1I aso kona, koi tavini atu ei Samuelu ki te Aliki i te fakatonutonuga a Eli, ko se uke ei a fekau e oko mai sale mai i te Aliki, mo fakaasiga foki mai i a ia ko se uke.
2I te po e tasi, a Eli, tela ko pili faka eiloa o kivi ona mata, e moe i tena potu,
3ka ko Samuelu e moe i te faletapu, te koga e tuku ei te Pusa o te Feagaiga. Ko pili faka eiloa ki te vaveao, ka ko te moli koi ka eiloa,
4ne kalaga atu ei te Aliki ki a Samuelu. Ne tali Samuelu penei, “Tou malu! Se a!”
5Kae tele atu ki a Eli kae fai atu penei, “A koe ne kalaga mai ki a au? Au tenei.”
Kae ne tali atu a Eli, “Au seki kalaga atu ki a koe; fano o moe.” Tena ne toe foki atu ei a Samuelu ki tena moega.
6-7Ne toe kalaga atu a te Aliki ki a Samuelu. A te tamaliki tagata e se iloa ne ia me ko te Aliki, aua me i te Aliki ne seki faipati eiloa ki a ia muamua. Tena ne tua ake ei a ia, kae ne tele atu ki a Eli, kae ne fai atu, “A koe ne kalaga mai ki a au? A au tenei.”
8Ne toe kalaga atu te Aliki ki a Samuelu i te tolu o taimi, tena ne tu aka Samuelu kae toe fanatu ki a Eli kae fai atu penei, “A koe ne kalaga mai? Au tenei.”
Tena ne iloa aka ei ne Eli me ko te Aliki tela e kalaga ki a Samuelu,
9tena ne fai atu ei a ia ki a Samuelu penei, “Foki ki tou moega, kae kafai e toe kalaga atu, tali penei, ‘Te Aliki, faipati mai i tau tavini tenei e fakalogologo atu.”’ Tena, ne foki atu ei Samuelu ki tena moega.
10Ne vau te Aliki o tu i kona, kae kalaga atu, e pela mo taimi mua, “Samuelu! Samuelu!”
Ne tali atu Samuelu, “Faipati mai, i tau tavini tenei e fakalogologo atu.”
11Tena ne fai atu ei te Aliki ki a ia penei, “i se aso mai mua nei, ka fai ne au se mea mataga ki tino Isalaelu, kae kafai e logo a tino i ei, ka poi valevale.
12I te aso tena, ka fakataunu ne au aku fakamalaiaga katoa kola ne fai ki te kaiga o Eli.
13Ko oti au ne fai ki ei me ka fakasala ne au tena kaiga ki te se gata mai, me i ana tama tagata ne muna ma'sei mai ki a au. E iloa ne Eli a amioga kona a ana tama tagata, kae e se 'liko eiloa ne ia.
14Tela la, au ne faipati faka'lei eiloa ki te kaiga o Eli, me e seai eiloa se taulaga e fai ne latou, e mafai ei o magalo latou mai te agasala tenei.”
15Ne nofo eiloa Samuelu i tena moega ke oko eiloa ki te tafataeao, tena tu aka a ia, talatala ei ne ia a mataloa o te fale o te Aliki. Ne mataku Samuelu ma fakaasi ki a Eli te fakaasiga ne oko atu ki a ia.
16Ne kalaga atu a Eli ki a ia, “Samuelu, taku tama!”
Ne tali atu Samuelu, “Tou malu. Se a?”
17Ne fesili atu a Eli. “Se a te fekau a te Aliki ki a koe? Sa funa ne koe se mea mai i a au. Ka fakasala koe ne te Atua manafai e se fakaasi mai ne koe a mea katoa ne fai atu ne ia ki a koe.”
18Tena ne fakaasi atu ei ne Samuelu a mea katoa ne fai atu ne te Aliki. E seai eiloa se mea ne funa ne ia. Muna a Eli, “Ko te Aliki eiloa tena; e fai eiloa ne ia te mea e faka'tau ifo a ia e 'lei.”
19I te tupuakaga o Samuelu, a te Aliki ne fakatasi atu eiloa ki a ia, kae ne fakataunu katoa ne ia a mea ne fai mai ne Samuelu.
20Tena, ne iloa ei ne tino Isalaelu mai te sua mata ki te sua mata, i a Samuelu ko te pelofeta a te Aliki.
21Ne fakasae sale atu eiloa te Aliki i Sailo, te koga ne fakasae atu ei a ia ki a Samuelu kae faipati atu foki ki a ia. Kafai e faipati Samuelu, ka ko tino Isalaelu katoa e fakalogo'logo fakalei katoa.
Who We AreWhat We EelieveWhat We Do
2025 by iamachristian.org,Inc All rights reserved.
