Tena, ka talia ei ne te Aliki ke fai mo koutou te laukele tenei i te feitu ki te saegala o te Iolitana.
23Kae kafai e se tausi ne koutou te otou feagaiga, a koutou e agasala ki te Aliki. Sa manatu fataua ki te mea tena, a koutou e fakasala eiloa mafai e agasala koutou.
24Tena la, faite otou fa'kai mo pui o otou mamoe, kae masaua o tausi te otou feagaiga!”
25Tena, ne fai atu ei a tagata o matakaiga o Kato mo Leupena penei, “Tou malu, e fai eiloa ne matou tau fakatonuga.
26A omotou avaga mo tamaliki, mo omotou pulumakau mo mamoe e nofo i konei, i fa'kai o Kileata.
27Ka ko matou katoa ko toka katoa o olo ki te taua i lalo o te Aliki. Ka olo atu matou ki te sua feitu o te Iolitana o taua, e pela eiloa mo au pati ne fai.”
28 Iosu 1.12-15 Tena, ne tuku mai ei ne Mose a fakatonuga konei ki a Eleasalo, Iosua, mo nisi takitaki o Isalaelu:
29“Kafai e olo atu a tagata o te matakaiga o Kato mo te matakaiga o Leupena ki te sua feitu o te Iolitana o fakatoka o tau i te fakatonuga a te Aliki, kae kafai e manumalo koutou mai te fesoasoani o latou, masaua la o tuku atu mo latou te fenua o Kileata ke fai mo tofi o latou.
30Kae kafai e se olo atu latou ki te sua feitu o te Iolitana ke tau fakatasi koutou, ko 'tau ei o talia ne latou se vaega mo latou i te fenua o Kanana, e pena eiloa mo koutou.”
31Ne tali atu a tagata i matakaiga o Kato mo te matakaiga o Leupena penei, “Tou malu, e fai eiloa ne matou te fakatonuga a te Aliki.
32A matou e olo eiloa ki te sua feitu o te Iolitana ki te fenua o Kanana o taua, e tusa mo te fakatonuga a te Aliki, ko te mea ke nofo eiloa matou mo te motou tofi i konei, i te feitu ki te saegala o te Iolitana.”
33Tena ne tuku ei ne Mose ki matakaiga o Kato mo Leupena, pela foki ki te āfa o te matakaiga o Manase a te kogā fenua katoa o te Tupu o Amoli ko Sekono, mo te Tupu o Pasana ko Oko, e aofia ei a fa'kai mo te fenua i olotou tafa.
34Konei a fa'kai fai pui kola ne toe faite fakalei ne te matakaiga o Kato: ko te fa'kai o Tipono, Atalota, Aloela,
35Atalota Sofana, Iaseli, Iokopea,
36Petanimala, mo Peta Halana.
37A fa'kai ne toe faite fakalei ne te matakaiga o Leupena ko te fa'kai o Hesepono, Eleale, Kiliataima,
38Nepo, Paala Meono, te igoa tena ne fuli, mo Sipama. Ne toe fakaigoa ne latou ki igoa fou a fa'kai kona ne toe faite fakalei ne latou.
39A te kaukaiga o Makila, te tama a Manase, ne fao ne ia te fenua o Kileata kae afuli a tino Amoli kola ne nofo i ei.
40Tena ne tuku atu ei ne Mose a te fenua o Kileata ki te kaukaiga o Makila, tena ne nofo eiloa latou i kona.
41A te kaukaiga o Iaila i te matakaiga o Manase, ne fao malo ne latou a nisi fa'kai foniki kae fakaigoa ne latou ko “Fa'kai o Iaila.”
42A Nopa, ne fakatakavale ne tena potukau a te fenua o Kenata mo fa'kai i ona tafa, tena ne fakaigoa ei ne ia ki tena igoa, ko Nopa.
Who We AreWhat We EelieveWhat We Do
2025 by iamachristian.org,Inc All rights reserved.
