MIKA 3 - Tuvalu Revised Bible

Ko Muna 'toka ne Mika a Takitaki o Isalaelu

1Faka'logo mai, koutou takitaki o Isalaelu! Koutou ne tino e 'tau o saga ki te faiga o mea ke tonu,

2kae tela la, e fiafia koutou ki te mea masei kae se fiafia ki te mea lei. E fole ola ne koutou a pakili o oku tino kae saesae ne koutou olotou kano mai olotou ivi.

3E kai ne koutou oku tino. E fole ne koutou olotou pakili, fatifati olotou ivi kae katikati ne koutou e pela me ne mea fasi ka fao ki se ulo.

4Ka oko mai te taimi e ka'laga ei koutou ki te Aliki kae ka se tali mai ki a koutou. Ka se fakalogo a ia ki otou talosaga, me ko oti ne fai ne koutou a amioga se 'lei.

5Oku tino ko fakaloiloigina ne pelofeta kola e folafola ne latou te filemu ki tino kola e togi tupe ki a latou, kae folafola te malaia ki a latou kola e se togi tupe atu ki a latou. Konei pati a te Aliki ki vaega pelofeta kona,

6“A koutou pelofeta, otou aso ko pili o palele. A te pouliga ka oko mai ki a koutou. Ka se toe maua ne koutou ne fakaasiga fakapelofeta, se toe maua foki ne koutou o valo ki se mea, ona ko te takitakiga ne koutou oku tino ki te auala 'se.”

7A latou kola e valo ne latou mea ka tupu i aso fakamuli, ka masiasi latou me ka se taunu olotou valoaga. Ka masiasi katoa latou, i te Atua ka se tali mai ki a latou.

8Ka ko au ko fakafonu ne te Aliki ki tena agaga mo tena mana, kae tuku mai ne ia te fai mea tonu mo te loto toa o taku atu ki tino Isalaelu a olotou agasala.

9Faka'logo mai ki a au, koutou takitaki o Isalaelu, kola e takalialia i te mea tonu kae fiafia ki mea masei.

10Ko fakafonu ne koutou te fa'kai o te Atua tela ko Ielusalema, i te tatino mo te fai mea se tonu.

11A takitaki o te fa'kai e talia ne latou a meaalofa faka'kolekole mai tino i faiga o olotou fakamasinoga, a faitaulaga e ma'nako ki se togi manafai e akoako atu ne latou a te Tulafono. A pelofeta e manako ke togi tupe atu olotou valoaga, kae fai aka katoa latou pela i te Aliki e fakatasi mo latou. Muna a latou, “E seai se fakalavelave e mafai o oko mai ki a matou, i te Aliki e nofo i a matou.”

12 Iele 26.18 Tela la, ona ko koutou, a Siona ka fakamalū pela me se fatoaga; Ielusalema ka maofaofa valevale, ka ko te mauga tela e tu ei te Faletapu ka fai pela me se vao pupu.